យុទ្ធនាការស្តារឡើងវិញនៃដំណាំកសិកម្មផ្តើមពីសៀមរាប បន្ទាយមានជ័យ បាត់ដំបង និងពោធិ៍សាត់

ជាតិ

យុទ្ធនាការស្តារឡើងវិញនៃដំណាំកសិកម្មផ្តើមពីសៀមរាប បន្ទាយមានជ័យ បាត់ដំបង និងពោធិ៍សាត់

29, Oct 2020 , 7:59 am

រូបភាព

លោក វេង សាខុន (អាវខ្មៅ) ចុះវាយតម្លៃផលប៉ះពាល់ដំណាំកសិកម្មក្នុងខេត្តសៀមរាប រូបភាព៖ ហ្វេសប៊ុកលោក វេង សាខុន រដ្ឋមន្រ្តីកសិកម្ម

ដោយ:

ក្រោយទឹកជំនន់មានការធូរស្រាលបន្តិចម្ដងៗ ថ្នាក់ដឹកនាំនៃក្រសួងកសិកម្ម ចាប់ផ្ដើមយុទ្ធនាការស្ដារឡើងវិញ និងបំពេញបន្ថែមចំពោះដំណាំកសិកម្ម ដែលបានខូចខាតអំឡុងគ្រោះទឹកជំនន់។ ក្រសួងកសិកម្ម បានកំណត់គោលដៅដំបូង គឺខេត្តសៀមរាប បន្ទាយមានជ័យ បាត់ដំបង និងខេត្តពោធិ៍សាត់។ នេះបើតាមហ្វេសប៊ុកលោក វេង សាខុន រដ្ឋមន្ត្រីក្រសួងកសិកម្ម កាលពីថ្ងៃទី ២៧ ខែតុលា។

នៅថ្ងៃទី២៧ តុលានេះ រដ្ឋមន្ត្រីក្រសួងកសិកម្ម បានចុះវាយតម្លៃលើផលប៉ះពាល់ និងខូចខាតជារួមនៃដំណាំស្រូវ ដំណាំរួមផ្សំ ដោយសារជំនន់ទឹកភ្លៀង និងនាំយកពូជស្រូវ ពូជដំណាំ ពូជត្រី និងកង្កែបទៅចែកជូនប្រជាកសិករតាមខេត្តគោលដៅទាំង៤។ បើតាមលោក វេង សាខុន បេសកកម្មដំបូងនាខេត្តសៀមរាប បាននាំយកពូជស្រូវ និងពូជបន្លែ ដើម្បីចែកជូនកសិករដែលរងគ្រោះចំនួន២០០គ្រួសារ។ ក្នុងនោះគ្រួសារនីមួយៗទទួលបានស្រូវពូជ ១០០គីឡូ និងពូជបន្លែមួយចំនួន ដូចជា ពូជពោតតំណើប ត្រប់វែង សណ្តែកកួរ និងគ្រាប់ពូជស្ពៃចង្កឹះ។

លោកវេង សាខុន រដ្ឋមន្ត្រីក្រសួងកសិកម្ម បានបញ្ជាក់ថា៖ «នេះជាពូជ មិនគួរយកទៅបុក ឬកិនយកអង្គរមកបរិភោគនោះទេ ផ្ទុយទៅវិញត្រូវយកទៅដាំដុះឲ្យបានទាន់ពេលវេលា ព្រោះជាពូជមិនប្រកាន់រដូវ និងអាយុកាលខ្លី ហើយសង្ឃឹមថា បងប្អូននឹងយកពូជនេះទៅដាំដុះបានផលផ្លែផ្កា គ្រាន់ទុកជាស្បៀងសម្រាប់ទ្រទ្រង់ជីវភាពគ្រួសារ ហើយក៏គួរដាំបន្លែ ដំណាំរួមផ្សំ និងចិញ្ចឹមមាន់ ឬត្រីបន្ថែម ដើម្បីធានាសន្តិសុខស្បៀង និងបង្កើនប្រាក់ចំណូលគ្រួសារ»។ រដ្ឋមន្ត្រីកសិកម្ម ក៏បានណែនាំឲ្យប្រធានមន្ទីរកសិកម្មខេត្ត ជួយអន្តរាគមន៍ទៅធនាគារផ្ទាល់ដើម្បីមានការយោគយល់ចំពោះពលរដ្ឋដែលរងគ្រោះដោយទឹកជំនន់ ដោយយោងលើហេតុផលជាក់ស្តែង។

បើតាមរបាយការណ៍គណៈកម្មាធិការគ្រប់គ្រងគ្រោះមហន្តរាយកាលពីថ្ងៃទី២៨ ខែតុលា ពលរដ្ឋសរុប៤៤នាក់ បានបាត់បង់ជីវិត ក្នុងហេតុការណ៍គ្រោះទឹកជំនន់ និងជិត៦០ម៉ឺននាក់ រងការប៉ះពាល់ ក្នុងនោះមានជាង៤ម៉ឺន៧ពាន់នាក់ ត្រូវបានជម្លៀសទៅកន្លែងមានសុវត្ថិភាព។

ផ្ទះជាង១៣ម៉ឺន៥ពាន់ខ្នង រងការប៉ះពាល់ ហើយក្នុងចំណោមនោះ មាន៦៣ខ្នង ត្រូវខូចខាត ខណៈសាលារៀន មាន៩៥១កន្លែង និងវត្តអារាមចំនួន៣០៧កន្លែង ត្រូវបានលិចទឹក ។ ចំពោះ ស្រូវវិញ មានជាង២៨ម៉ឺន៤ពាន់ហិកតា រួមទាំងដំណាំផ្សេងៗទៀត មានជាង៩ម៉ឺន៧ពាន់ហិកតា ត្រូវលិចទឹក។

ដោយឡែក ផ្លូវជាតិ ផ្លូវខេត្ត ផ្លូវគ្រួសក្រហម បូកបញ្ចូលគ្នាមានប្រវែង៦២៧គីឡូម៉ែត្រ និងផ្លូវលំនានាតាមជនបទ មានប្រវែងជាង១,៦ពាន់គីឡូម៉ែត្រ ទំនប់ប៉ះពាល់៤៩គីឡូម៉ែត្រ ប្រឡាយមេ ប្រឡាយរង និងប្រឡាយស្រោចស្រពសរុបចូលគ្នាចំនួន៦៨៩គីឡូម៉ែត្រ រួមទាំងបាក់ច្រាំងទន្លេ២១៩៥ម៉ែត្រ។

បច្ចុប្បន្នរាជធានី-ខេត្ត ដែលរងការប៉ះពាល់ដោយទឹកជំនន់ មាន២០រាជធានីខេត្តក្រុង គឺភ្នំពេញ ពោធិ៍សាត់ ប៉ៃលិន បន្ទាយមានជ័យ បាត់ដំបង ស្វាយរៀង ឧត្តរមានជ័យ សៀមរាប តាកែវ កំពង់ស្ពឺ មណ្ឌលគិរី ព្រះសីហនុ កោះកុង ព្រះវិហារ ស្ទឹងត្រែង កំពង់ចាម ត្បូងឃ្មុំ កណ្តាល កំពង់ឆ្នាំង និង កំពង់ធំ។ នេះបើតាមរបាយការណ៍របស់គណៈកម្មាធិការជាតិគ្រប់គ្រងគ្រោះមហន្តរាយ៕