បារាំងនិងអាល្លឺម៉ង់ បិទប្រទេសជាថ្មី ខណៈកូវីដ-១៩រាតត្បាតខ្លាំងនៅអឺរ៉ុប

អន្តរជាតិ

បារាំងនិងអាល្លឺម៉ង់ បិទប្រទេសជាថ្មី ខណៈកូវីដ-១៩រាតត្បាតខ្លាំងនៅអឺរ៉ុប

29, Oct 2020 , 9:29 pm

រូបភាព

មនុស្សពាក់ម៉ាស់ការពារ ដើរតាមផ្លូវនៅទីក្រុង Frankfurt អាល្លឺម៉ង់ កាលពីថ្ងៃទី ២៧ ខែតុលា ។ រូបភាព៖ Reuters

ដោយ:

ប្រធានាធិបតីបារាំង អេម៉ានុយអែល ម៉ាក្រុង និងអធិការបតីអាល្លឺម៉ង់ អែនជែឡា មឺហ្គែល បានចេញបញ្ជាឲ្យបិទប្រទេសពួកគេឡើងវិញ នៅថ្ងៃទី ២៨ ខែតុលា ខណៈរលកទី២ដ៏ធំសម្បើម នៃជំងឺកូវីដ-១៩ បានគំរាមកំហែងខ្លាំងលើតំបន់អឺរ៉ុប មុនរដូវរងារចូលមកដល់។

ថ្លែងក្នុងសុន្ទរកថាលើកញ្ចក់ទូរទស្សន៍ លោក ម៉ាក្រុង គូសបញ្ជាក់ថា ជំងឺកូវីដ-១៩ កំពុងឆ្លងរាលដាលនៅល្បឿនអាក្រក់បំផុត ហើយប្រទេសជិតខាងបារាំងទាំងអស់ ក៏កំពុងហ៊ុមព័ទ្ធដោយល្បឿនឆ្លងយ៉ាងលឿននៃជំងឺនេះផងដែរ។

«យើងទាំងអស់គ្នា [តំបន់អឺរ៉ុប] ស្ថិតនៅស្ថានភាពដូចគ្នា ហើយនោះគឺរងគ្រោះដោយរលកទី២ [នៃជំងឺកូវីដ-១៩] ដែលយើងដឹងថានឹងកាន់តែធ្ងន់ធ្ងរ ហើយគ្រោះថ្នាក់ខ្លាំងជាងរលកទី១ទៅទៀត»។ លោកប្រធានាធិបតី លើកឡើងបែបនេះ មុននឹងសង្កត់ធ្ងន់ថា ដូច្នេះហើយទើបលោកសម្រេចចិត្តបិទប្រទេសឡើងវិញដើម្បីទប់ស្កាត់ជំងឺរាតត្បាតសកលនេះ។

ក្រោមវិធានការបារាំងថ្មីដែលចូលជាធរមាននាថ្ងៃទី ៣០ ខែតុលា ពលរដ្ឋបារាំងនឹងតម្រូវឲ្យស្នាក់នៅផ្ទះ លើកលែងតែទិញទំនិញចាំបាច់ ទៅពិនិត្យសុខភាព ឬធ្វើលំហាត់ប្រាណជាដើម។ ប្រជាជនបារាំង នឹងត្រូវអនុញ្ញាតឲ្យចេញទៅធ្វើការ ប្រសិនបើថោកែពួកគេអះអាងថា ការងារពួកគេពុំអាចធ្វើទៅពីផ្ទះបានទេនោះ។ ដោយឡែក សាលារៀន នឹងបន្តបើកទ្វារ។

យ៉ាងណាមិញ ពលរដ្ឋបារាំងណាម្នាក់ ដែលចង់ចាកចេញពីផ្ទះ នឹងត្រូវភ្ជាប់ឯកសារបញ្ជាក់ តាមខ្លួន ដែលអាចត្រូវត្រួតពិនិត្យដោយសមត្ថកិច្ច។

ដូចគ្នានឹងបារាំងដែរ រដ្ឋាភិបាលអាល្លឺម៉ង់ នឹងបិទហាងស្រា ភោជនីយដ្ឋាន និងរោងភាពយន្ត ចាប់ពីថ្ងៃទី ២ ដល់ ៣០ ខែវិច្ឆិកា។ យ៉ាងណាមិញ សាលារៀន នឹងបន្តបើកទ្វារដដែល ខណៈហាងទំនិញនានា នឹងត្រូវអនុញ្ញាតឲ្យបើកដំណើរតាម ជាមួយការរឹតត្បិតមួយចំនួន។

«យើង ត្រូវចាត់សកម្មភាពឥឡូវនេះ» ។ អ្នកស្រីអធិការបតី អែនជែឡា មឺហ្គែល អះអាងបែបនេះ ដោយបន្ថែមថា ប្រព័ន្ធសុខាភិបាលអាល្លឺម៉ង់ នៅតែអាចទប់ស្កាត់បញ្ហាប្រឈមបច្ចុប្បន្ននេះបាន ក៏ប៉ុន្តែស្ថិតក្នុងល្បឿនឆ្លងនៃជំងឺកូវីដ-១៩នេះ វានឹងឈានដល់កម្រិតកំណត់នៃសមត្ថភាពរបស់រដ្ឋាភិបាលក្នុងពេលប៉ុន្មានសប្ដាហ៍ខាងមុខ។

ផ្សារហ៊ុនពិភពលោក បានដាំក្បាលចុះយ៉ាងគំហុក ឆ្លើយតបនឹងដំណឹងដែលប្រទេស២ដែលមានសេដ្ឋកិច្ចធំបំផុតរបស់អឺរ៉ុប បានប្រកាសបិទប្រទេស ដោយសារការផ្ទុះរាលដាលខ្លាំងនៃជំងឺកូវីដ-១៩។

តួលេខចុងក្រោយរបស់អង្គការសហប្រជាជាតិ កាលពីថ្ងៃទី២៧ ខែតុលា បានបង្ហាញថា អឺរ៉ុបរាយការណ៍ករណីឆ្លងជំងឺកូវីដ-១៩ សរុប ១,៣លានករណីក្នុងពេល៧ថ្ងៃចុងក្រោយ ជិតពាក់កណ្ដាលករណីឆ្លងដែលរាយការណ៍ទូទាំងពិភពលោក ដែលស្មើ២,៩លានករណី។

គិតត្រឹមថ្ងៃទី ២៩ ខែតុលា បារាំង មានករណីឆ្លងកូវីដ-១៩សរុប ១,២លានករណីក្នុងនោះជាសះស្បើយ មានជាង១១ម៉ឺននាក់ ខណៈអ្នកស្លាប់មាន៣៥៥៤១នាក់។ ចំណែក អាល្លឺម៉ង់ មានករណីឆ្លងសរុបជាង៤៨,៧ម៉ឺនករណី ក្នុងនោះជាសះស្បើយមានជាង៣៣,៦នាក់ ខណៈអ្នកស្លាប់មានជាង១ម៉ឺននាក់។

បច្ចុប្បន្ន ពិភពលោក មានករណីឆ្លងសរុប ៤៤លានករណី ក្នុងនោះជាង២៩,៨លាននាក់ជាសះស្បើយ ខណៈមានអ្នកស្លាប់១,១៧លាននាក៕