អន្តរជាតិ
×![]()
ដោយ: ធីតា
បុរសអាល្លឺម៉ង់អាយុ៦០ឆ្នាំ ក្លាយជាម្ចាស់កំណត់ត្រាពិភពលោក Guinness World Record ក្នុងនាមជាមនុស្សដែលប្តូររូបរាង វះកាត់ និងចោះសាក់ច្រើនជាងគេបំផុតលើលោក។ នារយៈពេល២០ឆ្នាំចុងក្រោយ លោកបានផ្លាស់ប្តូររូបរាងខ្លួនដល់ទៅ៥១៦លើក។ នេះបើតាមការផ្សាយរបស់ Euro Weekly News។
លោក Rolf Buchholz បានប្រកាសថា ខ្លួនឯងជាបុគ្គលសាធារណៈ ក្រោយមានឈ្មោះក្នុងសៀវភៅ Guinness World Record តាំងពីឆ្នាំ២០១០ មក ដោយកាលណោះ លោកបានចោះដូររូបរាងកាយ ចាក់សាច់ និងដាំបង្គោលផ្សេងៗ ចំនួន៤៥៣លើក។
ក្រោយមិនឈ្មោះល្បីល្បាញ លោក Rolf នៅតែបន្តផ្លាស់ប្តូររូបរាងកាយខ្លួន រហូតសរុបទៅដល់៥១៦លើក ដែលក្នុងនោះមាន ការចោះសាច់៤៨១លើក ដោយ៣៧លើកនៅបរិវេណចិញ្ចើម និង១១១លើកបរិវេណមាត់។ ជាមួយគ្នានេះ លោកបានវះកាត់ដាក់ជាស្នែងចំនួន២លើក ធ្វើអណ្តាតឲ្យព្រែក១លើក និងដាំបង្គោលម៉ាញ៉េទិចលើដៃចំនួន៥លើក។ ការចាក់សាក់គ្របដណ្តប់៩០ភាគរយលើដងខ្លួនរបស់គាត់ទាំងមូល។
លោក Rolf ដែលបម្រើការនៅក្រុមហ៊ុនបច្ចេកវិទ្យាព័ត៌មានមួយនៅអាល្លឺម៉ង់ បានអះអាងថា នៅមុនអាយុ៤០ឆ្នាំ គាត់មិនដែលធ្លាប់ប្តូររូបរាងឡើយ ប៉ុន្តែ២០ឆ្នាំចុងក្រោយនេះ លោកពេញចិត្តយ៉ាងខ្លាំងនូវអ្វីដែលខ្លួនបានធ្វើ។ ទោះបីជាយ៉ាងណាក៏ដោយ លោកបានអះអាងថា៖«ការផ្លាស់ប្តូររូបរាង គឺត្រឹមតែជារូបភាពខាងក្រៅប៉ុណ្ណោះ វាមិនអាចប្តូរខ្ញុំបានឡើយ ព្រោះខ្ញុំនៅតែជាខ្ញុំ»។
បើមិនមានព្រឹត្តិការណ៍រៀបចំណាមួយសម្រាប់លោក ដែលមានការធានាត្រឹមត្រូវទេនោះ លោក Rolf ពិតជាពិបាកធ្វើដំណើរទៅក្រៅប្រទេសតែម្នាក់ឯង ដោយសារមុខមាត់របស់លោក មិនដូចក្នុងរូបថតឯកសារសម្រាប់ធ្វើដំណើរ។ កាលពីឆ្នាំ២០១៤ លោកក៏ត្រូវបានបណ្តេញចេញពីអាកាសយានដ្ឋាន Dubai ផងដែរ៕
© រក្សាសិទ្ធិដោយ thmeythmey.com
«ស្មើរនេះ», «ថ្មើរនេះ» និង«ថ្មារនេះ» មួយណាត្រូវ?
ភ្នំពេញ 1 សប្តាហ៍
