COVID-19
អន្តរជាតិ
មីយ៉ាន់ម៉ារៀបចំបោះឆ្នោតមុខថ្ងៃកំណត់ ដើម្បីទប់ស្កាត់ការរាតត្បាតCOVID-19 លើមនុស្សចាស់ លោកស្រី អ៊ុងសាន ស៊ូជី បោះឆ្នោតនៅក្នុងមណ្ឌលមួយ ក្នុងទីក្រុងណៃពិដោ នៅថ្ងៃទី២៩ ខែតុលា ឆ្នាំ២០២០។ រូបភាព៖ AFP
× មីយ៉ាន់ម៉ា កាលពីថ្ងៃទី២៩ ខែតុលា បានរៀបចំការបោះឆ្នោតមុខថ្ងៃកំណត់នៅតាមមណ្ឌលមួយចំនួន សម្រាប់ប្រជាជន ដែលមានអាយុលើសពី៦០ឆ្នាំ ដើម្បីទប់ស្កាត់ការរាតត្បាតនៃCOVID-19។ ក្នុងការបោះឆ្នោតមុខពេលកំណត់នេះ លោកស្រីអ៊ុងសាន ស៊ូជី រដ្ឋមន្ត្រីការបរទេសមីយ៉ាន់ម៉ា និងប្រធានាធិបតីមីយ៉ាន់ម៉ា លោក U Win Myint ក៏បានចូលរួមផងដែរ។
ស្ថានភាពCOVID-19 នៅមីយ៉ាន់ម៉ា មិនទាន់ធូរស្រាលនៅឡើយទេ ខណៈការបោះឆ្នោតថ្នាក់ជាតិជិតមកដល់។ បញ្ហានេះ គណៈកម្មការជាតិរៀបចំការបោះឆ្នោតសហព័ន្ធ(UEC) បានចេញវិធានការជាច្រើន ដើម្បីបង្ការករណីឆ្លងកើនឡើង ឬផ្ទុះនៅតាមមណ្ឌលបោះឆ្នោត។ បន្ថែមពីលើនេះ ដើម្បីការពារប្រជាជនដែលមានអាយុលើសពី៦០ឆ្នាំ មីយ៉ាន់ម៉ា បានសម្រេចរៀបចំការបោះឆ្នោតមុនថ្ងៃកំណត់សម្រាប់ក្រុមមនុស្សចាស់។
តាមការចុះផ្សាយរបស់ទីភ្នាក់ងារព័ត៌មាន AFP មីយ៉ាន់ម៉ា បានរៀបចំការបោះឆ្នោតមុនថ្ងៃកំណត់នៅមណ្ឌលនៅទូទាំងក្រុងយ៉ាំងហ្គោន និងតំបន់ផ្សេងទៀត ដែលរងការវាយប្រហារដោយសារCOVID-19។ ថ្លែងប្រាប់អ្នកសារព័ត៌មាន ប្រជាជនមីយ៉ាន់ម៉ាវ័យ ៧៣ បានអះអាងថា បើទោះបីជាលោកភ័យខ្លាចឆ្លងCOVID-19 ក៏ដោយ ក៏ការបោះឆ្នោតនៅតែសំខាន់ដដែល។
នៅក្នុងការបោះឆ្នោតនេះ លោកស្រី អ៊ុងសាន ស៊ូជី រដ្ឋមន្ត្រីការបរទេស និងទីប្រឹក្សារដ្ឋមីយ៉ាន់ម៉ា និងប្រធានាធិបតីមីយ៉ាន់ម៉ា លោក U Win Myint ក៏បានចូលរួមក្នុងការបោះឆ្នោតមុនថ្ងៃកំណត់នេះដែរ។ លោកស្រី ស៊ូជី បានបោះឆ្នោតនៅមណ្ឌលក្នុងទីក្រុងណៃពិដោ ខណៈលោកប្រធានាធិបតី ត្រូវបោះឆ្នោតនៅមណ្ឌលក្នុងទីក្រុងយ៉ាំងហ្គោន។
ការបោះឆ្នោតថ្នាក់ជាតិមីយ៉ាន់ម៉ាឆ្នាំ២០២០នេះ មានមនុស្សជាច្រើនជឿថា បក្សរបស់លោកស្រី ស៊ូជី នឹងបន្តឈ្នះដដែល។ កន្លងមក គណៈកម្មការរៀបចំការបោះឆ្នោតមីយ៉ាន់ម៉ា បានហាមប្រជាជននៅក្នុងរដ្ឋRakhine ជាងមួយលាន ក្នុងការបោះឆ្នោត ដោយសារតែបញ្ហាសន្តិសុខ។ បញ្ហានេះ បានរងប្រតិកម្មយ៉ាងខ្លាំងពីបក្សប្រឆាំង និងប្រជាជនក្នុងរដ្ឋRakhine៕
Tag:
មីយ៉ាន់ម៉ា
COVID-19
© រក្សាសិទ្ធិដោយ thmeythmey.com