ជាតិ
សង្គមជាតិ
ក្រសួងអប់រំ រកឃើញសាលារៀនឯកជន ២ទៀត ដែលប្រាស្រ័យទាក់ទងនឹងប្រមុខការទូតហុងគ្រី
×![]()
ក្រសួងអប់រំ យុវជន និងកីឡា រកឃើញគ្រឹះស្ថានសិក្សាឯកជនចំនួន២បន្ថែមទៀត ដែលមានប្រាស្រ័យទាក់ទងនឹងគណ:ប្រតិភូលោក Peter Szijjarto រដ្ឋមន្ត្រីការបរទេស និងពាណិជ្ជកម្មហុងគ្រី ដែលត្រូវបានគេរកឃើញជំងឺកូវីដ-១៩។ នេះតាមការលើកឡើងរបស់ លោក រស់ សុវាចា អ្នកនាំពាក្យក្រសួងអប់រំ ដោយបញ្ជាក់ថា គិតត្រឹមថ្ងៃទី៧វិច្ឆិកានេះ មានគ្រឹះស្ថានសិក្សាឯកជនចំនួន៦ ដែលពាក់ព័ន្ធនឹងគណ:ប្រតិភូនៃប្រទេសហុកគ្រីនោះ មកកម្ពុជា កាលពីថ្ងៃទី៣វិច្ឆិកា ឆ្នាំ២០២០ កន្លងមក។
លោក រស់ សុវាចា បានបញ្ជាក់ប្រាប់សារព័ត៌មានថ្មីៗ(ThmeyThmey)តាមប្រព័ន្ធតេឡេក្រាម នាព្រឹកថ្ងៃទី ៧ វិច្ឆិកានេះ ថា គ្រឹះស្ថានសិក្សាឯកជនដែលជាប់ពាក់ព័ន្ធនឹងគណ:ប្រតិភូនៃប្រទេសហុកគ្រីទាំងនោះ គឺបានផ្អាកដំណើរការសិក្សាក្នុងថ្នាក់រៀន ដោយបន្តការសិក្សាតាមអនឡាញ(Online) ក្នុងរយ:ពេល១៤ថ្ងៃ។
បើតាមអ្នកនាំពាក្យក្រសួងអប់រំរូបនេះ គ្រឹះស្ថានសិក្សាឯកជនទាំង៦នេះ គឺសុទ្ធសឹងដែលបានប៉ះពាល់ជាមួយគណ:ប្រតិភូនៃប្រទេសហុងគ្រី។ គ្រឹះស្ថានសិក្សាទី១៖ មានបុគ្គលិក១រូប, គ្រឹះស្ថានសិក្សាទី២៖ មានសិស្ស២រូបដែលមានឪពុកម្តាយ ដែលបានប៉ះពាល់ជាមួយគណ:ប្រតិភូនៃប្រទេសហុងគ្រី។
គ្រឹះស្ថានសិក្សាទី៣៖ មានសិស្ស២រូបដែលមានឪពុកម្តាយ, គ្រឹះស្ថានសិក្សាទី៤៖ មានសិស្ស២រូបដែលមានឪពុកម្តាយ, គ្រឹះស្ថានសិក្សាទី៥៖ មានសិស្ស២រូបដែលមានឪពុកម្តាយ បានប៉ះពាល់ជាមួយគណ:ប្រតិភូនៃប្រទេសហុងគ្រី។ រីឯគ្រឹះស្ថានទី៦៖ មានសិស្ស២រូបមានឪពុកម្តាយ ដែលបានទទួលទានអាហារជាមួយអ្នកដែលបានប៉ះពាល់នឹងគណ:ប្រតិភូនៃប្រទេសហុងគ្រី។
សូមរម្លឹកថា លោក Peter Szijjarto រដ្ឋមន្ត្រីការបរទេសហុងគ្រី ដែលទើបតែបញ្ចប់ដំណើរទស្សនកិច្ចនៅកម្ពុជា កាលពីថ្ងៃទី៣វិច្ឆិកា គឺត្រូវបានរកឃើញថាមានផ្ទុកកូរ៉ូណាវីរុស(COVID-19) ក្នុងអំឡុងពេលដាក់ចត្តាឡីស័កពេលទៅដល់ប្រទេសថៃ។ គិតត្រឹមថ្ងៃទី៧វិច្ឆិកា ឆ្នាំ២០២០២ កម្ពុជារកឃើញមនុស្សជាង៨០០នាក់ មានជាប់ព័ន្ធពាន់នឹងលោក Peter Szijjarto ដោយក្នុងនោះមានទាំង សម្តេច ហ៊ុន សែន, លោក ប្រាក់ សាខុន រដ្ឋមន្ត្រីការបរទេស និងសហប្រតិបត្តិការអន្តរជាតិ , លោក ប៉ាន សូរស័ក្ដិ រដ្ឋមន្ត្រីក្រសួងពាណិជ្ជកម្ម និងលោក សួស យ៉ារ៉ា សមាជិកសភាកម្ពុជា។ លោក លឹម គានហោ រដ្ឋមន្ត្រីក្រសួងធនធានទឹក និងឧត្តុនិយម និងលោក ម៉ៅ ហាវណ្ណាល់ រដ្ឋមន្ត្រីទទួលបន្ទុករដ្ឋលេខាធិការដ្ឋានអាកាសចរស៊ីវិល ក៏បានជួបលោក Peter Szijjarto រដ្ឋមន្ត្រីការបរទេសហុងគ្រី នៅក្នុងពិធីចុះហត្ថលេខាកិច្ចព្រមព្រៀងរវាងភាគីទាំងពីរ រួមទាំងអ្នកសារព័ត៌មានជាច្រើនរូបផងដែរ៕
Tag:
COVID-19
សាលារៀន
© រក្សាសិទ្ធិដោយ thmeythmey.com
«ប្រេសិត»មានន័យដូចម្តេច?
1 សប្តាហ៍
