ជាតិ
ឯករាជ្យជាតិ អាចស្ថិតនៅគង់វង្ស លុះត្រាខ្មែរសាមគ្គីគ្នា ទិដ្ឋភាពនៃពិធីបុណ្យឯករាជ្យជាតិលើកទី៦៩ឆ្នាំ នៅវិមានឯករាជ្យជាតិ រាជធានីភ្នំពេញ នាព្រឹកថ្ងៃទី៩ ខែវិច្ឆិកា ឆ្នាំ២០២២។
× មិនមែនតែរាជរដ្ឋាភិបាលឡើយ គឺប្រជាពលរដ្ឋខ្មែរគ្រប់រូប មានកាតព្វកិច្ចក្នុងការការពារឯករាជ្យ អធិបតេយ្យ និង បូរណភាពទឹកដី ពោលគឺជាតិមាតុភូមិទាំងមូល។ ដើម្បីអាចការពារជាតិមាតុភូមិបាន លុះត្រាតែប្រជាពលរដ្ឋគ្រប់និន្នាការ មានសាមគ្គីភាព។
ទម្រាំតែកម្ពុជា អាចដកខ្លួនចេញពីនឹមអាណានិគមបារាំង និងទទួលបានឯករាជ្យជាតិមកវិញ មិនមែនជាការងាយស្រួលឡើយ ដោយបុព្វបុរសរបស់យើង ជាពិសេសព្រះបាទ នរោត្តម សីហនុ រួមទាំងឥស្សរជនខ្មែរដទៃទៀត ប្រឹងសស្រាក់សស្រាំនិងតស៊ូយ៉ាងខ្លាំងក្លា។ ដូច្នេះ ក្នុងនាមជាអ្នកជំនាន់ក្រោយ យើង ត្រូវប្រឹងប្រែងថែរក្សាឯករាជ្យជាតិឲ្យបានគង់វង្ស ដោយមិនត្រូវឲ្យបរទេសណាមកបំពានជាដាច់ខាត។
រដ្ឋធម្មនុញ្ញកម្ពុជា ចែងច្បាស់ណាស់ពីការរួមចំណែកទាំងអស់គ្នា ទាំងប្រជាពលរដ្ឋ និងរាជរដ្ឋាភិបាល ក្នុងការការពារប្រទេសជាតិ។ មាត្រា៧ ចែងថា ព្រះមហាក្សត្រ ទ្រង់ជាអ្នកធានាឯករាជ្យជាតិ អធិបតេយ្យ និង បូរាណភាពទឹកដី។ មាត្រា៤៩ ចែងថា ប្រជាពលរដ្ឋខ្មែរគ្រប់រូប មានកាតព្វកិច្ចរួមចំណែកកសាងប្រទេសជាតិ និង ការពារមាតុភូមិ។ មាត្រា៥២ ចែងថា រាជរដ្ឋាភិបាលកម្ពុជា ប្ដេជ្ញារក្សាការពារឯករាជ្យ អធិបតេយ្យបូរណភាពទឹកដី អនុវត្តនយោបាយបង្រួបបង្រួមជាតិ ដើម្បីការពារឯកភាពជាតិ។
ដើម្បីអាចការពារឯករាជ្យជាតិនិងទឹកដីបាន ចាំចាច់ជាតិសាសន៍មួយ ត្រូវតែមានសាមគ្គីនិងការរួបរួមគ្នាជាធ្លុងមួយ ហើយដើម្បីអាចមានសាមគ្គី លុះត្រាតែសង្គមមានយុត្តិធម៌ និងគ្មានការបង្កភាពឈឺចាប់ដល់គ្នានឹងគ្នា។ ម្យ៉ាងទៀត ប្រជាពលរដ្ឋ និងអ្នកនយោយបាយ ត្រូវតម្កល់រឿងជាតិជាធំ។
កុំព្រោះតែគំនុំគុំកួននិងប្រយោជន៍ផ្ទាល់ខ្លួន យើង បែរជាសុខចិត្តទៅចូលដៃចូលជើងជាមួយបរទេសនោះទេ។ តែផ្ទុយមកវិញ យើង ត្រូវរៀនលុបបំបាត់គំនុំគុំកួនជាមួយគ្នាឯងនិងហ៊ានលះបង់ប្រយោជន៍ផ្ទាល់ខ្លួន ដើម្បីការពារជាតិមាតុភូមិ។ ដូនតាយើងជាច្រើនរូប បានបន្សល់ទុកគំរូសម្រាប់យើង ក្នុងការការពារជាតិមាតុភូមិ។ តួយ៉ាង មានឧកញ៉ា សឺន គុយ និង អាចារ្យ ហែម ចៀវ ជាដើម សុទ្ធតែហ៊ានលះបង់ជីវិតដើម្បីទឹកដី។
យើង ត្រូវរួមគ្នាការពារទឹកដី សម្រាប់កូនចៅយើង រស់នៅរាប់ពាន់ឆ្នាំទៅមុខទៀត ដូចដែលដូនតាយើង បានបន្សល់ទុកទឹកដីដល់យើង មកដល់សព្វថ្ងៃនេះ។ ហើយដើម្បីឲ្យជាតិសាសន៍យើង មានសេចក្តីថ្លៃថ្នូរនិងឥស្សរភាព លុះត្រាតែយើង មានឯករាជ្យនិងអធិបតេយ្យភាព មិនស្ថិតក្រោមអំណាចបរទេសណាមួយ។ ដើម្បីកុំឲ្យបរទេស មាក់ងាយ ជិះជាន់ ឈ្លានពាន និង ជះឥទ្ធិពលមកលើឯករាជ្យជាតិរបស់យើងបាន គឺទាមទារឲ្យយើង រួមកម្លាំងគ្នា។
យើង មិនត្រូវភ្លេចពាក្យ «សាមគ្គីរស់ បែកបាក់សាមគ្គីស្លាប់» ឡើយ៕
© រក្សាសិទ្ធិដោយ thmeythmey.com