អន្តរជាតិ
ប្រមុខការទូតស៊ីរី និងជាអ្នកការពាររដ្ឋាភិបាលលោក អាសាដ យ៉ាងមុតមាំ ស្លាប់ក្នុងវ័យ៧៩ឆ្នាំ
លោក Walid al-Moalem រដ្ឋមន្ត្រីការបរទេសស៊ីរីដែលទទួលមរណភាព។ រូបភាព Xinhua
×![]()
លោក Walid al-Moalem រដ្ឋមន្ត្រីការបរទេសស៊ីរី និងជាមនុស្សជំនិតរបស់ប្រធានាធិបតី បាសា អាល់អាសាដ ទទួលអនិច្ចកម្ម នៅថ្ងៃទី១៦ វិច្ឆិកា ក្នុងវ័យ៧៩ឆ្នាំ។ លោក Al-Moalem ត្រូវបានសហគមន៍អន្តរជាតិស្គាល់ថា ជាអ្នកការពាររដ្ឋាភិបាលស៊ីរីយ៉ាងម៉ឺងម៉ាត់ ក្នុងជម្លោះក្នុងស្រុកតាំងពីឆ្នាំ២០១១ ក៏ដូចជាស្វះស្វែងរកការគាំទ្រពីអ៊ីរ៉ង់ និងរុស្ស៊ីដើម្បីស្រោចស្រង់រដ្ឋាភិបាលលោក អាល់អាសាដ អំឡុងពេលសង្គ្រាមស៊ីវិល។
អ្នកការទូតជើងចាស់ Walid al-Moalem កើតនៅឆ្នាំ១៩៤១ នៅទីក្រុងដាម៉ាស ប្រទេសស៊ីរី។ លោកចាប់ផ្តើមបំពេញការងារក្នុងក្រសួងការបរទេសក្នុងឆ្នាំ១៩៦៤ ដោយបំពេញការងារដំបូងនៅបរទេសដូចជានៅតង់សានី អេស្ប៉ាញ អង់គ្លេស និងរូម៉ានី។ លោកបំពេញទទួលតំណែងជាឯកអគ្គរដ្ឋទូតស៊ីរី នៅអាមរិករយៈពេល៩ឆ្នាំចាប់ពីឆ្នាំ១៩៩០។ នៅឆ្នាំ២០០៦ លោកត្រូវបានតែងតាំងជារដ្ឋមន្ត្រីការបរទេស និងជាឧបនាយករដ្ឋមន្ត្រីក្នុងឆ្នាំ២០១២។
យោងតាមទូរទស្សន៍រដ្ឋស៊ីរី ប្រមុខការទូតរូបនេះ ទទួលមរណភាពនៅព្រឹកព្រលឹមថ្ងៃទី១៦ វិច្ឆិកា ហើយសាកសពរបស់លោកនឹងត្រូវបញ្ចុះក្នុងទីក្រុងដាម៉ាសនៅថ្ងៃដដែល។ រដ្ឋាភិបាលស៊ីរីពុំបានបង្ហាញពីមូលហេតុនៃមរណភាពនេះឡើយ ប៉ុន្តែលោក al-Moalem មានសុខភាពមិនល្អ និងមានបញ្ហាបេះដូងជាច្រើនឆ្នាំមកហើយ។
ប្រភពស្និទ្ធរដ្ឋាភិបាលស៊ីរី អះអាងថា លោក Faisal Mekdad អនុរដ្ឋមន្ត្រីការបរទេស និងជាអ្នកការទូតជើងចាស់មួយរូបដែរ នឹងមកទទួលតំណែងរដ្ឋមន្ត្រីដែលនៅទំនេរនេះ។ នេះបើយោងតាមទីភ្នាក់ងារព័ត៌មាន Reuters ។
លោក al-Moalem ត្រូវបានមនុស្សក្នុងរដ្ឋាភិបាលស៊ីរី និងសហគមន៍អន្តរជាតិស្គាល់ថា បុគ្គលដែលមានជំហរតឹងរ៉ឹងទល់នឹងចលនាប្រឆាំងរដ្ឋាភិបាល ជាពិសេសអំឡុងពេលបដិវត្តន៍អារ៉ាប់ក្នុងឆ្នាំ២០១១។ អំឡុងពេលដែលស៊ីរីជួបវិបត្តិនយោបាយ និងសង្គ្រាមស៊ីវិល លោក al-Moalem តែងតែមានមុខក្នុងសន្និសីទសារព័ត៌មាន និងរៀបរាប់យ៉ាងលម្អិតពីជំហររបស់រដ្ឋាភិបាលស៊ីរី។
បន្ថែមពីនេះ លោកក៏មិនសំចៃមាត់ក្នុងការវាយប្រហារតប និងចំអករដ្ឋាភិបាលលោកខាងលិចផងដែរ។ លោកអះអាងថា សង្គ្រាមស៊ីវិលនៅស៊ីរី កើតឡើងដោយសារតែការឃុបឃិតគ្នារវាងប្រទេសលោកខាងលិចដែលចង់រំលំរដ្ឋាភិបាលស៊ីរី ដែលមានជំហរប្រឆាំងអ៊ីស្រាអែល។
ខណៈពេលដែលរដ្ឋាភិបាលប្រធានាធិបតី អាសាដ ចុះខ្សោយខ្លាំង លោក Al-Moalemគឺជាអ្នកស្វះស្វែងរកអន្តរាគមន៍ពីអ៊ីរ៉ង់ និងរុស្ស៊ីដើម្បីស្រោចស្រង់ស្ថានការណ៍ និងដណ្តើមយកមកវិញនូវទឹកដីដែលគ្រប់គ្រងដោយក្រុមភេរវកម្ម និងក្រុមប្រឆាំងរដ្ឋាភិបាលស៊ីរី។ ក្រោយសង្គ្រាមស៊ីវិលផ្ទុះឡើងក្នុងឆ្នាំ២០១១ លោក ជាមនុស្សក្នុងរដ្ឋាភិបាលដែលលើកឡើងពីការចរចាជាមួយក្រុមប្រឆាំង ហើយលោកផ្ទាល់ ជាអ្នកដឹកនាំកិច្ចចចារដំបូងបំផុតជាមួយក្រុមប្រឆាំងក្នុងឆ្នាំ២០១៤។
«លោកត្រូវបានស្គាល់ចំពោះជំហរស្នេហាជាតិដ៏មានកិត្តិយស»។ រដ្ឋាភិបាលស៊ីរីប្រកាសបែបនេះក្នុងសេចក្ដីថ្លែងការណ៍របស់ខ្លួន។ លោក al-Moalem លេចមុខជាសាធារណៈលើកចុងក្រោយនៅថ្ងៃទី១១ វិច្ឆិកា ក្នុងសន្និសីទអន្តរជាតិស្តីពីជនភៀសខ្លួនស៊ីរី ដែលមានរុស្ស៊ីជាសហប្រធាន៕
Tag:
ស៊ីរី
Walid al-Moalem
© រក្សាសិទ្ធិដោយ thmeythmey.com
