ជាតិ
ជនសង្ស័យម្នាក់ ដែលបំផ្លាញរូបសំណាកជាង១០អង្គ លើភ្នំប្រសិទ្ធ នឹងត្រូវបញ្ជូនទៅតុលាការ រូបសំណាក់ដែលត្រូវជនសង្ស័យបំផ្លាញ។ (រូបពីលោក ដូង តេង)
× ភ្នំពេញ៖ សមត្ថកិច្ចនឹងបញ្ជូន បុរសម្នាក់ដែលបានបំផ្លាញរូបសំណាកនៅលើភ្នំប្រសិទ្ធ ក្នុងបរិវេណវត្តភ្នំប្រសិទ្ធត្រៃត្រឹង្សកាល ទៅតុលាការនៅរសៀលថ្ងៃទី១៨ វិច្ឆិកានេះ។ ករណីធ្វើឲ្យខូចខាតបូជនីយដ្ឋានសាសនានេះ សមត្ថកិច្ចសង្ស័យថា ជនសង្ស័យមានស្មារតីមិននឹងនរ បន្ទាប់ពីមានជម្លោះជាមួយប្រពន្ធ។ នេះបើតាមអធិការស្រុកពញាឮ លោក ដួង តេង។
លោក ដួង តេង ថ្លែងប្រាប់សារព័ត៌មានថ្មីៗតាមទូរស័ព្ទនៅព្រឹកថ្ងៃនេះថា ជនបង្កហេតុឈ្មោះ គង់ សំណាង បានជួលឡានដើម្បីឡើងលើភ្នំប្រសិទ្ធកាលពីថ្ងៃទី១៧ វិច្ឆិកានេះ។ លោកអះអាងថា ជនសង្ស័យទំនងជា មានស្មារតីមិននឹងនរ ព្រោះជនបង្កហេតុមានបញ្ហាជាប្រពន្ធនិងមានក្លិនស្រាជាប់ខ្លួន។
«គាត់អាចមានបញ្ហាខួរក្បាល ប៉ុន្តែយើងមិនមានលិខិតបញ្ជាក់ពីពេទ្យអីទេ គ្រាន់តែសន្និដ្ឋាន។ ព្រោះពេលជិះតាក់ស៊ីហ្នឹង គឺបានឈ្លោះគា្នមួយប្រពន្ធ ហើយតាក់ស៊ីអត់ដឹងរឿងអី ក៏ចេះតែដឹកទៅ។ បុរសហ្នឹង គាត់ចង់ទៅអុចធូបលើភ្នំ តាក់ស៊ីក៏ដឹកទៅ ហើយក៏ចូលកន្លែងប្រាសាទហ្នឹង ហើយវាម៉ោងឆ្កួតអីមិនក៏ថា តែគ្មានពេទ្យបញ្ជាក់ទេ ក៏វាយបំផ្លាញរូបសំណាកនៅកន្លែងនោះតែម្ដង»។ នេះបើតាមលោក ដូង តេង ដោយបញ្ជាក់បន្ថែមថា សមត្ថកិច្ចនិងព្រះរាជអាជ្ញាគ្រោងនឹងបញ្ជូន បុរសម្នាក់នេះទៅតុលានៅរសៀលនេះ។
រូបសំណាកដែលត្រូវជនសង្ស័យបំផ្លាញ។
ជាមួយគ្នាដែរ អធិការរូបនេះ បានបញ្ជាក់ថា នៅកន្លែងកើតហេតុគឺឃាត់មនុស្ស២នាក់ ជនបង្កហេតុនិងម្ចាស់ឡានឈ្នួល។ ប៉ុន្តែក្រោយពី សាកសួរឃើញថា ជនបង្កហេតុមានតែម្នាក់ទេ ចំណែកម្ចាស់ឡានឈ្នួលគឺមិនជាប់ពាក់ព័ន្ធទេ។
រូបសំណាកនិងសម្ភារៈដែលរងការបំផ្លាញមាន រូបសំណាកព្រះនាងគ្រប់ល័ក្ខណ៍, រូបសំណាកព្រះនាងពៅ, រូបសំណាកកុមារពេជ្រ, រូបសំណាកព្រះអង្គចេក, ព្រះក្លស្ស៣, រូបសំណាកព្រះនាងទេពប្រណម្យ៤ និងសម្ភារៈក្នុងបរិវេណវត្តជាច្រើនទៀត។
បើតាមលោកស្រី មួង សារឹម ប្រធានមន្ទីរវប្បធម៌និងវិចិត្រសិល្បៈខេត្តកណ្ដាល បញ្ជាក់ប្រាប់សារព័ត៌មានថ្មីៗថា មន្ទីរកំពុងធ្វើរបាយការណ៍ពាក់ព័ន្ធនឹងរូបសំណាក់ដែលរងការខូចខាតនេះ៕
© រក្សាសិទ្ធិដោយ thmeythmey.com