ជាតិ
ភាគីសណ្ឋាគារសូហ្វីតែ លយល់ព្រមដោះស្រាយតាមការតវ៉ារបស់អតីតបុគ្គលិកហើយ ជំនួបរវាងភាគីសណ្ឋាគារសូហ្វីតែល, អតីតបុគ្គលិក និងមន្រី្តក្រសួងការងារ នៅថ្ងៃទី១៨វិច្ឆិកា ២០២០។ (រូបពីលោក ទូច កុសល)
× ភ្នំពេញ៖ វិវាទអតីតបុគ្គលិកសូហ្វីតែលភ្នំពេញភូគីត្រា ត្រូវបានដោះស្រាយតាមការតវ៉ាហើយ ដោយភាគីម្ចាស់សណ្ឋាគារ យល់ព្រមទូទាត់ប្រាក់អតីតភាពការងារមុនឆ្នាំ២០១៩ និងប្រាក់កាត់ទុកសម្រាប់ការបាក់បែកសម្ភារៈឲ្យអតីតបុគ្គលិកទាំង៥៣រូបវិញ។
ប្រធានសហជីពសមគ្គីឯករាជ្យនៃសណ្ឋាគារសូហ្វីតែល លោក ផាត់ សារួន អះអាងថា ភាគីសណ្ឋាគារយល់ព្រមទូទាត់ប្រាក់អតីតភាពការងារមុខឆ្នាំ២០១៩ឲ្យក្រុមពួកគេនៅសប្ដាហ៍ក្រោយ ហើយប្រាក់កាត់ទុក សម្រាប់ការបាក់បែបសម្ភារៈនឹងទូទាត់ នៅចុងខែវិច្ឆិកានេះ។ មន្រី្តក្រសួងការងារ និងបណ្ដុះបណ្ដាលវិជ្ជាជីវៈ ជាអ្នកសម្របសម្រួលលើវិវាទនេះ។
ថ្លែងប្រាប់សារព័ត៌មានថ្មីៗតាមទូរស័ព្ទ នៅថ្ងៃទី១៨ វិច្ឆិកានេះ លោក សារួន បានបញ្ជាក់ថា ៖«ភាគីសណ្ឋាគារបានយល់ព្រមដោះស្រាយឲ្យខ្លះ ប្រាក់អតីតភាពការងារមុនឆ្នាំ២០១៩និងប្រាក់កក់ទុកសម្រាប់ការបាក់បែកសម្ភារៈ។ ហើយចំណុចមួយទៀត ប្រាក់សងជំងឺចិត្ត តាមការសម្របសម្រួលពីក្រសួង ពួកយើងទាំងសងខាងបានឯកភាពមិនគិតគូឡើយ ក្រោមហេតុផលជួបវិបត្តិសេដ្ឋកិច្ច»។
គួរបញ្ជាក់ថា បុគ្គលិកសណ្ឋាគារសូហ្វីតែលភ្នំពេញភូគីត្រា៥៣នាក់ ត្រូវបានបញ្ឈប់ដោយសារវិបត្តសេដ្ឋកិច្ច ក្រោមហេតុផលរងផលប៉ះពាល់ដោយសារកូវីដ-១៩កាលពីថ្ងៃទី១សីហា ឆ្នាំ២០២០។ ហើយវិវាទរវាងភាគីបុគ្គលិកនិងភាគីសណ្ឋាគារក៏បានអូសបន្លាយមក ជាង៣ខែមកហើយ ៕
© រក្សាសិទ្ធិដោយ thmeythmey.com