ជាតិ
សង្គមជាតិ
រដ្ឋាភិបាល បង្កើតគណៈកម្មាធិការជាតិដោះស្រាយបញ្ហាជនអនាថា ដែលដើរសុំទានអនាធិបតេយ្យ
×![]()
ភ្នំពេញ៖ រាជរដ្ឋាភិបាលកម្ពុជាបានបង្កើតគណៈកម្មាធិការជាតិមួយ ដើម្បីដោះស្រាយបញ្ហាជនអនាថា ដែលដើរសុំទានយ៉ាងអនាធិបតេយ្យ នៅតាមសាធារណៈ។ លោក វង សូត រដ្ឋមន្ត្រីក្រសួងសង្គមកិច្ច អតីតយុទ្ធជន និងយុវនីតិសម្បទា ជាប្រធានដឹកនាំក្រុមការងារ ដោះស្រាយបញ្ហាជនអនាថានេះ។
លោក តូច ចាន់នី អ្នកនាំពាក្យក្រសួងសង្គមកិច្ច អតីតយុទ្ធជន និងយុវតីនិសម្បទាបានបញ្ជាក់ប្រាប់អ្នកសារព័ត៌មានថ្មីៗតាមទូរសព្ទថា ការបង្កើតឲ្យមានគណៈកម្មាធិការនេះ គឺដើម្បីប្រមូលជនអនាថាទាំងនោះ មកណែនាំអប់រំ ឲ្យផ្លាស់ប្ដូរជីវិតពីអ្នកសុំទាន មកប្រកបមុខរបរចិញ្ចឹមជីវិតត្រឹមត្រូវ ដោយខ្លួនឯងវិញ។
«គោលដៅរបស់យើងមិនចង់ឲ្យពួកគាត់នៅអនាថាតាមចិញ្ចើមថ្នល់ ដោយពុំមានការគ្រប់គ្រងអ៊ីចឹងទេ។ យើងចង់ឲ្យពួកគាត់មានមុខរបរជាក់លាក់នៅតាមសហគមន៍ កុំឲ្យគាត់ដើរតាមចិញ្ចើមថ្នល់អ៊ីចឹងទៀត»។ នេះជាការរៀបរាប់របស់លោក តូច ចាន់នី។
បើតាមលោក តូច ចាន់នី កម្ពុជាមានជនអនាថា ២ប្រភេទ គឺជនអនាថា ដែលគ្មានទីជម្រកពិតប្រាកដ និងជនអនាថាដែលត្រូវបានគេបង្ខិតបង្ខំឲ្យដើរសុំលុយតាមសាធារណៈ។ លោក តូច ចាន់នីបានរៀបរាប់ដូច្នេះថា៖«ជនអនាថាខ្លះគាត់មកដោយខ្លួនឯង។ ជនអនាថាមួយទៀតបង្កើតជាមុខរបរដើរសុំលុយគេ និងជាការជួញដូរជនអនាថា ឬក្មេងពីណាមក ដើម្បីឲ្យរកលុយឲ្យ ដោយលុយដែលរកបានមកគឺគាត់យក សម្រាប់អ្នកដែលសុំផ្ទាល់គឺបានចំណែកតិចតួចបំផុត»។
លោក តូច ចាន់នី បានបញ្ជាក់ថា កន្លងមកក្រសួងសង្គមកិច្ច និងអ្នកពាក់ព័ន្ធផ្សេងទៀតបានដោះស្រាយលើបញ្ហានេះហើយ ដោយបានឃាត់ខ្លួន អ្នកជួញដូរជនអនាថា និងណែនាំដល់ជនអនាថាឲ្យប្រកបមុខរបរតិចតួច ដើម្បីដោះស្រាយជីវភាព។
តាមរយៈការដោះស្រាយលើបញ្ហាជនអនាថាកន្លងមក ក៏មានជនអនាថាមួយចំនួន បានវិលត្រឡប់មកប្រកបមុខរបរតូចតាចត្រឹមត្រូវ និងមួយចំនួនទៀត នៅតែមានសកម្មភាពដើរសុំទានពលរដ្ឋដដែល។នេះបើតាមអ្នកនាំពាក្យក្រសួងសង្គមកិច្ច៕
Tag:
ជនអនាថា
© រក្សាសិទ្ធិដោយ thmeythmey.com
