ប្រធានប្រតិបត្តិទីក្រុងហុងកុង លោកស្រី ការី ឡាំ នៅថ្ងៃទី១ ខែធ្នូ បានទទូចឲ្យប្រជាជនស្នាក់នៅផ្ទះ ជៀសវាងការជួបជុំផ្សេងៗ និងរក្សាគម្លាតសុវត្ថិភាព ខណៈដែលករណីឆ្លងកូវីដ-១៩ ក្នុងទីក្រុងកើនឡើង។ បើតាមប្រមុខដឹកនាំហុងកុង ក្នុងរយៈពេលប៉ុន្មានសប្តាហ៍ខាងមុខ សំខាន់ណាស់ សម្រាប់ហុងកុង ក្នុងការបញ្ចៀសករណីឆ្លងទ្រង់ទ្រាយធំនៅក្នុងទីក្រុង។
ករណីឆ្លងកូវីដ-១៩ នៅក្នុងទីក្រុងហុងកុង បានហក់ឡើងជាថ្មី។ ទាក់ទិននឹងបញ្ហានេះ រដ្ឋាភិបាលហុងកុង បានចាត់វិធានការមួយចំនួន ដូចជារឹតត្បិតការជួបប្រជុំត្រឹមពីរនាក់ អនុញ្ញាតបុគ្គលិករដ្ឋអាចធ្វើការនៅផ្ទះ បិទសាលារៀន បិទមជ្ឈមណ្ឌលហ្គេមកម្សាន្ត ខារ៉ាអូខេ និងកន្លែងហែលទឹក ចាប់ពីថ្ងៃទី២ ខែធ្នូតទៅ។ រាល់អ្នកល្មើសនឹងបម្រាបទាំងនោះ នឹងត្រូវពិន័យជាប្រាក់រហូតដល់ ៥១៦ដុល្លារ។
បន្ទាប់ពីចំណាត់ការរបស់រដ្ឋាភិបាលហុងកុង ប្រធានប្រតិបត្តិទីក្រុង លោកស្រី ការី ឡាំ ក៏បានអំពាវនាវឲ្យមានការចូលរួមពីប្រជាពលរដ្ឋផងដែរ ដោយសារកូវីដ-១៩ នៅតែជាបញ្ហាបារម្ភដ៏ចម្បង។ លោកស្រី ឡាំ ចាត់ទុករយៈពេលពីរសប្តាហ៍ខាងមុខ ជាពេលដ៏សំខាន់ក្នុងការទប់ស្កាត់រលកឆ្លងលើកទី៤ នៃកូវីដ-១៩ ។
ក្នុងសន្និសីទសារព័ត៌មានប្រចាំសប្តាហ៍នៅថ្ងៃទី១ ខែធ្នូ ប្រមុខដឹកនាំហុងកុងរូបនេះបន្ថែមថា រដ្ឋាភិបាល នឹងដាក់ចេញវិធានការបន្ថែមទៀត ដើម្បីទប់ស្កាត់ករណីឆ្លងនៅក្នុងទីក្រុង។ នេះបើតាមការចុះផ្សាយរបស់ទូរទស្សន៍ចិន CGTN។
ហុងកុង នៅថ្ងៃទី៣០ ខែវិច្ឆិកា បានរាយការណ៍ពីករណីឆ្លងកូវីដ-១៩ ចំនួន ៧៦ករណី ដែលភាគច្រើនជាករណីឆ្លងក្នុងស្រុក។ ករណីឆ្លងកូរ៉ូណាវីរុសរបស់ហុងកុង មានចំនួន ៦៣១៥ករណី និងអ្នកស្លាប់មានចំនួន ១០៩នាក់។ ចំណែកអ្នកជាសះស្បើយមានចំនួន ៥៣៤៤នាក់។
ការកើនឡើងចំនួនករណីឆ្លងក្នុងស្រុក ដែលភាគច្រើនមិនមានប្រភពនេះ ក៏បង្ខំឲ្យហុងកុងបន្តលើកពេលការធ្វើដំណើរជាមួយសិង្ហបុរីជាថ្មីទៀត។ បើតាមអាជ្ញាធរអាកាសចរណ៍សិង្ហបុរី ការអនុញ្ញាតឲ្យធ្វើដំណើរ នឹងត្រូវផ្អាកដល់ដំណាច់ឆ្នាំ២០២០ តែម្ដង ហើយការបើកការធ្វើដំណើរ អាចនឹងមានឬអត់ នឹងត្រូវសម្រេចនៅឆ្នាំក្រោយ ព្រោះ ហុងកុង នៅតែមានករណីឆ្លងក្នុងស្រុកច្រើនដដែល។
កន្លងមក ហុងកុង និងសិង្ហបុរី បានប្រកាសបើកជើងហោះនៅថ្ងៃទី២២ ខែវិច្ឆិកា ប៉ុន្តែការប្រកាសនេះ ត្រូវពន្យារដល់ដើមខែធ្នូ ដោយសារករណីឆ្លងកូវីដ-១៩ ក្នុងក្រុងហុងកុងហក់ឡើង រហូតដល់ដើមខែធ្នូ ករណីកូវីដ-១៩ នៅក្នុងក្រុង នៅតែបន្តមានច្រើនដដែល។
ក្រោមគម្រោងធ្វើដំណើរនេះ អ្នកដំណើរគ្រាន់តែធ្វើតេស្តរកកូវីដ-១៩ ប៉ុណ្ណោះ និងមិនតម្រូវឲ្យមានការដាក់ចត្តាឡីស័កនៅក្នុងប្រទេសមួយទៀតឡើយ។ សិង្ហបុរី ទំនងជាឃើញហានិភ័យនៃការកើនឡើងករណីឆ្លងនៅហុងកុង ទើបបន្តពន្យារពេលធ្វើដំណើរវាងទីក្រុងដ៏សំខាន់ទាំងពីរ៕