ម្ចាស់ហាងកាហ្វេត្រី៖ ដើរក្រោយគេ បើគ្មានក្តីស្រលាញ់ និងខុសប្លែកគេទេនោះ អាជីវកម្មនឹងដួល

ជាតិ

បទសម្ភាសន៍

សេដ្ឋកិច្ច

ម្ចាស់ហាងកាហ្វេត្រី៖ ដើរក្រោយគេ បើគ្មានក្តីស្រលាញ់ និងខុសប្លែកគេទេនោះ អាជីវកម្មនឹងដួល

06, Dec 2020 , 9:19 am

រូបភាព

លោក តួ ស៊ីវ៉ាន់ដេត ម្ចាស់ហាងកាហ្វេត្រី

ដោយ: អ៊ូ សុខមាន (OU Sokmean)

ភ្នំពេញ៖ អាជីវកម្មថ្មីមួយ(Startup)ដែលចាប់ផ្តើមដំណើរការ ម្ចាស់អាជីវកម្ម មិនត្រូវរំពឹងនឹងទទួលបានផលមកវិញភ្លាមៗនោះទេ។ នេះជាការលើកឡើងរបស់លោក តួ ស៊ីវ៉ាន់ដេត ម្ចាស់ហាងកាហ្វេត្រី ដោយបន្តថាម្ចាស់អាជីវកម្ម ត្រូវសម្លឹងមើលរយៈពេលវែងមួយណា ដើម្បីឱ្យផលិតផលខ្លួនមានការទទួលស្គាល់ពីអតិថិជន។ ម្ចាស់ហាងកាហ្វេត្រីដែលទើបដំណើរប្រមាណ៦ខែរូបនេះ បានបន្ថែមដូច្នេះ៖«ហាងកាហ្វេយើងចូលទីផ្សារក្រោយគេ បើបង្កើតឡើងដោយគ្មានក្តីស្រលាញ់ និងលក្ខណៈពិសេសខុសពីគេនោះទេ មិនយូរទេយើងនឹងដួល»។

ដើម្បីជ្រាបច្បាស់សូមអញ្ជើញលោក-អ្នក អានបទសម្ភាសរវាងលោក តួ ស៊ីវ៉ាន់ដេត ម្ចាស់ហាងកាហ្វត្រី ជាមួយកញ្ញា អ៊ូ សុខមាននៃសារព័ត៌មានថ្មីៗ ខាងក្រោមដូចតទៅ៖

កញ្ញា អ៊ូ សុខមាន៖ ហេតុអ្វីបានជាលោកបើកហាងកាហ្វេដែលមានពោរពេញទៅដោយការលម្អត្រីក្រឹមគ្រប់ប្រភេទក្នុងបរិវេណហាងបែបនេះ?

លោក តួ ស៊ីវ៉ាន់ដេត៖ ការសម្រេចចិត្តបើកហាងកាហ្វេត្រីនេះ ព្រោះខ្ញុំចង់ឱ្យអតិថិជនគ្រប់រូបក្រៅពីបានទទួលទានកាហ្វេដែលមានរសជាតិឆ្ងាយហើយនោះ គឺបានស្គាល់នូវប្រភេទត្រីនីមួយៗដ៏ស្រស់ស្អាតមានពណ៌ដ៏ឆើតឆាយ។ លើសពីនេះទៅទៀត អតិថិជនក៏អាចទទួលបាននូវចំណេះដឹង ឬរបៀបនៃការចិញ្ចឹមត្រីក្រឹមដោយឥតគិតថ្លៃ ផងដែរ។ លោក បានបញ្ជាក់ថា រសជាតិនៃកាហ្វេពីហាងមួយទៅហាងមួយ គឺមិនខុសគ្នាប៉ុន្មានទេ ប៉ុន្តែអ្វីដែលខុសពីគ្នានេះ គឺបរិយាកាស ចំណេះដឹង និងសេវាកម្មផ្តល់ជូនអតិថិជន។

កញ្ញា អ៊ូ សុខមាន៖ មានហាងកាហ្វេជាច្រើនបានបើក ហើយក៏បានបិទទៅវិញ តើកត្តាអ្វីដែលជំរុញលោកក្នុងការសម្រេចចិត្តបើកហាងកាហ្វេនេះឡើង? ពិសេសនៅក្នុងដំណាក់កាលប្រឈមនឹងវិបត្តិសេដ្ឋកិច្ច ដោយសារតែជំងឺឆ្លងរាលដាលកូវីដ-១៩ នាបច្ចុប្បន្ន?

លោក តួ ស៊ីវ៉ាន់ដេត៖ ខ្ញុំមានបំណងបើកហាងកាហ្វេត្រីនេះ មុនកម្ពុជា និងពិភពលោកជួបនឹងវិបត្តិកូវីដ-១៩នេះទៅទៀត។ កត្តាដែលជំរុញឱ្យខ្ញុំបើកហាងកាហ្វេត្រីក្នុងដំណាក់កាលកូវីដ-១៩នេះ ពីព្រោះមិនចង់ពន្យារពេលកាន់តែយូរក្នុងការឱ្យអតិថិជន ឬពលរដ្ឋស្គាល់ពីហាងកាហ្វេមួយនេះ ថាមានអ្វីខ្លះ និងមានលក្ខណៈខុសប្លែកអ្វីខ្លះពីហាងកាហ្វេគេដទៃនៅរាជធានីភ្នំពេញ។ ហាងកាហ្វេត្រីដែលបើកឡើងក្នុងដំណាក់កាលកូវីដ-១៩នេះ លោក ស៊ីវ៉ាន់ដេត មិនរំពឹងនឹងទទួលបានអតិថិជនឬភ្ញៀវច្រើនមកចូលហាងកាហ្វេមួយនេះ ប៉ុន្តែលោកសង្ឃឹម មានមនុស្សស្គាល់ឈ្មោះហាងកាហ្វេត្រីនៅលើបណ្តាញសង្គមនានា(Facebook, Tik Tok…)។

កញ្ញា អ៊ូ សុខមាន៖ កាហ្វេត្រីនេះ មានត្រីក្រឹមប៉ុន្មាន? ជាប្រភេទត្រីក្រឹមក្នុងស្រុក ឬនាំចូលពីបរទេស?

លោក តួ ស៊ីវ៉ាន់ដេត៖ ត្រីក្រឹមមានចម្រុះពណ៌គ្នា(ក្រហម, លឿន, ប្រាក់, ស...)ដែលយើងចិញ្ចឹមក្នុងទូកញ្ចក់តូច-ធំ នៅក្នុងហាងកាហ្វេនេះ មានជាង៣០ប្រភេទ ដោយតម្លៃចាប់ពី០,៥០ដុល្លារ រហូតដល់១០០ដុល្លារក្នុងមួយក្បាល។ ត្រីទាំងនេះ ជាប្រភេទត្រីនាំចូលពីបរទេសទាំងអស់។ លោកបានបញ្ជាក់ថា ចំណុចពិសេសនៃការបង្កើតត្រីនេះឡើង គឺដើម្បីឱ្យប្រជាពលរដ្ឋខ្មែរបានស្គាល់នូវត្រីស្អាតៗ ដែលខុសប្លែកពីត្រីក្នុងស្រុក។

កញ្ញា អ៊ូ សុខមាន៖ តើបើកហាងកាហ្វេ ដោយផ្សារភ្ជាប់នឹងការចិញ្ចឹមត្រីនេះ អាចជួយដល់ដំណើរការអាជីវកម្មរបស់លោកបានកម្រិតណា ខណៈមានកាហ្វេជាច្រើនរីកដុះដូចផ្សិតកំពុងប្រកួតប្រជែងគ្នា?

លោក តួ ស៊ីវ៉ាន់ដេត៖ ខ្ញុំជាមនុស្សស្រលាញ់ និងចូលចិត្តចិញ្ចឹមត្រីក្រឹម តាំងពីកុមារ ហើយខ្ញុំចង់ផ្សារភ្ជាប់វាជាមួយរុក្ខជាតិ ដើម្បីឱ្យមានការទាក់ទាញកាន់តែខ្លាំងនៅក្នុងហាងកាហ្វេត្រីដែលទើបដំណើរការបានប្រមាណកន្លះឆ្នាំមកនេះ។ បច្ចុប្បន្ន កុំថាឡើយនៅហាងកាហ្វេដទៃ សូម្បីតែនៅកម្ពុជា ការចិញ្ចឹមត្រីដោយផ្សារភ្ជាប់ជាមួយរុក្ខជាតិដើម្បីកម្សាន្ត និងទស្សនាភាពស្រស់ស្អាតនៃត្រី គឺមិនទាន់ទូលំទូលាយដូចប្រទេសជិតខាងឡើយ។ ដូច្នេះហើយការបង្កើតហាងកាហ្វេដោយភ្ជាប់នឹងការចិញ្ចឹមត្រីដែលជាក្តីស្រលាញ់របស់ខ្ញុំ នឹងធ្វើឱ្យអាជីវកម្មមួយនេះដំណើរការបានយ៉ាងរលូត តាមពលរដ្ឋដឹងថានៅស្រុកខ្មែរក៏មានហាងកាហ្វេល្អប្លែក ដោយផ្សារភ្ជាប់នឹងកសិកម្ម និងបរិស្ថានដូចនៅបរទេស ទោះបីការរៀបចំនេះមិនទាន់ពេញស្តង់ដារនិងលក្ខណៈស្អាតឥតខ្ចោះដូចគេក៏ដោយ៕