ក្រសួងប្រៃសណីយ៍បានចេញសេចក្ដីជូនដំណឹងថា ក្រសួងបានសហការជាមួយប្រតិបត្តិករទូរស័ព្ទចល័តទាំងអស់ រៀបចំយន្តការដាក់ឲ្យដំណើរការលេខកូដ*1200# ដើម្បីឲ្យអ្នកប្រើប្រាស់អាចពិនិត្យនិងផ្ដាច់រាល់សេវាកម្មបន្ថែមណាមួយ ដែលមិនមែនជាតម្រូវការប្រើប្រាស់ជាដើម។ ជាមួយគ្នាដែរ ក្រសួងប្រៃសណីយ៍ បញ្ជាក់ថា ពលរដ្ឋភាគច្រើនដែលជួបបញ្ហាកាត់ទឹកប្រាក់ គឺជាប់ពាក់ព័ន្ធនឹងសេវាកម្មប្រភេទឌីជីថល ក្នុងនោះមានដូចជា សេវាហោរាសាស្រ្ត, សេវាស្វែងរកការងារ, បណ្ដាញទំនាក់ទំនងសង្គម, ហ្គេម, Missed Call Alert និង សេវា Call Tune ជាដើម។

ការបង្កើតលេខកូដនេះឡើង គឺដោយសារក្រសួងប្រៃសណីយ៍ សង្កេតឃើញពលរដ្ឋតែងត្អូញត្អែរពីបញ្ហាកាត់ទឹកប្រាក់ក្នុងប្រព័ន្ធទូរស័ព្ទដោយពុំដឹងមូលហេតុ ដែលបណ្ដាលមកពីការភ្ជាប់សេវាកម្មផ្សេងៗ។

ក្រសួងប្រៃសណីយ៍ ក៏បានផលិតវីដេអូមួយដែរ ដើម្បីពន្យល់របៀបប្រើលេខកូដ *1200# ក្នុងការផ្តាច់សេវាកម្មណាមិនចាំបាច់៕