ច្បាប់ / សិទិ្ធមនុស្ស / តុលាការ
ជាតិ
លីកាដូ៖ ៣ឆ្នាំនេះ CPP អនុម័តច្បាប់ និងចាប់ខ្លួនអ្នកតស៊ូមតិច្រើន តែរដ្ឋាភិបាលថា ជាការចោទគ្មានមូលដ្ឋាន
×![]()
ដោយ: ឡាយ សុភាវតី
ភ្នំពេញ៖ អង្គការសម្ព័ន្ធខ្មែរជំរឿន និងការពារសិទ្ធិមនុស្ស លីកាដូ ថា គណបក្សកាន់អំណាច បានប្រើប្រាស់រដ្ឋសភានិងព្រឹទ្ធសភា ដើម្បីអនុម័តឬរៀបចំច្បាប់ជាច្រើន ផ្ដល់អំណាចស្ទើរតែគ្មានដែនកំណត់ទៅរដ្ឋាភិបាល។ លើសពីនេះ ក៏មានការចាប់និងឃុំខ្លួន អ្នកដែលហ៊ានក្រោកឈរតស៊ូមតិ ដើម្បីសិទ្ធិសេរីភាពទៀតផង។ រដ្ឋាភិបាល ចាត់ទុករបាយការណ៍លីកាដូ ជាការចោទប្រកាន់គ្មានមូលដ្ឋាន។
៣ឆ្នាំចុងក្រោយនេះ អង្គការលីកាដូ សង្កេតឃើញអាជ្ញាធរធ្វើទុក្ខបុកម្នេញលើអ្នកការពារសិទ្ធិមនុស្ស ,តុលាការរំលាយគណបក្សប្រឆាំង និងរឹតត្បិតសេរីភាពសកម្មជនកាន់តែខ្លាំង។ ជាពិសេស នៅអំឡុងពេល៦ខែចុងក្រោយនេះ ការបង្ក្រាបសកម្មជនដែលក្រោកឈរតស៊ូមតិជាមួយរដ្ឋាភិបាល កើនឡើងគួរឲ្យកត់សម្គាល់។
មិនតែប៉ុណ្ណោះគណបក្សប្រជាជនកម្ពុជា ក៏បានរៀបចំ និងអនុម័តច្បាប់ជាច្រើន ដែលមានលក្ខណៈរឹតត្បិតសិទ្ធិសេរីភាព រួមមាន វិសោធនកម្មរដ្ឋធម្មនុញ្ញ ច្បាប់ស្ដីពីការគ្រប់គ្រងប្រទេសក្នុងភាពអាសន្ន សេចក្ដីព្រាងច្បាប់ស្ដីពីសណ្ដាប់ធ្នាប់សាធារណៈ, សេចក្ដីព្រាងច្បាប់ស្ដីពីបទល្មើសបច្ចេកវិទ្យាព័ត៌មាន, អនុក្រឹត្យស្ដីពីច្រកទ្វារអ៊ីនធឺណេតជាតិជាដើម។ នេះបើតាមរបាយការណ៍អង្គការលីកាដូ។
អង្គការលីកាដូ សង្កត់ធ្ងន់ថា ការអនុម័តនិងរៀបចំយ៉ាងច្រើនបែបនេះ ដោយសារគណបក្សកាន់អំណាចកាន់កាប់អាសនទាំង១២៥ នៅរដ្ឋសភា ដោយគ្មានអ្នកប្រឆាំងឡើយ។ «គណបក្សកាន់អំណាច បានប្រើប្រាស់រដ្ឋសភា និងព្រឹទ្ធសភា ដើម្បីអនុម័ត ឬរៀបចំនូវច្បាប់ជាច្រើន ដែលបានផ្ដល់អំណាចស្ទើរតែគ្មានដែនកំណត់ទៅរាជរដ្ឋាភិបាល ក្នុងការចាប់ខ្លួន និងឃុំខ្លួនអ្នកដែលហ៊ានក្រោកឈរតស៊ូមតិ ដើម្បីសិទ្ធិរបស់អ្នកទាំងនោះ»។ នេះជាការលើកឡើងរបស់លីកាដូ នៅក្នុងរបាយការណ៍មួយស្ដីពី ការតស៊ូដើម្បីសេរីភាព ៖ «ការរំលោភបំពានអ្នកការពារសិទិ្ធមនុស្ស ២០១៨-២០២០»។
ជាមួយគ្នានេះ លីកាដូ ស្នើឲ្យរដ្ឋាភិបាលដោះលែងអ្នកការពារសិទ្ធិមនុស្ស ដែលកំពុងជាប់ឃុំនៅពន្ធនាគារ និងបញ្ឈប់ការប្រើប្រាស់កងកម្លាំង ឬសន្តិសុខខណ្ឌបង្ក្រាបលើអ្នកតវ៉ា។ លីកាដូ ក៏ស្នើឲ្យរដ្ឋាភិបាលធ្វើវិសោធនកម្មច្បាប់វិញ ត្រង់ក្រមព្រហ្មទណ្ឌ មាត្រានៃបទញុះញង់ និងបរិហារកេរ្តិ៍, ច្បាប់គ្រប់គ្រងប្រទេសក្នុងភាពអាសន្ន, ច្បាប់ស្ដីពីសមាគមនិងអង្គការមិនមែនរដ្ឋាភិបាល និងច្បាប់សហជីពពាណិជ្ជកម្មជាដើម។
សារព័ត៌មានថ្មីៗ មិនអាចសុំការបកស្រាយពីភាគីរដ្ឋាភិបាល ជុំវិញរបាយការណ៍លីកាដូនេះទេ ដោយលោក ផៃ ស៊ីផាន អ្នកនាំពាក្យរដ្ឋាភិបាល សុំឲ្យទាក់ទងទៅលោក ជិន ម៉ាលីន អ្នកនាំពាក្យក្រសួងយុត្តិធម៌ និងអនុប្រធានគណៈកម្មាធិការសិទ្ធិមនុស្សកម្ពុជា។
លោក ជិន ម៉ាលីន ថ្លែងប្រាប់សារព័ត៌មានថ្មីៗតាមទូរស័ព្ទថា ការចោទប្រកាន់របស់អង្គការសង្គមស៊ីវិលគឺគ្មានមូលដ្ឋានផ្លូវច្បាប់ ពោលគឺគ្រាន់តែសន្និដ្ឋានត្រឹមរូបភាពប៉ុណ្ណោះ ។ លោក ទទួលស្គាល់ថា ការរៀបចំតាក់តែងច្បាប់មិនថា នៅកម្ពុជាឬប្រទេសណាទេ គឺគ្មានច្បាប់ល្អឥតខ្ចោះឡើយ ប៉ុន្តែអ្វីដែលសំខាន់នោះ គឺផ្តល់ប្រយោជន៍សាធារណៈ។
«ការរៀបចំច្បាប់ យើងទទួលស្គាល់ថា ច្បាប់គ្រប់ប្រទេសទាំងអស់គ្មានច្បាប់ណាមួយល្អឥតខ្ចោះនោះទេ ប៉ុន្តែយើងចាំបាច់ត្រូវមានច្បាប់ យើងនឹងធ្វើការកែសម្រួលឲ្យមានលក្ខណៈកាន់តែប្រសើរឡើងថែមទៀត ហើយការធ្វើច្បាប់មិនមែនក្នុងការរឹតត្បិតសិទ្ធិសេរីភាពណាមួយទេ គឺដើម្បីសាធារណៈសង្គមជាទូទៅ»។ នេះបើតាមការលើកឡើងរបស់លោក ជិន ម៉ាលីន ដោយបញ្ជាក់បន្ថែមថា ប្រសិនបើច្បាប់ណាមួយមានភាពខ្វះចន្លោះឬមិនច្បាប់លាស់កន្លែងណា នឹងមានការកែសម្រួលតាមក្រោយបន្ថែមទៀត។
រីឯការអនុវត្តន៍ច្បាប់វិញ លោក ជិន ម៉ាលីន អះអាងថា អាជ្ញាធរអនុវត្តលើអ្នកប្រព្រឹត្តខុសច្បាប់ ដោយមិនប្រកាន់និន្នាការឡើយ។«ការឃាត់ខ្លួន ការចោទប្រកាន់(សកម្មជនសិទ្ធិមនុស្ស) មិនមែនដោយសារពួកគាត់ធ្វើសកម្មភាពការពារសិទ្ធិមនុស្សទេ គឺដោយការធ្វើបំពានច្បាប់ មានមូលដ្ឋាន បង្កើតទៅជាបទល្មើស»។ នេះជាការអះអាងរបស់អ្នកនាំពាក្យក្រសួងយុត្តិធម៌៕
Tag:
សិទ្ធិមនុស្ស
លីកាដូ
© រក្សាសិទ្ធិដោយ thmeythmey.com
«ប្រេសិត»មានន័យដូចម្តេច?
1 សប្តាហ៍
