ដើម្បីធ្វើឱ្យអាជីវកម្មរបស់អ្នកមានភាពលេចធ្លោ អ្នកត្រូវការគេហទំព័រដែលមានគុណភាពខ្ពស់ ព្រមទាំងអាចទាក់ទាញអ្នកទស្សនាឱ្យកាន់តែច្រើន និងអាចរក្សាទំនាក់ទំនងអាជីវកម្មរបស់អ្នក ជាមួយអតិថិជននាពេលអនាគត»។ នេះជាប្រសាសន៍របស់ លោក ឆេង លឹមឃាន់ អ្នកបង្កើតគេហទំព័រនៅក្រុមហ៊ុន KOUPREY Creative Solutions។
ជាទូទៅ ដើម្បីស្វែងរកព័ត៌មាន ដែលគួរឱ្យទុកចិត្តអំពីផលិតផលអ្វីមួយ មនុស្សភាគច្រើនទំនងជាស្វែងរក និងទិញតាមរយៈគេហទំព័រ ច្រើនជាងតាមរយៈបណ្តាញផ្សព្វផ្សាយសង្គម។ សព្វថ្ងៃនេះ បើទោះបីជាបណ្តាញផ្សព្វផ្សាយសង្គម កំពុងតែពេញនិយមក៏ដោយ គេហទំព័រនៅតែជាផ្នែកមួយយ៉ាងសំខាន់ នៃទីផ្សារអាជីវកម្ម ពីព្រោះវាគឺជាទីកន្លែង ដែលផ្តល់ព័ត៌មានជាក់លាក់អំពីសេវាកម្ម និងផលិតផលរបស់អ្នក។ សំខាន់ជាងនេះទៅទៀត ប្រសិនបើគេហទំព័ររបស់អ្នក មានភាពទាក់ទាញ និងលេចធ្លោ នោះអតិថិជន នឹងមានការទុកចិត្តកាន់តែខ្លាំងលើអាជីវកម្មរបស់អ្នក។
ទោះយ៉ាងណា លោក ឆេង លឹមឃាន់ អ្នកបង្កើតគេហទំព័រនៅ KOUPREY Creative Solutions បានលើកឡើងថា អាជីវកម្មនៅកម្ពុជា កំពុងតែមានការប្រឈមនឹងបញ្ហាធំ ក្នុងការបង្កើតគេហទំព័រ ឱ្យមានគុណភាពខ្ពស់ជាច្រើនដូចជា៖ គុណភាពនៃមាតិកា រយ:ពេលនៃការផ្ទុកគេហទំព័រ ភាពបត់បែនលើអេក្រង់ទូរស័ព្ទ SEO និងសុវត្ថិភាពជាដើម។ ដូច្នេះថ្មីៗ នេះក្រុមការងារយើងបានជជែកពិភាក្សា ជាមួយនឹងលោក លឹមឃាន់ អំពីចំណុចសំខាន់ៗ ដើម្បីវាស់ស្ទង់ថាតើ ត្រូវធ្វើយ៉ាងដូចម្តេច ដើម្បីឱ្យគេហទំព័រមានគុណភាពល្អ ហើយម្ចាស់អាជីវកម្ម អាចស្វែងយល់បន្ថែមអំពីរបៀប និងគន្លឹះក្នុងការបង្កើត និងគ្រប់គ្រងគេហទំព័រ ដែលមានគុណភាព និងប្រសិទ្ធភាពខ្ពស់។
១. បង្កើតការរចនាគួរឱ្យចាប់អារម្មណ៍៖
រូបរាងនៃគេហទំព័ររបស់អ្នក ត្រូវមានភាពទាក់ទាញ និងងាយស្រួលប្រើប្រាស់ ដើម្បីទាក់ទាញចំណាប់អារម្មណ៍របស់អតិថិជន។ ដូចគ្នានេះផងដែរ លោក លឹមឃាន់ បានមានប្រសាសន៍ថា «នៅលើគេហទំព័ររបស់អ្នក គួរតែមើលទៅស្របគ្នាដូចជា៖ ការប្រើប្រាស់ពុម្ពអក្សរ គម្លាត ជាយនៃទំព័រ ពណ៌ ទំហំ និងដំណើរការទាំងស្រុង នៃគេហទំព័ររបស់អ្នក។ ដូច្នេះទាំងនេះ ពិតជាអាចទាក់ភ្នែកអ្នកទស្សនា ឱ្យចូលមើលគេហទំព័ររបស់អ្នក ឬក៏ចាកចេញដោយផ្អែកលើរូបរាង នៃគេហទំព័ររបស់អ្នក។ ម្យ៉ាងវិញទៀត ប្រសិនបើគេហទំព័ររបស់អ្នក អាចធ្វើឱ្យអតិថិជនជាប់ចិត្តនោះ ពួកគេនឹងចំណាយពេលច្រើន ដើម្បីមើលផលិតផលផ្សេងៗទៀត។»
លើសពីនេះទៅទៀត ដើម្បីទទួលបានគេហទំព័រគួរឱ្យចាប់អារម្មណ៍ អ្នកបង្កើតគេហទំព័រគួរតែស្វែងយល់ ពីគោលដៅអតិថិជន និងនិន្នាការថ្មីៗ នៃការរចនាគេហទំព័រ។ នៅពេលអតិថិជនចូលទៅកាន់គេហទំព័ររបស់អ្នក ពួកគេរំពឹងថា នឹងទទួលបាននូវអ្វីដែលពួកគេចង់បាន។ ដូច្នេះអ្នកត្រូវយល់ពីអតិថិជនរបស់អ្នកឱ្យច្បាស់ និងបំពេញសេចក្តីត្រូវការរបស់ពួកគេ។
២. បង្កើតការអំពាវនាវឱ្យធ្វើសកម្មភាព (Call-To-Action) ៖
គោលបំណងនៃអាជីវកម្មនីមួយៗ គឺចង់បង្កើននៃការលក់ ដូច្នេះនៅលើគេហទំព័ររបស់អ្នក ត្រូវតែបញ្ចូលនូវមុខងារ អំពាវនាវឱ្យធ្វើសកម្មភាព ឬ “Call-To-Action” ដោយបង្កើតប៊ូតុងមួយឱ្យមានភាពលេចធ្លោ និងដាក់នៅទីតាំងល្អ ដែលមានភាពទាក់ទាញនៅលើគេហទំព័រ ដើម្បីឱ្យអតិថិជនងាយស្រួលកត់សម្គាល់ នេះគឺជាយុទ្ធសាស្ត្រ ដែលល្អបំផុតសម្រាប់ទីផ្សារអាជីវកម្មរបស់អ្នក ក្នុងការទាក់ទាញអតិថិជនកាន់តែច្រើន។
លោក លឹមឃាន់ បានស្នើថា៖ «ដើម្បីទទួលបានប្រសិទ្ធភាព ជាមួយយុទ្ធសាស្ត្រមួយនេះ អ្នកគួរប្រើប្រាស់ពាក្យ (សរសេរអត្ថបទខ្លីៗ) និងពណ៌ឱ្យបានត្រឹមត្រូវ។ សម្រាប់ការសរសេរអត្ថបទខ្លីៗ អ្នកត្រូវប្រើពាក្យ ដែលបង្ហាញពីអារម្មណ៍ជាក់លាក់មួយ។ ចំណែកឯពណ៌វិញ វានឹងជួយបង្ហាញពីភាពលេចធ្លោនៃរូបរាងរបស់គេហទំព័ររបស់អ្នក។»
លើសពីនេះទៅទៀត លឹមឃាន់ ក៏បានពន្យល់ផងដែរថា ការអំពាវនាវឱ្យធើ្វសកម្មភាព ឬ Call-to-Action គឺជាប៊ូតុង ឬតំណភ្ជាប់មួយ ដែលនាំអតិថិជនទៅកាន់គេហទំព័រដើម នៃអាជីវកម្មរបស់អ្នក ដើម្បីឱ្យអតិថិជនយល់ដឹងបន្ថែមនូវព័ត៌មាន នៃម៉ាកយីហោរបស់អ្នក ហើយទិញផលិតផលរបស់អ្នកភ្លាមៗផងដែរ។ និយាយម្យ៉ាងទៀត អតិថិជនរបស់អ្នក ក៏អាចបំពេញទម្រង់បែបបទតាម Online ដែលអ្នកអាចប្រមូលព័ត៌មានទាំងនោះ ឱ្យក្រុមការងារផ្នែកលក់ ឬអតិថិជនរបស់អ្នក ក៏អាចស្នើសុំឱ្យក្រុមការងាររបស់អ្នកទូរស័ព្ទ ឬផ្ញើសារទៅពួកគេផងដែរ។
៣. ពាក្យគន្លឹះសំខាន់ៗ៖
គេហទំព័រល្អប្រណិត តែងតែបង្កប់នូវពាក្យគន្លឹះល្អៗ ដែលជួយអ្នកឱ្យសម្រេចបានគោលដៅនៃអាជីវកម្មរបស់អ្នក ពីព្រោះវាអាចជួយឱ្យមាតិការបស់អ្នកលេចឡើង នៅលើ search engine result ដែលទាក់ទាញអ្នកទស្សនាបានច្រើន ឱ្យចូលទៅកាន់គេហទំព័ររបស់អ្នក។ ដើម្បីបង្កើតមាតិកា ដែលជំរុញឱ្យអ្នកទស្សនាចូលក្នុងគេហទំព័រកាន់តែច្រើន អ្នកត្រូវស្វែងយល់ពីតម្រូវការរបស់អ្នកទស្សនា ហើយត្រូវដឹងថាពាក្យណា ដែលពួកគេតែងតែនិយមស្វែងរកនៅលើ search engine ។
៤. ល្បឿននៃប្រតិបត្តិការរបស់គេហទំព័រ៖
ល្បឿននៃប្រតិបត្តិការរបស់គេហទំព័រ គឺជាធាតុសំខាន់ ដើម្បីវាស់ស្ទង់ដំណើរការរបស់គេហទំព័រ។ ប្រសិនបើអ្នកមានបញ្ហា ជាមួយគេហទំព័រដំណើរការយឺត អ្នកត្រូវបង្កើនប្រសិទ្ធភាព និងស្វែងរកបញ្ហារបស់វា ពីព្រោះប្រសិនបើគេហទំព័រដំណើរការយឺត នោះអតិថិជនរបស់អ្នកនឹងមិនមានពេលច្រើន ដើម្បីរង់ចាំការចូលទៅកាន់គេហទំព័ររបស់អ្នកទេ ហើយពួកគេអាចនឹងចាកចេញពីគេហទំព័ររបស់អ្នកភ្លាមៗ ផងដែរ។
សំខាន់ជាងនេះទៅទៀត លោក លឹមឃាន់ បញ្ជាក់ថា៖ «ល្បឿននៅលើគេហទំព័ររបស់អ្នក អាចនឹងប៉ះពាល់យ៉ាងខ្លាំង ដល់អត្រានៃប្រតិបត្តិការ នៃគេហទំព័ររបស់អ្នក។ ដើម្បីបង្កើនល្បឿនប្រតិបត្តិការរបស់គេហទំព័រ អ្នកគួរតែបង្រួមទំហំឯកសារ ក៏ដូចជារូបភាពរបស់អ្នក ហើយចៀសវាងការប្រើប្រាស់វីដេអូ ដែលមានទំហំធំនៅលើគេហទំព័រ។ ដូចគ្នានេះដែរ ការប្រើប្រាស់ការរចនាបែបសាមញ្ញ ដែលមានប្រសិទ្ធភាព នឹងជួយកែលម្អល្បឿននៃគេហទំព័ររបស់អ្នក»។
៥. ការស្រួលរុករកពីទំព័រមួយទៅទំព័រមួយ (Navigation)៖
គេហទំព័រ ដែលត្រូវបានរចនាយ៉ាងល្អប្រណិត ទាមទារឱ្យមានដំណើរការល្អនៃតំបន់ ដែលមានព័ត៌មានច្បាស់លាស់ ឬគោលការណ៍ណែនាំ ដែលអាចឱ្យអ្នកទស្សនាចូ លក្នុងគេហទំព័ររបស់អ្នក ដើម្បីស្វែងយល់បន្ថែមអំពីផលិតផល និងសេវាកម្មរបស់អ្នកដោយគ្មានការរំខាន។ សំខាន់ជាងនេះទៅទៀត ប្រសិនបើអ្នកទស្សនាអាចរុករកនៅលើគេហទំព័ររបស់អ្នកបានរហ័ស search engine នឹងកំណត់ចំណាត់ថ្នាក់គេហទំព័ររបស់អ្នក ថាជាគេហទំព័រ ដែលដំណើរការល្អជាងគេ។ គេហទំព័ររបស់អ្នក នឹងលេចចេញនៅលើគេក្នុង Google Search ដែលផ្តល់អត្ថប្រយោជន៍ដល់គេហទំព័ររបស់អ្នក។
៦. សុវត្ថិភាពខ្ពស់៖
ដោយសារតែមានការអភិវឌ្ឍយ៉ាងឆាប់រហ័ស នៃប្រព័ន្ធបច្ចេកវិទ្យា លោក លឹមឃាន់ បានបន្ថែមថា សុវត្ថិភាពនៃគេហទំព័រ គឺជាកង្វល់ដ៏ធំមួយសម្រាប់រាល់អាជីវកម្មទាំងអស់ ហើយគេហទំព័រដែលល្អ គឺត្រូវតែមានលទ្ធភាពខ្ពស់ក្នុងការការពារសុវត្ថិភាព និងការពារហានិភ័យពីពួក Hacker ផងដែរ។ ប្រសិនបើ គេហទំព័ររបស់អ្នកគ្មានសុវត្ថិភាព ដៃគូសហការអាជីវកម្ម និងអតិថិជនរបស់អ្នក នឹងមិនចែករំលែកព័ត៌មានសំខាន់ៗ ជាមួយអ្នកឡើយ។ លើសពីនេះទៀត ដើម្បីរក្សាដំណើរការសុវត្ថិភាពខ្ពស់ អ្នកបង្កើតគេហទំព័រគ្រប់រូប គួរត្រួតពិនិត្យគេហទំព័រជាប្រចាំ បើមិនដូច្នោះទេ គេហទំព័ររបស់អ្នកនឹងអាចមានបញ្ហា។
ជាចុងក្រោយ៖ ការបង្កើតគេហទំព័រសម្រាប់អាជីវកម្ម គឺពិតជាងាយស្រួលណាស់ ប៉ុន្តែដើម្បីទទួលបានគុណភាពខ្ពស់ គឺត្រូវការពេលវេលាច្រើនហើយទាមទានូវការប្តេជ្ញាចិត្ត និងយុទ្ធសាស្ត្របន្ថែមទៀត។ ដូច្នេះប្រសិនបើអ្នកចង់បង្កើត ឬកែលំអគេហទំព័ររបស់អ្នក អ្នកអាចទាក់ទង KOUPREY Creative Solutions តាមរយៈ
[email protected] ឬទូរស័ព្ទមកលេខ ០២៣ ៩៦០ ៩៨០ ។
(អត្ថបទពាណិជ្ជកម្ម)