ម្ចាស់ក្លិបលោក Roman Abramovich សញ្ចាតិរុស្ស៊ី ដែលរងទណ្ឌកម្មពីសំណាក់រដ្ឋាភិបាលអង់គ្លេស បានប្រកាសលក់ក្លិបដែលស្ថិតនៅភាគលិកទីក្រុងឡុដ៍ បន្ទាប់ពីរុស្ស៊ីបានបើកការវាយលុកចូលប្រទេសអ៊ុយក្រែន កាលពីខែកុម្ភៈ។
 

ប្រធានក្រុមហ៊ុនគីមី INEOS របស់អង់គ្លេសលោក Jim Ratcliffe បានប្រកាសកាលពីថ្ងៃទី២៩ ខែមេសាកន្លងទៅ ដោយបានដាក់ការដេញថ្លៃក្លិបតោខៀវនូវចំនួនទឹកប្រាក់ជាង ៥,៣៥ពាន់លានដុល្លារ។ ការដេញថ្លៃត្រូវបានក្រុមហ៊ុនវិនិយោគឈ្មោះ Raine របស់អាម៉េរិក ដែលបានសហការជាមួយរដ្ឋាភិបាលអង់គ្លេស ទទួលបន្ទុកលក់ក្លិប Chelsea បដិសេធព្រោះភាពយឺតយ៉ាវ។ 
 

ក្រោយទទួលបានការបដិសេធដូចនេះ លោក Jim Ratcliffe បាននិយាយថា ការពិចារណាគួរតែបានផ្តល់ឱ្យចំពោះការដេញថ្លៃពីសំណាក់ភាគីប្រទេសអង់គ្លេស។ លោកក៏ មិនបោះបង់បំណងទិញក្លិប Chelseaដែរ។
 

«យើងបានបង្ហាញពួកគេពីសំណើររបស់យើងទៅកាន់ពួកគេ (ក្រុមហ៊ុនវិយោគ Raine) កាលពីចុងសប្តាហ៍មុន តែយើងមិនបានទទួលបានការឆ្លើយតបដ៏សមស្រមណាមួយពីពួកគេ ហើយវាក៏ធ្វើឱ្យយើងមានការខកចិត្តផងដែរ។ ទោះយើងដាក់សំណើរយឺតបន្តិច ប៉ុន្តែយើងក៏មិនបោះបង់បំណងរបស់យើង»។លោក Ratcliffe និយាយប្រាប់ទូរទស្សន៍ BBC បែបនេះ។
 

មហាសេដ្ឋីសញ្ជាតិអង់គ្លេសវ័យ ៦៩ឆ្នាំរូបនេះ ក៏បានបន្ថែមថា Chelsea ជាផ្នែកមួយនៃចក្រភពអង់គ្លេស ហើយជនជាតិអង់គ្លេសមានបំណងល្អសម្រាប់ក្លិបក្នុងប្រទេសខ្លួន។
 

ទោះជាយ៉ាងនេះក្តីក្រុមហ៊ុនដែលបានដាក់ការដេញថ្លៃមុនពេលវេលាកំណត់ ហើយត្រូវបានទទួលស្គាល់ជាការដេញថ្លៃពេញលេញពីក្រុមហ៊ុន Raine គឺជាសម្ព័ន្ធមិត្ត ដែលដឹកនាំដោយលោក Todd Boehly ជាមហាសេដ្ឋីអាមេរិក និងជាម្ចាស់ក្លិបបេស្បល Los Angeles Dodgers រួមដៃជាគូហាសេដ្ឋីស្វីសលោក Hansjorg Wyss និងអ្នកវិនិយោគអចលនទ្រព្យសញ្ជាតិអង់គ្លេសលោក Jonathan Goldstein ជាអ្នកទទួលបានអតិភាព ក្នុងការទិញក្លិបយក្សអង់គ្លេសមួយនេះ៕