កីឡាអន្តរជាតិ
អន្តរជាតិ
តួលេខសំខាន់ចំនួន៥របស់ខ្សែប្រយុទ្ធ Thierry Henry មុនពេលប្រកាសចូលនិវត្តន៍
× កាសែត Le Monde ដ៏ល្បីរបស់បារាំង បានធ្វើការកត់សម្គាល់ពីតួលេខចំនួន៥ ទាក់ទងកីឡាករបាល់ទាត់ Thierry Henry ដែលបានប្រកាសចូលនិវត្តន៍កាលពីថ្ងៃទី១៦ ខែធ្នូ ក្នុងវ័យ៣៧ឆ្នាំ។ ខ្សែប្រយុទ្ធដែលស៊ុតបាល់បញ្ចូលទីច្រើនជាងគេ (៥១គ្រាប់) របស់បារាំង និងជាវិរបុរសក្លិប Arsenal រូបនេះ នឹងចាប់ផ្តើមអាជីពទីប្រឹក្សាកម្មវិធីទូរទស្សន៍ Sky Sports។
លេខ៥៖ Thierry Henry បានលេងឲ្យក្លិបអាជីពចំនួន៥ ដោយចាប់ផ្តើមពីក្លិប Monaco ក្នុងរដូវកាល១៩៩៤-១៩៩៥ ហើយបន្តទៅក្លិប Juventus ក្នុងរយៈពេល៧ខែនាឆ្នាំ១៩៩៩ ។ ពីឆ្នាំ១៩៩៩ ដល់ឆ្នាំ២០០៧ Henry ទទួលបានជោគជ័យដ៏ធំធេងនៅ Arsenal មុននឹងចាកចេញជាបន្តបន្ទាប់ទៅកាន់ Barcelona (២០០៧-២០១០) និង New York Red Bulls (២០១០-២០១៤ ) និងធ្លាប់ត្រូវបានខ្ចីជើងទៅកាន់ Arsenal វិញនៅឆ្នាំ២០១២ ។
លេខ៩១៧៖ ក្នុងរយៈពេល២០ឆ្នាំនៃការប្រកបអាជីព កីឡាករដែលមានដើមកំណើតពីតំបន់Ulisខេត្ត Essonneរូបនេះ ធ្លាប់លេងបាន៩១៧ប្រកួតជាផ្លូវការ ដែលក្នុងនោះ១២៣ប្រកួតសម្រាប់ក្រុមជម្រើសជាតិបារាំង។ Henry ជាកីឡាករបារាំងតែម្នាក់គត់ដែលបានលេងក្នុងព្រឹត្តិការណ៍ World Cup ៤លើក (១៩៩៨-២០០២-២០០៦ និង២០១០)។ Arsenal គឺជាក្លិបដែលខ្សែប្រយុទ្ធរូបនេះ លេងបានច្រើនបំផុត ពោលគឺ៣៧៧ប្រកួត។
លេខ៤១១៖ ខ្សែប្រយុទ្ធរូបនេះ មានភាពល្បីល្បាញក្នុងការរកគ្រាប់បាល់ដោយបច្ចេកទេសប្រើបាតជើងប៉ែងបញ្ចូលទី។ តាមកំណត់ត្រា គេបានធ្វើសម្រេចចំនួន៤១១គ្រាប់ក្នុងអាជីពរបស់ខ្លួន។
លេខ២១៖ Henry ជាកីឡាករម្នាក់ដែលទទួលបានតំណែងជើងឯកច្រើនជាងគេ ពោលគឺមានរហូតដល់ទៅ២១ ក្នុងនោះមានដូចជា ជើងឯក World Cup ឆ្នាំ១៩៩៨ ជើងឯក Euro ឆ្នាំ២០០០ ជើងឯក FIFA Confederations Cup ឆ្នាំ២០០៣ ជាមួយក្រុមជម្រើសជាតិបារាំង។ គេឈ្នះជើងឯកចំនួន១៤លើកនៅក្នុងលីកអាជីពនៅបារាំង អង់គ្លេស និងអេស្ប៉ាញ។ បូករួមជាមួយពានរង្វាន់សម្រាប់ក្លិប Henry ក៏ពានរង្វាន់ជាលក្ខណៈឯកជនផងដែរ ជាពិសេសពានរង្វាន់ស្បែកជើងមាស។
លេខ៥៧៖ បើការវាយតម្លៃរបស់ Goal.com Henry រកចំណូលបានយ៉ាងហោចណាស់៥៧លានអឺរ៉ូ ដោយគេជាកីឡាករទី១០ដែលមានតម្លៃខ្លួនខ្ពស់ជាងគេ។ ចំណូលដែល Henry ទទួលបានមានដូចជា ប្រាក់ខែ និងសន្យាពាណិជ្ជកម្មផ្សេងៗ ជាពិសេសជាមួយក្រុមហ៊ុន Red Bull និង Puma៕
© រក្សាសិទ្ធិដោយ thmeythmey.com