ជាតិ
លោក សុខ ផល ប្រាប់ឲ្យបញ្ឈប់ការធ្វើឯកសារដល់ជនអន្តោប្រវេសន៍
× ភ្នំពេញ៖ អគ្គស្នងការរងនគរបាលជាតិ និងជាអគ្គនាយកនៃអគ្គនាយកអន្តោប្រវេសន៍ លោក សុខ ផល បានប្រាប់ឲ្យអាជ្ញាធរមូលដ្ឋាន និងសមត្ថកិច្ចត្រូវបញ្ឈប់ការធ្វើសំបុត្រកំណើត សៀវភៅគ្រួសារ និងអត្តសញ្ញាណប័ណ្ណខុសច្បាប់ឱ្យជនបរទេសដែលបានចូលមកកម្ពុជា ចាប់ពីពេលនេះតទៅ។ នេះបើយោងតាមការផ្សាយរបស់ AKP ។
យោងតាម AKP អគ្គនាយកនៃអគ្គនាយកអន្តោប្រវេសន៍ លោក សុខ ផល មានប្រសាសន៍ នៅក្នុងកិច្ចប្រជុំផ្សព្វផ្សាយការងារ ជំរឿនពិនិត្យអត្ថពលករបរទេសនៅក្នុងស្នងការដ្ឋាន នគរបាលខេត្តកំពង់ឆ្នាំង នៅថ្ងៃទី១៦ ខែមករានេះ ថា អាជ្ញាធរមូលដ្ឋាន និងសមត្ថកិច្ចត្រូវបញ្ឈប់ការធ្វើសំបុត្រកំណើត សៀវភៅគ្រួសារ និងអត្តសញ្ញាណប័ណ្ណខុសច្បាប់អោយ ជនបរទេស។
លោកបញ្ជាក់បន្ថែមថា ទង្វើទាំងនេះជាអំពើខុសច្បាប់ និងធ្វើឱ្យការងារគ្រប់គ្រងជនបរទេស មានផលលំបាក ដោយអាចធ្វើឱ្យប៉ះពាល់ដល់សន្តិសុខជាតិ និងបង្កឡើងដោយភេរវកម្ម បរទេស ដែលមិនបានដឹងច្បាស់លាស់ជាមុន។
បើតាមប្រភពដដែល លោក សុខ ផល បានជំរុញដល់អាជ្ញាធរមូលដ្ឋាន និងសមត្ថកិច្ចត្រូវ ពង្រឹងការអនុវត្តច្បាប់អន្តោប្រវេសន៍ឱ្យបានម៉ឺងម៉ាត់ ដើម្បីគ្រប់គ្រងឱ្យបាននូវការចេញចូល និងស្នាក់អាស្រ័យរបស់ជនបរទេសនៅក្នុងមូលដ្ឋាន ហើយត្រូវផ្សព្វផ្សាយ ឱ្យជនបរទេសអន្តោប្រវេសន៍ស្របច្បាប់ចូលមកបង់អាករប្រចាំឆ្នាំតាមគោល ការណ៍ច្បាប់កំណត់ផងដែរ៕
© រក្សាសិទ្ធិដោយ thmeythmey.com