អន្តរជាតិ
នយោបាយអន្តរជាតិ
បក្សកាន់អំណាចអេស្ប៉ាញបន្តឈ្នះឆ្នោត តែមិនបានសំឡេងភាគច្រើនដាច់ខាត
× គណបក្សកាន់អំណាច អេស្ប៉ាញបានបន្តឈ្នះឆ្នោតជាថ្មីទៀត ក្នុងការបោះឆ្នោតទូទៅមួយនៅថ្ងៃទី២០ ខែធ្នូ ។ គណបក្សអភិរក្សនេះឈ្នះបានកៅអីភាគច្រើននៅក្នុងសភាជាន់ទាប តែយ៉ាងណាក៏ដោយ គណបក្សនេះមិនបានទទួលសំឡេងភាគច្រើនដាច់ខាតដើម្បីបង្កើតរដ្ឋាភិបាលម្នាក់ឯងបានទេ ដោយសារគណបក្សប្រឆាំងឈ្នះបានកៅអីថែមទៀត។
លោក មុំ ពិទូរ្យ លម្អិតព័ត៌មាននេះ
គណបក្សប្រជាជនរបស់នាយករដ្ឋមន្ត្រី Mariano Rajoy បានបន្តជ័យជម្នះរបស់ខ្លួនក្នុងការបោះឆ្នោតនៅថ្ងៃអាទិត្យ ទី២០ ខែធ្នូម្សិលមិញនេះ។ គណបក្សអភិរក្សរបស់លោក Rajoy បានទទួលកៅអីចំនួន១២២ក្នុងចំណោមកៅអីសរុប៣៥០។ ប៉ុន្តែគណបក្សនេះ មិនបានកៅអីគ្រប់គ្រាន់សម្រាប់បង្កើតរដ្ឋាភិបាលទេ ព្រោះសំឡេងភាគច្រើនដាច់ខាតក្នុងការបង្កើតរដ្ឋាភិបាលបានគឺចំនួន១៧៥កៅអី។
បក្សដែលតាមពីក្រោយគណបក្សកាន់អំណាច គឺគណបក្សសង្គមនិយមដែលជាបក្សប្រឆាំង។ បក្សនេះទទួលបានកៅអីចំនួន៩១ ហើយគណបក្សឆ្វេងនិយម Podemos និងសម្ព័ន្ធមិត្តរបស់ខ្លួនទទួលបាន៦៩កៅអី។ ចំណែកឯគណបក្សស្ដាំនិយមកណ្ដាល Ciudadanos ទទួលបានកៅអី៤០ផងដែរ។
យោងតាមលទ្ធផលខាងលើនេះ សភាជាន់ទាបអេស្ប៉ាញនឹងមានសមាសភាពចម្រុះដោយគណបក្សជាច្រើនជាមួយសំឡេងប្រហាក់ប្រហែលគ្នា។ ហើយនេះក៏មានន័យថា ការជាប់គាំងផ្នែកនយោបាយអាចនឹងកើតមាន ពីព្រោះសភានឹងមានភាពតានតឹងខ្លាំងក្នុងការបង្កើតរដ្ឋាភិបាលចម្រុះភាគច្រើនដែលមានលំនឹង។
ជាមួយតម្រូវការកៅអីចំនួន១៧៥សម្រាប់បង្កើតរដ្ឋាភិបាល ប្រហែលមានតែសម្ព័ន្ធភាពរវាងបក្សប្រជាជនរបស់លោកនាយករដ្ឋមន្ត្រី Rajoy ជាមួយបក្សប្រឆាំងសង្គមនិយមទេ ដែលអាចបង្កើតរដ្ឋាភិបាលមានលំនឹងមួយបាន។ តែរឿងនេះប្រហែលជាមិនអាចទៅរួចឡើង ពីព្រោះបក្សទាំងពីរនេះជាដៃគូប្រជែងនឹងគ្នា។ យ៉ាងណាក៏ដោយ គេត្រូវរង់ចាំមើលសិន ថាតើរដ្ឋាភិបាលថ្មីនឹងមានសមាសភាពមកពីបក្សណាខ្លះ។
សូមរម្លឹកថា ការបោះឆ្នោតនេះ គឺធ្វើឡើងចំពេលដែលសេដ្ឋកិច្ច អេស្ប៉ាញ ងើបឡើងមកវិញ ដោយមានអត្រាកំណើនសេដ្ឋកិច្ចប្រហែល៣ភាគរយក្នុងឆ្នាំនេះ ហើយអត្រាអ្នកគ្មានការងារក៏ធ្លាក់ចុះផងដែរ ប៉ុន្តែអត្រាអត់ការងារនេះនៅតែខ្ពស់បើប្រៀបធៀបជាមួយប្រទេសដទៃ៕
Tag:
បោះឆ្នោតអេស្ប៉ាញ
© រក្សាសិទ្ធិដោយ thmeythmey.com