ចិននិយាយថា រដ្ឋមន្ត្រីការពារជាតិអាមេរិកនៅសល់កម្អែលសង្គ្រាមត្រជាក់

អន្តរជាតិ

ចិននិយាយថា រដ្ឋមន្ត្រីការពារជាតិអាមេរិកនៅសល់កម្អែលសង្គ្រាមត្រជាក់

31, May 2016 , 3:40 pm

រូបភាព

ដោយ: តន ចាន់រិទ្ធារ៉ា

មហាយក្សចិនបានឆ្លើយតបនឹងការរិះគន់របស់រដ្ឋមន្ត្រីការពារជាតិអាមេរិកលោក Ash Carter ដែលនិយាយថា ចិនកំពុងធ្វើខ្លួនឲ្យឃា្លតឆ្ងាយពីប្រទេសដទៃ តាមរយៈសកម្មភាពយោធានៅសមុទ្រចិនខាងត្បូង។ ចិន ថែមទាំងចោទលោក Carter ថា នៅមិនទាន់ជម្រះកម្អែលសង្គ្រាមត្រជាក់នៅឡើយទេ។

អ្នកនាំពាក្យក្រសួងការបរទេសចិន បានប្រតិកម្មនឹងការលើកឡើងរបស់រដ្ឋមន្ត្រីការពារ ជាតិអាមេរិក លោក Ash Carter ដែលថា ចិនកំពុងតែបង្កើតមហាកំផែងនៃភាពឯកា។ នៅថ្ងៃទី៣០ ខែឧសភា លោកស្រី Hua Chunying ប្រាប់អ្នករាយការណ៍ព័ត៌មានថា សំដីរបស់លោក Carter គឺជាការប៉ុនប៉ងដើម្បីលាក់បាំងផែនការពង្រាយកម្លាំងបន្ថែមមកកាន់តំបន់អាស៊ីប៉ាស៊ីហ្វិកប៉ុណ្ណោះ។

ថ្លែងក្នុងការសង្ខេបព័ត៌មានប្រចាំថ្ងៃ អ្នកនាំពាក្យរូបនេះនិយាយដែរថា ការអធិប្បាយរបស់លោក Carter បង្ហាញពី គំនិតក៏ដូចជាអនុត្តរភាពរបស់អាមេរិក។ លោកស្រីបន្តថា៖«មានអ្នកខ្លះរស់នៅអាមេរិក ក្នុងសតវត្សរ៍ទី២១ ប៉ុន្តែគំនិតរបស់ពួកគេនៅតែដិតដាមសម័យសង្គ្រាមត្រជាក់នៅឡើយ»។

លើសពីនេះទៅទៀត លោកស្រី Hua បញ្ជាក់ដែរថា ចិនមិនដែលខ្វល់នឹងសង្គ្រាមត្រជាក់ ឬក៏ដើរតួក្នុង «រឿងហូលីវូដ» តាមការរៀបចំរបស់ទាហានអាមេរិកនោះដែរ។ ការលើកឡើងរបស់លោកស្រី Hua ទំនងជាសញ្ញាប្រាប់អាមេរិកថា ចិនមិនធ្វើតាមអាមេរិកគ្រប់រឿងនោះទេ។ មួយវិញទៀត លោកស្រី ក៏សង្កត់ធ្ងន់ដែរថា ចិននឹងមិនភ័យខ្លាចទេ ហើយនឹងឆ្លើយតបនឹងសកម្មភាពណា ដែលគំរាមដល់សន្តិសុខ និងអធិបតេយ្យភាពរបស់ខ្លួន។

សូមរម្លឹកថា រដ្ឋមន្ត្រីការពារជាតិអាមេរិក លោក Ash Carter បានថ្លែងនៅថ្ងៃទី២៧ ខែ ឧសភា ថា ចិនកំពុងតែប្រឈមនឹងការបង្កើត «មហាកំពែងនៃការបង្កើតភាពឯកាដោយខ្លួនឯង» តាមរយៈការបន្តសកម្មភាពពង្រីកឥទ្ធិពលយោធានៅក្នុងសមុទ្រចិនខាងត្បូង និងការវាយប្រហារលើក្រុមហ៊ុនអាមេរិកតាមរយៈប្រព័ន្ធអ៊ីនធើណែតជាដើម។ លោក Carter បានបញ្ជាក់ ថា ប្រព័ន្ធអ៊ីនធើណែតរបស់ចិន បាននិងកំពុងតែរំលោភនិងគោលការណ៍នៃការប្រើប្រាស់អ៊ីនធើណែត និងប៉ះពាល់ដល់កម្មសិទ្ធិបញ្ញារបស់ក្រុមហ៊ុនអាមេរិក។

ការលើកឡើងរបស់ប្រមុខការពារជាតិរូបនេះ ត្រូវបានធ្វើឡើងមុនពេលនៃដំណើរទស្សន កិច្ចទៅ កាន់សិង្ហបុរីដើម្បីចូលរួមកិច្ចប្រជុំសន្តិសុខអាស៊ី ខណៈបញ្ហាសមុទ្រចិនខាងត្រូវបានរំពឹងថានឹងក្លាយជាប្រធានបទដ៏សំខាន់មួយដែលត្រូវប្រព្រឹត្តឡើងនៅថ្ងៃទី៣ ដល់ទី៥ ខែមិថុនា។

រយៈពេលចុងក្រោយនេះ ភាគីពាក់ព័ន្ធនៃជម្លោះមិនសូវមានការប្រឈមគ្នាខ្លាំងប៉ុន្មាននោះ ទេ ។ តែអ្វីគួរកត់សម្គាល់នោះ ស្ថានភាពបែរជាតានតឹងខ្លាំងរវាងអាមេរិក ជារដ្ឋខាងក្រៅ និងចិនជាភាគីជម្លោះទៅវិញ។ ភាគីទាំងពីរ បានចោទដាក់គ្នាថា កំពុងតែធ្វើយោធូបនីយកម្ម និងបង្កើតកម្តៅនៃជម្លោះក្នុងតំបន់៕