មេដឹកនាំណាតូនឹងពិភាក្សាលើការពង្រឹងសមត្ថភាពការពារក្នុងជំនួបនៅប៉ូឡូញ

អន្តរជាតិ

មេដឹកនាំណាតូនឹងពិភាក្សាលើការពង្រឹងសមត្ថភាពការពារក្នុងជំនួបនៅប៉ូឡូញ

31, May 2016 , 10:19 pm

រូបភាព

ដោយ: តន ចាន់រិទ្ធារ៉ា

អគ្គលេខាធិការរងសម្ព័ន្ធយោធាណាតូ លោក Alexander Vershbow បានលើកឡើងពីរបៀបវារៈសំខាន់ៗ សម្រាប់កិច្ចប្រជុំកំពូលណាតូ ដែលនឹងធ្វើនៅខែកក្កដា ក្នុងទីក្រុងវ៉ាសូវី ប្រទេសប៉ូឡូញ ខណៈដែលការប្រឈមមុខរវាងណាតូ និងរុស្សី មានការកើនឡើងខ្លាំងនៅរណសិរ្សខាងកើត។ មេដឹកនាំណាតូ នឹងធ្វើការសម្រេចចិត្តមួយ ដែលសំដៅពង្រឹងសមត្ថភាពការពារ និងអនុភាពរបស់ខ្លួន។

ក្នុងអំឡុងពេលកិច្ចប្រជុំសភា នៃប្រទេសសមាជិកណាតូ នៅអាល់បានី អគ្គលេខាធិការរងណាតូ លោក Alexander Vershbow បានបង្ហាញនូប្រធានសំខាន់ៗ ដែលនឹងត្រូវលើកមកពិភាក្សា ក្នុងពេលកិច្ចប្រជុំណាតូនៅវ៉ាសូវី ក្នុងខែកក្កដាខាងមុខ។ ការពង្រឹងកម្លាំងការពារ និងកម្លាំងយោធា នឹងជាចំណុចស្នូលនៃការពិភាក្សារបស់មេដឹកនាំបក្សសម្ព័ន្ធណាតូ ស្របពេលដែលការប្រឈមមុខជាមួយរុស្សី កំពុងតែកើនឡើង។

តាមរយៈសេចក្ដីប្រកាសព័ត៌មានរបស់ណាតូ ថ្ងៃទី៣០ ខែឧសភា លោក Vershbow និយាយថា ជំនួបកំពូល ធ្វើឡើងនៅចំពេលវេលាសំខាន់របស់សម្ព័ន្ធណាតូ នោះគឺពេលដែលសន្តិសុខ និងតម្លៃរបស់ណាតូ ប្រឈមមុខនឹងការប្រជែងខ្លាំងក្លាពីខាងកើត និងខាងត្បូង។ លោករំពឹងដែរថា មេដឹកនាំដែលនឹងប្រជុំគ្នាក្នុងក្រុងវ៉ាសូវី នឹងឯកភាពគ្នាលើការពង្រឹងវត្តមាននៅភាគខាងកើត ដោយរួមទាំងការបញ្ជូនអង្គភាពយោធា ពីសំណាក់អឺរ៉ុប និងអាមេរិកខាងជើង។

លើសពីនេះទៅទៀត អគ្គលេខាធិការរងរូបនេះ ក៏សង្កត់ធ្ងន់ដែរថា ណាតូបន្តពង្រឹងស្ថិរភាពនៅផុតព្រំដែនរបស់ខ្លូន តាមរយៈការធ្វើការជាមួយដៃគូ ដើម្បីពង្រឹងសមត្ថភាពការពាររបស់ប្រទេសទាំងនោះ។ ជាមួយនឹងអបអរអាល់បានី ចំពោះខួប៧ឆ្នាំ នៃការចូលជាសមាជិកណាតូ លោក Alexander Vershbow ក៏បញ្ជាក់ដែរថា ទ្វាររបស់ណាតូ នឹងនៅតែបើកចំពោះម៉ុងតេណេក្រូ ដែលចង់ចូលណាតូដែរនោះ។

ទាក់ទងនឹងការសុំចូលជាសមាជិករបស់ម៉ុងតេណេក្រូ កាលពីដើមខែឧសភា រដ្ឋមន្ត្រីការបរទេសអឺរ៉ុប បានចុះហត្ថលេខាលើពិធីសារចូលជាសមាជិករបស់ប្រទេសនេះរួចហើយ។ ដំណាក់កាលបន្ទាប់ គឺរង់ចាំការសម្រេចពីសភាអឺរ៉ុប។ នៅពេលដែលសភាអឺរ៉ុបអនុម័តរួចរាល់លើពិធីសារនេះ ម៉ុងតេណេក្រូ នឹងក្លាយជាសមាជិកថ្មីបំផុតនៃសម្ព័ន្ធយោធានេះ។

បញ្ហានេះធ្វើឲ្យរុស្សី មិនសប្បាយចិត្តប៉ុន្មាននោះទេ ដោយអះអាងថា ណាតូកំពុងតែពង្រីកឥទ្ធិពល ដើម្បីហ៊ុមព័ទ្ធខ្លួន និងចាត់ទុកការពង្រាយកម្លាំងមកតំបន់អឺរ៉ុបខាងកើតថា ជាគំរាមកំហែងដល់សន្តិសុខខ្លួនទៀតផង។ ជាមួយការគំរាមនេះ រុស្សីក៏ប្រកាសឆ្លើយតបផងដែរ ដោយបានបង្កើតកងឯកភាពថ្មីមួយចំនួន សម្រាប់ទប់ទល់នឹង ស្ថានភាពដែលកំពុងតែក្ដៅបែបនេះ៕