អន្តរជាតិ
ចិនកាត់ទោសមន្ត្រីយោធាជាន់ខ្ពស់ម្នាក់ឲ្យជាប់គុក១ជីវិតព្រោះពុករលួយ
× អតីតអនុប្រធានគណកម្មការមជ្ឈិមយោធាចិនលោក Guo Boxiong ត្រូវបានតុលាការយោធាកាត់ទោសឲ្យជាប់ពន្ធនាគារមួយជីវិត ដោយជាប់ពាក់ព័ន្ធអំពើស៊ីសំណូកសូកប៉ាន់។ រដ្ឋអាជ្ញាចិនបានបង្ហាញភ័ស្តុតាងថា កន្លងមកក្រុមគ្រួសារ និងលោក Guo Boxiong បានទទួលប្រយោជន៍ពីការសូកប៉ាន់ជាថ្នូរជាមួយការជួយរៀបចំដំឡើងមុខងារនិងឋានន្តរស័ក្តិដល់មន្ត្រីយោធា។
លោក Guo Boxiong ដែលជាឧត្តមសេនីយ៍យោធាចូលនិវត្តន៍និងអនុប្រធានគណកម្មការមជ្ឈិមយោធាចិនដឹកនាំដោយលោក ស៊ី ជីនពីង ត្រូវបានតុលាការយោធាកាត់ទោសឲ្យជាប់ពន្ធនាគារអស់មួយជីវិត ដោយសារប្រព្រឹត្តអំពើពុករលួយនិងទទួលសំណូក។ ដើមឡើយ គេរំពឹងថា សំណុំរឿងលោក Gou ត្រូវតុលាការជំនុំជម្រះតាំងពីខែមីនាឆ្នាំមុនម្ល៉េះ ប៉ុន្តែក្រោយមកក៏ត្រូវលើកពេលវិញ។
យោងតាមទីភ្នាក់ងារព័ត៌មានចិន Xinhua លោក Guo Boxiong ត្រូវបានចាប់ខ្លួន, បកស័ក្តិ និងបណ្តេញចេញពីបក្ស មុននឹងត្រូវគេបញ្ជូនទៅសួរចម្លើយនិងកាត់ទោស។ ភ្លាមៗក្រោយកាត់ទោស ប្រព័ន្ធផ្សព្វផ្សាយរបស់រដ្ឋខាងលើ បានបញ្ចេញសំណុំរឿងនេះនិងបង្ហាញពីបទចោទប្រឆាំងអតីតឧត្តមសេនីយ៍យោធានេះជាសាធារណតែម្តង។
តុលាការបានរកឃើញថា លោក Guo Boxiong ដែលមានវ័យ ៧៤ឆ្នាំទៅហើយនោះបានប្រើប្រាស់មុខតំណែងរបស់ខ្លួនដើម្បីទាញយកប្រយោជន៍និងលាភសក្ការៈនានាដែលមិនស្របតាមច្បាប់។ លោកនិងក្រុមគ្រួសារបានទទួលយកសំណូកពីមន្ត្រីដើម្បីជាថ្នូរជាមួយការជួយផ្ទេរមុខងារ, ភារកិច្ច ក៏ដូចតែងតាំង ឬដំឡើងឋានន្តរស័ក្តិផងដែរ។ ចំណែក លោក Guo Boxiong បានសារភាពថា លោកពិតជាបានទទួលសំណូកពិតប្រាកដមែន។
បើតាមសារព័ត៌មាន South China Moing Post ប្រភពខាងយោធាមិនបង្ហាញអត្តសញ្ញាណមួយបានបញ្ជាក់ថា អតីតឧត្តមសេនីយ៍ខាងលើនេះបានទទួលសំណូកក្នុងទំហំទឹកប្រកាស់ប្រហែល ៨០លានយន់ ដែលប្រហាក់ប្រហែល ១២, ៣លានដុល្លារអាមេរិកឯណោះ។
ក្រៅពីលោក Gou Boxiong ផ្ទាល់ កូនប្រុសរបស់លោក គឺឧត្តមសេនីយទោ Guo Zhenggang ក៏ត្រូវគេឃុំខ្លួននិងស្ថិតក្រោមការស៊ើបអង្កេតក្នុងករណីពុករលួយ និងប្រព្រឹត្តសកម្មភាពឧក្រិដ្ឋមួយចំនួនផង។
និយាយទៅលោក Gou Boxiong ជាមន្ត្រីម្នាក់ដែលស្ថិតក្នុងចំណោមមន្ត្រីយោធាជាន់ខ្ពស់និងមានអំណាចបំផុតរបស់ចិន ដែលរងគ្រោះដោយសារយុទ្ធសាស្ត្រកណ្តាប់ដៃដែកប្រឆាំងអំពើពុករលួយរបស់លោកប្រធានាធិបតី ស៊ី ជិនពីង។ តាំងពីឡើងកាន់តំណែងមក លោក ស៊ី ជិនពីងប្រឹងប្រែងកែទម្រង់វិស័យយោធា និងធ្វើយ៉ាងណាបោសសម្អាតអំពើពុករលួយដែលចាក់រឹងជ្រៅក្នុងស្ថាប័នប្រដាប់អាវុធដ៏សំខាន់របស់ចិននេះ។ លោកជឿជាក់ថា កាលណាបើទាហាននិងកងកម្លាំងប្រដាប់អាវុធមិនស្អាតស្អំទេ យោធាចិនមិនអាចខ្លាំងក្លាទៅកើតឡើយ៕
Tag:
Guo Boxiong
ស៊ី ជិនពីង
គណកម្មការមជ្ឈិមយោធាចិន
© រក្សាសិទ្ធិដោយ thmeythmey.com