ជាតិ
នយោបាយជាតិ
សម្តេច ហ៊ុន សែន៖ ការបោះឆ្នោតព្រឹទ្ធសភា និងតំណាងរាស្ត្រ នឹងប្រព្រឹត្តទៅតាមការគ្រោងទុក
× ភ្នំពេញ៖ សម្តេចនាយករដ្ឋមន្ត្រី ហ៊ុន សែន បានអះអាងសារជាថ្មីថា ការបោះឆ្នោតជ្រើសរើសសមាជិកព្រឹទ្ធសភា និងរដ្ឋសភា ជាបន្តបន្ទាប់នៅឆ្នាំ២០១៨នេះ នឹងដំណើរការតាមការគ្រោងទុក។ ប្រតិកម្មរបស់សម្តេចគឺដើម្បីតបតទៅនឹងអត្ថបទមួយរបស់ភ្នំពេញប៉ុស្តិ៍ ។
សម្តេចនាយករដ្ឋមន្ត្រី ហ៊ុន សែន អះអាងពីការរៀបចំការបោះឆ្នោតទៅតាមពេលវេលាដែលបានកំណត់។ នាពិធីផ្សព្វផ្សាយគោលនយោបាយជាតិស្តីពី មនុស្សវ័យចាស់ឆ្នាំ២0១៧-ឆ្នាំ២0៣0 នៅព្រឹកថ្ងៃទី១៨ ខែមករានេះ សម្តេចបញ្ជាក់យ៉ាងដូច្នេះថា៖«មិនថាមានរឿងអ្វីកើតឡើងទេ ហើយទោះ [លះបង់] ក្នុងតម្លៃណាក៏ដោយ យើងត្រូវតែបោះឆ្នោតឲ្យខានតែបាន»។
ប្រសាសន៍ផ្ទាល់នេះ គឺបន្ថែមលើសំណេរក្នុងហ្វេសប៊ុករបស់សម្តេច ដែលបានប្រតិកម្មទៅនឹងអត្ថបទមួយរបស់កាសែតភ្នំពេញ ប៉ុស្តិ៍ ក្រោមចំណងជើងថា៖ «លោកនាយករដ្ឋមន្ត្រីថា ការបោះឆ្នោតអាចធ្វើមិ បើមានការច្របូកច្របល់»។
«ការបោះ ឆ្នោតជ្រើសរើសសមាជិកព្រឹទ្ធសភា ថ្ងៃ២៥កុម្ភះ ២០១៨ និងការបោះឆ្នោតជ្រើសសមាជិករដ្ឋសភា ថ្ងៃ២៩ កក្កដា២០១៨ ដែល បានកំណត់រួចហើយមិនមានអ្វីផ្លាស់ប្តូរទេ»។ នេះជាការអះអាងរបស់សម្តេច ហ៊ុន សែន ដោយស្នើឲ្យអ្នកកាសែត និងអ្នកវិភាគ រៀនស្តាប់របៀបអត្ថាធិប្បាយរបស់សម្តេចឲ្យបានច្បាស់។
ប្រតិកម្មរបស់សម្តេច ហ៊ុន សែន ហាក់ដូចជាឆ្លើយតបមិនផ្ទាល់ទៅកាន់លោក សម រង្ស៊ី ផងដែរ។ កាលពីថ្ងៃទី១៧ ខែមករា អតីតប្រធានគណបក្សប្រឆាំងដែលកំពុងនីរទេសខ្លួនឯងនៅក្រៅប្រទេស បានសរសេរនៅលើបណ្តាញសង្គម Twitter ពីបំណងចង់ឲ្យមានការពន្យាពេលនៃការបោះឆ្នោតដើម្បីរង់ចាំឲ្យមានដំណោះស្រាយសមស្របមួយ។
លោក សម រង្ស៊ី ថា លោកនឹងដាក់សំណើរទៅសម្តេច ហ៊ុន សែន លើករណីនេះ ដែលអាចឲ្យកម្ពុជាជៀសផុតពីអំពើហិង្សា និងមិនក្លាយជាប្រទេសឯកោ។
យ៉ាងណាក៏ដោយ លោក សម រង្ស៊ី ទំនងជាគ្មានឱកាសឬហេតុផលគ្រប់គ្រាន់ ដើម្បីដាក់សំណើរនេះ ទៅកាន់សម្តេច ហ៊ុន សែន នោះទេ ដ្បិតសម្តេច ហ៊ុន សែន បានប្រកាសបិទផ្លូវជាមុនរួចទៅហើយ ថាការបោះឆ្នោត នឹងមិនអាចពន្យារពេលជាដាច់ខាត។
ថ្វីបើមេដឹកនាំកំពូលៗ រួមទាំងមន្ត្រីជាន់ខ្ពស់របស់រដ្ឋាភិបាល និងគណបក្សកាន់អំណាច ប្រកាសក្តែងៗថា ការបោះឆ្នោត នឹងដំណើរជាធម្មតាតាមការគ្រោងទុកក្តី ប៉ុន្តែសាធារណជនមួយចំនួន នៅតែមិនទាន់ស្រឡះក្នុងចិត្តថា ការបោះឆ្នោត អាចរៀបចំនិងប្រព្រឹត្តទៅយ៉ាងដូចម្តេច ប្រសិនបើគ្មានការចូលរួមពីគណបក្សប្រឆាំង។ ជាពិសេស សហគមន៍អន្តរជាជាតិនានា មានដូចជាសហរដ្ឋអាមេរិក និងសហភាពអឺរ៉ុប បានព្រមានថា នឹងមិនទទួលសា្គល់ការបោះឆ្នោត ប្រសិនបើ អវត្តមានគណបក្សសង្គ្រោះជាតិ ហើយលោក កឹម សុខា ដែលជាប្រធានគណបក្សនេះ មិនត្រូវបានដោះលែង៕
Tag:
សម្តេច ហ៊ុន សែន
សម រង្ស៊ី
បោះឆ្នោត
© រក្សាសិទ្ធិដោយ thmeythmey.com