ជាតិ
សង្គមជាតិ
អាជ្ញាធរអប្សរាបញ្ជាក់ថាការជួសជុលប្រាសាទអង្គរមិនធ្វើឲ្យខូចទ្រង់ទ្រាយដើមទេ ថាវកូរសមុទ្រទឹកដោះខាងកើត ដែលឥណ្ឌាបានជួសជុល ក្រោយមកសហរដ្ឋអាមេរិកបានយកបន្ទះសំណមកបិទ ដើម្បីការពារការជ្រាបទឹក។
× សៀមរាប៖ មានការលើកឡើងនៅក្នុងបណ្តាញសង្គមហ្វេសប៊ុកដែលថា ការជួសជុល និងការសង្គ្រោះប្រាសាទអង្គរវត្តរបស់ស្ថាប័នជាតិ និងអន្តរជាតិ មានការខូចទ្រង់ទ្រាយដើម ជារួមគឺធ្វើឲ្យតួថ្មប្រាសាទសឹក និងទ្រុឌទ្រោមជាងមុន។ ការបកស្រាយរបស់អាជ្ញាធរជាតិអប្សរា គឺថាមតិក្នុងបណ្តាញសង្គម មានបំណងមិនល្អ ជារួមការជួសជុល និងការអភិរក្សនានាក្នុងប្រាសាទអង្គរ គឺត្រូវឆ្លងកាត់ការត្រួតពិនិត្យ និងអនុម័តពីស្ថាប័នយូណេស្គូ ដែលប្រាសាទអង្គរវត្ត បានចូលជាសម្បត្តិបេតិកភណ្ឌមនុស្សជាតិ ហើយការជួសជុស គឺធ្វើយ៉ាងណាឲ្យប្រាសាទមានភាពប្រសើរឡើង ឫស្ថិតក្នុងសភាពដើមទាំងស្រុង។
មន្ត្រីនៃអាជ្ញាធរជាតិអប្សរាបានឲ្យដឹងថា ស្ថាប័នជំនាញមកពី៥ប្រទេស ដែលបានចូលរួមការងារជួសជុល និងសង្គ្រោះប្រាសាទអង្គរវត្ត ចាប់តាំងពីឆ្នាំ១៩៨៧មក។ ក្នុងនោះរួមមាន ស្ថាប័នប្រទេសឥណ្ឌា ដែលជួសជុលថែវកូរសមុទ្រទឹកដោះ ប្រទេសអ៊ីតាលី ជួសជុលផ្នែកខ្លះនៃកសិណអង្គរ ដែលបច្ចុប្បន្នកំពុងដំណើរការ ប្រទេសអាឡឺម៉ង់ ជួយជុសជុលរូបចម្លាក់អប្សរា ជប៉ុនជួយជុសជុលបណ្ណាល័យខាងជើង និងស្ពានហាលផ្លូវចូលអង្គរផ្នែកខាងជើង ហើយនិងសហរដ្ឋអាមេរិក ជួសជុលដំបូលថែវកូរសមុទ្រទឹកដោះ។
លោក លី វណ្ណា ប្រធាននាយកដ្ឋានអភិរក្សប្រាសាទក្នុងឧទ្យានអង្គរ និងបុរាណវិទ្យាបង្ការ នៃអាជ្ញាធរជាតិអប្សរា បានបញ្ជាក់ថា រាល់ស្ថាប័នទាំងអស់ មានដំណាក់កាលការជួសជុល និងសង្គ្រោះប្រាសាទអង្គរវត្តអំឡុងពេលខុសៗគ្នា ខ្លះក៏ដំណាលគ្នាផងដែរ។ លោក លី វណ្ណា បន្ថែមថា មតិដែលនិយាយថា រាល់ការជួសជុល និងសង្គ្រោះប្រាសាទអង្គរវត្ត ពីស្ថាប័នខាងលើ ធ្វើឲ្យប៉ះពាល់ ឫសឹកថ្មប្រាសាទជាដើមនោះ មិនពិតទេ ព្រោះថា រាល់សម្ភារដែលយកមកប្រើប្រាស់ គឺត្រូវឆ្លងកាត់ការអនុញ្ញាតពីស្ថាប័នយូណេស្គូ ដើម្បីបង្ការការគ្រោះថ្នាក់នានា។
លោក លី វណ្ណា ពន្យល់ថា មិនដែលមានការជួសជុល និងអភិរក្សណា ដែលធ្វើឲ្យប្រាសាទកាន់តែទ្រុឌទ្រោមទៅនោះទេ។ ផ្ទុយពីនេះ ការជួសជុល និងអភិរក្ស គឺត្រូវធានាបាននូវសុវត្ថិភាព គុណភាព អាយុកាល និងទម្រង់ដើមរបស់ប្រាសាទទាំងនោះ។
គួររម្លឹកថា ថ្មីៗនេះ មានមតិរិះគន់នៅក្នុងបណ្តាញសង្គមហ្វេសប៊ុក និងបំណងចុះត្រួតពិនិត្យប្រាសាទអង្គរវត្ត នៅកន្លែងដែលប្រទេសឥណ្ឌា ជួយជួសជុល។ មតិទាំងនោះនិយាយថា ក្រោមការជួយជួសជុលរបស់ឥណ្ឌា បានធ្វើឲ្យថ្មប្រាសាទប្រែពណ៌ និងកន្លែងខ្លះបានសឹក ដោយសារការប្រើសារធាតុគីមីមកលាងថ្មប្រាសាទជាដើម។ តបទៅនឹងការលើកឡើងនេះ អាជ្ញាធរអប្សរាបញ្ជាក់ថា មិនមែនតួប្រាសាទអង្គរទាំងមូល ឥណ្ឌាជាអ្នកជួសជុលនោះទេ គឺត្រឹមមួយផ្នែកតួចតែប៉ុណ្ណោះ ហើយការជួសជុលនោះ ក៏មិនបានប៉ះពាល់អ្វីនោះដែរ គឺថ្មទាំងនោះ ប្រែប្រួលដោយសារកត្តាធម្មជាតិតែប៉ុណ្ណោះ៕
© រក្សាសិទ្ធិដោយ thmeythmey.com