បទវិភាគ
អន្តរជាតិ
ផ្ទុះរឿងអាស្រូវពុករលួយ FIFA ដោយសារជម្លោះអាមេរិក-រុស្ស៊ី ?
× ថ្មីៗ-ប៉ារីស៖ តាំងពីថ្ងៃពុធមក សហព័ន្ធបាល់ទាត់ពិភពលោក FIFA បានរងការវាយប្រហារក្នុង រឿងអាស្រូវ យ៉ាងចាស់ដៃ។ អាជ្ញាធរស្វ៊ីសបានចាប់ខ្លួនថ្នាក់ដឹកនាំសហព័ន្ធ ៧នាក់ ជាប់សង្ស័យពីបទស៊ីរូងពុករលួយ។ អាជ្ញាធរក៏បានរឹបអូសទីស្នាក់ការFIFAនៅក្រុុងZurich ផងដែរ។ ទោះជារឿងពុករលួយបំបាក់មុខសហព័ន្ធបាល់ទាត់FIFAស្តែងៗបែបនេះក្តី ក៏ថ្ងៃសុក្រម្សិលមិញ សមាជិកសហព័ន្ធ នៅតែបោះឆ្នោតអោយប្រធានសហព័ន្ធគឺលោក Sepp Blatter ដែលកាន់កាប់តំណែង៤អាណត្តិមកនេះ បានជាប់កាន់កាប់តំណែងអាណត្តិទី៥ទៀត។ ការបោះឆ្នោតជ្រើសរើសប្រធានសហព័ន្ធម្សិលមិញបានរងការរអាក់រអួលបន្តិច ដោយសារមានការប្រកាសអាសន្នគ្រាប់បែក នៅHallenstadionជាទីកន្លែងដែលគណៈប្រតិភូសហព័ន្ធជួបជុំគ្នា។
សូមស្តាប់ការបកស្រាយរបស់ ព្រំសឿន សូលីណា ពីទីក្រុងប៉ារីស
រឿងពុករលួយស៊ីរូង មិនសំខាន់រហូតដល់ថ្នាក់ធ្វើអោយលោក Sepp Blatter ជាប្រធានសហព័ន្ធបាល់ទាត់ពិភពលោក ខ្ទាតពីតំណែងឡើយ។ ក្នុងសមាជបោះឆ្នោតរើសប្រធានសហព័ន្ធអាណត្តិថ្មី នៅថ្ងៃសុក្រម្សិលមិញ ក្នុងចំណោមសំឡេងឆ្នោតមកពីសហព័ន្ធចំនួន២០៩ ជាសមាជិករបស់Fifa លោកSepp Blatter បានទទួលសំឡេងឆ្នោតគាំទ្រ១៣៣សំឡេង ក្នុងជុំទី១ លើសគូប្រជែងរបស់លោក គឺព្រះអង្គម្ចាស់អាយុ៣៩ឆ្នាំរបស់ប្រទេសហ្ស៊កដានី Ali bin Al Hussein។ ព្រះអង្គម្ចាស់Hussein បានទទួលឆ្នោតតែ៧៣សំឡេង ហើយទ្រង់ក៏សម្រេចដកខ្លួនពីការប្រកួតជុំទី២ ជាហេតុធ្វើអោយលោកBlatter ជាប់ជាប្រធានថ្មី យ៉ាងស្វ័យប្រវត្ត។
គ្រាន់តែជាប់ឆ្នោតភ្លាម លោកSepp Blatterបានសំដែងការត្រេកអរភ្លាម និងបានសន្យាថា នឹងធ្វើអោយសហព័ន្ធFifaកាន់តែខ្លាំង សម្រាប់ប្រធានអាណត្តិក្រោយ ដែលត្រូវបន្តការងារពីរូបលោក។ មិនដឹងថា តើពាក្យដែលលោកបានសន្យាភ្លាមៗនេះ ជាការចំអកដល់សហព័ន្ធបាល់ទាត់អឺរ៉ុបដែលបានសុំអោយលោកលាពីតំណែង រឺក៏ជាការចំអកដល់តុលាការអាមេរិកនិងស្វ៊ីសដែលកំពុងស៊ើបអង្កេត បំផ្ទុះរឿងអាស្រូវពុករលួយអោយឆេះរាលដាលសប្តាហ៍នេះ។
កាលពីថ្ងៃពុធ ថ្នាក់ដឹកនាំសហព័ន្ធFIFA ៧នាក់ ត្រូវបានអាជ្ញាធរស្វ៊ីសចាប់ខ្លួន នៅក្នុងសណ្ឋាគារប្រណីតមួយ នៅក្រុងហ្ស៊ុយរិច។ ពួកគេជាប់សង្ស័យពីបទពុករលួយស៊ីរូងដែលមានដូចជា ការលាងលុយកខ្វក់ ការស៊ីសំណូកសូកប៉ាន់រាប់លានដុល្លារ ការលាក់បាំងគណនីធនាគារនៅបរទេស ការទិញអចលនទ្រព្យផ្សេងៗ ឬក៏ការប្រើប្រាស់សេវាប្រឹក្សានានា ដើម្បីកែប្រែការបង់លុយខុសច្បាប់ អោយក្លាយជាទង្វើស្របច្បាប់វិញ។ មេដឹកនាំនានានៃសហព័ន្ធ ប្រហែលជាបានទទួលសំណូក១៥០លានដុល្លារ ជាថ្នូរក្នុងការផ្តល់សិទ្ធិផ្សព្វផ្សាយពាណិជ្ជកម្មផ្សេងៗ ក្នុងពេលមានការប្រកួតបាល់ទាត់ម្តង។ ការចាប់ខ្លួនថ្នាក់ដឹកនាំFIFA នៅប្រទេសស្វ៊ីស ធ្វើឡើងតាមសំណូមពររបស់តុលាការអាមេរិក។ តុលាការស្វ៊ីស ក៏បានធ្វើការអង្កេតផ្សេងគ្នាដែរ ទាក់ទងនឹងការសម្រេចប្រគល់អោយរុស្ស៊ី និងកាតា រៀបចំការប្រកួតបាល់ទាត់ពិភពលោកឆ្នាំ២០១៨ និងឆ្នាំ២០២២ ។
រឿងអាស្រូវដុះស្និម២៥ឆ្នាំហើយ។ វាបែកធ្លាយឡើង នៅពេលដែលជនជាតិអាមេរិក Chuck Blazer ជាអតីតសមាជិកគណៈកម្មាធិការប្រតិបត្តិFIFA និងជាអតីតអគ្គលេខាធិការសហព័ន្ធបាល់ទាត់អាមេរិកខាងជើង សហការជាមួយតុលាការអាមេរិក រកភស្តុតាងអំពើពុករលួយក្នុងសហព័ន្ធFIFA។ លោក Blazer ជាប់ទោសធ្ងន់ដោយសារគេចពីការបង់ពន្ធលើប្រាក់ចំណូលរាប់សិបលានដុល្លារ ជាចំណូលខុសច្បាប់ កាលពីលោកធ្វើជាអគ្គលេខាធិការសហព័ន្ធបាល់ទាត់អាមេរិកខាងជើង។ លោកបានផ្តល់ភស្តុតាងអោយដល់ទីភ្នាក់ងារFBI នូវខ្សែអាត់សំឡេងដែលលោកថតទុកក្នុងពេលFIFA បើកកិច្ចប្រជុំផ្សេង។ ដោយសារខ្សែអាត់សំឡេងនេះ គេអាចដឹងពីការស៊ីសំណូកក្នុងសហព័ន្ធ ចំពោះការសម្រេចអោយប្រទេស ឬក៏ក្រុមហ៊ុនណាមួយ រៀបចំការប្រកួតបាល់ទាត់ពិភពលោក ឬក៏ការផ្សាយពាណិជ្ជកម្ម។
រឿងអាស្រូវចាក់ឬសក្នុងសហព័ន្ធបាល់ទាត់ពិភពលោកអស់ជាង២ទសវត្សមែន តែប្រធានសហព័ន្ធ គឺលោកSepp Blatter ជនជាតិស្វ៊ីស អាយុ៧៩ឆ្នាំ ដែល កាន់តំណែង៤អាណត្តិមកហើយ នៅតែចង់បន្តតំណែងទៀត។ លោកចង់បន្តអំណាចទៀត ប្រហែលដោយសារតែការគ្រប់គ្រងសហព័ន្ធFIFAជាង១៦ឆ្នាំមកនេះ លោកនៅមិនទាន់មានពេលវេលាគ្រប់គ្រាន់ដោះស្រាយបញ្ហាពុករលួយ ក្នុងសហព័ន្ធទេមើលទៅ។ ដូច្នេះ លោកមិនអាចលាលែងពីតំណែងតាមសំណូមពររបស់សហព័ន្ធបាល់ទាត់អឺរ៉ុបឡើយ។ លោកថែមទាំងបានដាក់ខ្លួនជា ជនរងគ្រោះនៃអំពើពុករលួយទៀតផង។ លោកអាចគិតត្រូវក៏ថាបាន ព្រោះត្បិតថា ជាប្រធានសហព័ន្ធបាល់ទាត់អន្តរជាតិមួយទាំងមូលមែន តែក៏មិនមែនមានពេលវេលាស្រួលៗ ទៅត្រួតដឹងពីសកម្មភាពគ្រប់យ៉ាងរបស់មន្ត្រីពុករលួយក្នុងសហព័ន្ធដែរ។
សម្រាប់លោកSepp Blatter អំពើពុករលួយទាំងនេះទាក់ទងតែបុគ្គលប៉ុណ្ណោះ មិនមែនជារឿងសហព័ន្ធបាល់ទាត់FIFAទាំងមូលទេ។ ប្រហែលមានអ្នករិះគន់ថា លោក Blatter ក្រាញតំណែងមិនតិចទេ ព្រោះថា អ្នកណាទៅ ដែលចង់លាលែងតំណែងល្អៗ ពិសេសតំណែងក្នុងសហព័ន្ធរៀបចំបាល់ទាត់ ដែលសំបូរក្រុមហ៊ុនឧបត្ថម្ភការផ្សាយពាណិជ្ជកម្ម សំបូរប្រាក់កាសហូរហៀរនោះ? សហព័ន្ធជាកន្លែងខ្លាញ់ ដែលគ្រប់គ្នាសម្លឹងសឹងជ្រុះគ្រាប់ភ្នែក។ មិនពិបាកឆ្ងល់ទេពេលដែលសហព័ន្ធជាសមាជិកFIFA ជាច្រើន នៅតែគាំទ្របេក្ខភាពលោកBlatterអោយ បន្តអាណត្តិថ្មីទៀត។ ក្នុងការបោះឆ្នោតម្សិលមិញនេះ អ្វីដែលគួរភ្ញាក់ផ្អើលដែរនោះ គឺថា សូម្បីតែសហព័ន្ធបាល់ទាត់ហ្ស៊កដានីក៏មិនបានបោះឆ្នោតអោយ ព្រះអង្គម្ចាស់Hussein ជាជនរួមជាតិ បានជាប់តំណែងប្រធានFIFA ដែរ។ គ្រប់គ្នាប្រហែលមិនចង់បានមនុស្សផ្សេង មកកាន់កាប់ផ្លាស់ប្តូររបៀបរបប ប្រពៃណីការងាររាប់ឆ្នាំមកនេះទេមើលទៅ។ ទោះយ៉ាងនេះក្តី ក្រុមហ៊ុនឧបត្ថម្ភការផ្សាយពាណិជ្ជកម្មជាច្រើន ដូចជា Nike, Visa, Adidas រឺក៏ Coca-Cola បានទាមទារអោយសហព័ន្ធFIFA កំចាត់អំពើពុករលួយអោយជ្រះស្រឡះ។
បើមើលជ្រុងមួយទៀតវិញ ការដែលអាមេរិកស៊ើបអង្កេតអំពើពុករលួយរបស់មន្ត្រីFIFA អាចអោយគេគិតថា ដោយសារតែអាមេរិកមិនពេញចិត្តនឹងFIFAដែលបានប្រគល់ការរៀបចំការប្រកួតបាល់ទាត់ពិភពលោកឆ្នាំ២០១៨ អោយទៅប្រទេសរុស្ស៊ីទេ។ រុស្ស៊ីនិងអាមេរិកសឹងតែហុតឈាមគ្នាក្នុងឆាកនយោបាយអ៊ុយក្រែនទៅហើយ សហព័ន្ធFIFA បែរជាហ៊ានបំបាក់មុខអាមេរិក ដោយព្រមអោយរុស្ស៊ីចេញមុខរៀបចំការប្រកួតបាល់ទាត់លំដាប់ពិភពលោកទៀត។ ដោយសារយល់ឃើញដូចនេះ ប្រធានាធិបតីរុស្ស៊ី វ្ល៉ាឌីមៀ ពូទីន បានចោទអាមេរិកថា ប៉ុនប៉ងមិនអោយលោកSepp Blatter បន្តតំណែងអាណត្តិថ្មីទៀត។ ម្សិលមិញ លោកSepp Blatter បានចំអកដែរថា បើសិនជាប្រទេសទាំង២ផ្សេងនោះ ពោលគឺរុស្ស៊ី និងកាតា មិនជាប់ឈ្មោះជាប្រទេសរៀបចំការប្រកួតបាល់ទាត់ពិភពលោកទេនោះ នោះក៏សហព័ន្ធមិនដល់ថ្នាក់នេះដែរ។ លោកSepp Blatter ប្រហែលចង់ចំអកអាមេរិកនិងអង់គ្លេស ព្រោះប្រទេសទាំង២នេះប្រហែលក្តៅចិត្តមិនតិចទេ ដែលពុំបានទទួលងាររៀបចំការប្រកួតបាល់ទាត់ នៅឆ្នាំ២០២២ ៕
© រក្សាសិទ្ធិដោយ thmeythmey.com