ជាតិ
សង្គមជាតិ
World Vision ព្រមានពីភាពស្មុគស្មាញនៃបញ្ហាការជួញដូរមនុស្សនៅកម្ពុជា
× បើទោះបីជាអាមេរិកបានផ្តល់ចំណាត់ថ្នាក់លេខ២ក្នុងបញ្ជីតាមដាន ស្តីពីការជួញដូរមនុស្ស មកឲ្យប្រទេសកម្ពុជាក៏ដោយ ក៏ប៉ុន្តែបញ្ហានេះនៅតែមានភាពស្មុគស្មាញសម្រាប់កម្ពុជា និងទាមទារឲ្យកិច្ចខិតខំប្រឹងប្រែងពីគ្រប់ភាគីពាក់ព័ន្ធ។
សេចក្តីប្រកាសព័ត៌មានរបស់អង្គការទស្សនៈពិភពលោកWorld Vision បានលើកឡើងថា កម្ពុជាបានធ្វើសកម្មភាពជាច្រើន ដើម្បីប្រឆាំង និងដោះស្រាយបញ្ហាជួញដូរមនុស្ស នៅប៉ុន្មានឆ្នាំចុងក្រោយនេះ ប៉ុន្តែកម្ពុជានៅតែស្ថិតនៅក្នុងចំណាត់ថ្នាក់លេខ២នៅក្នុងបញ្ជីតាមដាន ដែលការណ៍នេះ សរបញ្ជាក់ថា កិច្ចខិតប្រឹងប្រែងជាច្រើនទៀត គួរតែត្រូវបានរៀបចំឡើង។
អ្នកគ្រប់គ្រងកម្មវិធីការការពារកុមាររបស់World Vision អ្នកស្រីAimyleen Gabriel បានមានប្រសាសន៍ថា៖«ការជួញដូរមនុស្សនៅកម្ពុជាកាន់តែមានភាពស្មុគស្មាញទៅៗ និងសម្ងាត់ ដូច្នេះទាមទារឲ្យមានការដោះស្រាយ និងឆ្លើយតបជាបន្ទាន់ តាមរយៈការបង្កើនធនធានមនុស្ស ការគាំទ្រទាំងផ្នែកបច្ចេកវិទ្យា និងហិរញ្ញវត្ថុ»។ អ្នកស្រីបន្តថា៖«តួអង្គដែលសំខាន់ក្នុងការប្រឆាំងការជួញដូរមនុស្សទាំងនៅថ្នាក់ជាតិ និងថ្នាក់ក្រោមជាតិ គឺកិច្ចសហការ និងការចូលរួមរបស់អង្គការសង្គមស៊ីវិល និងសហគមន៍»។
ទោះយ៉ាងណា លំដាប់ថ្នាក់លេខ២នេះ បានទទួលការស្វាគមន៍ពីលោក Stefan Stoyanov នាយកគ្រប់គ្រង់គោលនយោបាយជួញដូរមនុស្សប្រចាំតំបន់របស់ World Vision។ លោកថា៖«ចំណាត់ថ្នាក់នេះ គឺឆ្លុះបញ្ចាំងពីភាពវិជ្ជមានដែលរដ្ឋាភិបាលបានធ្វើកន្លងមក ជាពិសេសការអនុម័តនៃផែនការជាតិប្រឆាំងការជួញដូរ»។ ប៉ុន្តែរបាយការណ៍នោះក៏បានព្រមានដែរថា ផែនការជាតិប្រឆាំងការជួញដូរនេះ ត្រូវតែអនុវត្តន៍ឲ្យបានជោគជ័យ ដើម្បីទប់ស្កាត់ការជួញដូរ។ នេះជាការបញ្ជាក់របស់លោក Stoyanov។
នៅអាស៊ីបូព៌ា ម្នាក់ក្នុងចំណោមជនរងគ្រោះបីនាក់គឺជាកុមារ។ កុមារក៏ត្រូវបានរងផលប៉ះពាល់ផងដែរ ដូចជាការបង្ខំឲ្យបោះបង់ចោលការសិក្សាដើម្បីរកលុយមកផ្គត់ផ្គង់ជីវភាពគ្រួសារ នៅពេលដែលឪពុកម្តាយរបស់ពួកគេត្រូវបានគេជួញដូរ។
តាមរយៈសេចក្តីប្រកាសព័ត៌មាន ដំណោះស្រាយដ៏ល្អបំផុតដើម្បីឆ្លើយតបទៅនឹងការជួញដូរមនុស្ស គឺការពង្រឹងយន្តការថ្នាក់ជាតិដែលមានស្រាប់ និងការកំណត់អាណត្តិឲ្យបានច្បាស់លាស់នៃយន្ដការរបស់រដ្ឋាភិបាលក្នុងតំបន់ ដូចជាក្រុមប្រឹក្សាឃុំសង្កាត់សម្រាប់ស្ត្រី និងកុមារ ព្រមទាំងការបង្កើនធនធានចាំបាច់នានាទាំងធនធានមនុស្ស បច្ចេកវិទ្យា និងហិរញ្ញវត្ថុ ដើម្បីប្រឆាំងនឹងការជួញដូរមនុស្ស ការពារកុមារពីការជួញដូរ និងរូបភាពនៃការរំលោភបំពានដទៃទៀត៕
Tag:
ការជួញដូរមនុស្ស
World Vision
© រក្សាសិទ្ធិដោយ thmeythmey.com