ជាតិ
សុវត្តិភាព ចរាចរណ៍
តុលាការនៅតែពុំទាន់ដោះស្រាយសំណងភាគីគ្រួសារជនរងគ្រោះចររាចរណ៍នៅបាវិត
× ភ្នំពេញ៖ តុលាការខេត្តស្វាយរៀងពុំទាន់ដោះស្រាយសំណងរដ្ឋប្បវេណីដល់ភាគីគ្រួសារ រងគ្រោះ ករណីគ្រោះថ្នាក់ចររាចរណ៍ដ៏សោកសង្វេគរវាងរថយន្តក្រុងរបស់ក្រុមហ៊ុនឯកជនជាមួយនឹងរថយន្តទួរីស ១៥កៅអីដែលដឹកកម្មករកម្មការិនីរោងចក្រ កាលពីព្រឹកថ្ងៃទី១៩ ខែឧសភា ឆ្នាំ២០១៥ នៅឡើយ។ ចំណោមកម្មកសរុបចំនួន ៣៨នាក់ យ៉ាងហោចណាស់កម្មករ ១៦នាក់បានស្លាប់ភ្លាមៗ និងជាង ២០នាក់ផ្សេងទៀតរងរបួសធ្ងន់ស្រាលក្នុងករណីគ្រោះថ្នាក់ដ៏រន្ធត់ ដែលមិនដែលធ្លាប់មាននៅស្រុកស្វាយទៀប ខេត្តស្វាយរៀង។
អស់ជាង ៣ខែហើយ ភាគីគ្រួសារជនរងគ្រោះ នៅតែទន្ទឹងចាំសាលក្រមរបស់តុលាការ ដើម្បី បង្គាប់ឲ្យម្ចាស់ក្រុមហ៊ុនរថយន្តបង្កហេតុផ្តល់សំណងរដ្ឋប្បវេណី។ ទាំងភាគីគ្រួសារជនរង គ្រោះ ទាំងអង្គក្រៅរដ្ឋាភិបាល ដែលកំពុងរង់ចាំ និងតាមដាននីតិវិធីតុលាការ ហាក់មាន អារម្មណ៍ខកជាងខ្លាំង ចំពោះនីតិវិធីរបស់តុលាការ។
តំណាងភាគីគ្រួសារជនរងគ្រោះ និងត្រូវជាបងស្រីរបស់អ្នកសា្លប់ម្នាក់ឈ្មោះ សែម ដានី អ្នកស្រី សែម ផារី អាយុ២៧ឆ្នាំ ត្អូញតែ្អរថា ជិតដល់ខួប ១០០ឆ្នាំ នៃមរណភាពប្អូនស្រីនាង ហើយ តុលាការនៅតែមិនទាន់ចេញសេចក្តីសម្រេចទាមទារសំណងពីក្រុមហ៊ុន ឲ្យភាគីគ្រួសារជនគ្រោះទាំងអស់ រួមទាំងគ្រួសារនាងដែរ។ «ខ្ញុំគ្មានលុយធ្វើបុណ្យ ដល់ប្អូនស្រីទេ ព្រោះប្រាក់ខែខ្ញុំចិញ្ចឹមកូនផង ប្អូនផងមិនគ្រប់ទេ។ ខ្ញុំរង់ចាំសំណងពីក្រុមហ៊ុន តែតុលាការតែងសន្យាថា ដោះស្រាយថ្ងៃនេះ ថ្ងៃនោះ តែលទ្ធផលស្ងាត់តែម្តង»។ នេះជាការរៀបរាប់ពីភាពខកចិត្តរបស់អ្នកស្រី សែម ផារី ដែលចង់ឲ្យតុលាការពន្លឿននីតិវិធីដំណោះស្រាយ។
បើតាមតំណាងភាគីរងគ្រោះក្នុងឃុំពោធិ៍រាជ ស្រុកស្វាយជ្រំ ខេត្តស្វាយរៀងរូបនេះ គ្រួសារភាគីរងរបួសប្តឹងទាមទារសំណង ១ម៉ឺនដុល្លារអាមេរិក រីឯភាគីគ្រួសារអ្នកស្លាប់ទាមទារ ២ម៉ឺនដុល្លារអាមេរិក មួយនាក់ៗ ភាគីក្រុមហ៊ុនរថយន្តក្រុង។
អ្នកសម្របសម្រួលអង្គការលីកាដូប្រចាំខេត្តស្វាយរៀង និងជាអ្នកតាមដានរឿងករណីនេះ លោក នុត បូពណ្ណារ័ត្ន បានខកចិត្តនឹងនីតិវិធីរបស់តុលាការដែរ ដោយលោកលើកឡើងថា តុលាការហាក់រកដំណោះស្រាយដល់ភាគីរងគ្រោះយឺតយ៉ាវ។ «តុលាការបានកោះហៅ ភាគីម្ចាស់ក្រុមហ៊ុនឲ្យចូលខ្លួនដោះស្រាយជាពីរបីលើកដែរ តែនីតិវិធីហាក់មិនមានលទ្ធផល ដោយសារម្ចាស់ក្រុមហ៊ុនមិនចូលខ្លួនដោះស្រាយ។ ក្នុងស្ថាននេះ តុលាការជួយចេញដីកានាំ ខ្លួន ភាគីបង្កហេតុ ដោយសារពួកគេប្រឆាំងនឹងដីកាកោះរបស់តុលាការ»។ នេះជាពន្យល់ របស់អ្នកសម្របសម្រួលអង្គការលីកាដូប្រចាំខេត្តស្វាយរៀង ដែលបាន និងកំពុងតាមដាន នីតិវិធីតុលាការ។
គួររម្លឹកថា ករណីគ្រោះថ្នាក់ចរាចរណ៍ដ៏សោកសង្វេគ អ្នកបើកបរជនជាតិវៀតណាម លោក Le vanghing អាយុ ៤៣ ឆ្នាំបានបើកបររថយន្ដក្រុងពីទីក្រុងហូជីមិញមករាជធានីភ្នំពេញ ព្យាយាមបើកវ៉ារថយន្តមួយគ្រឿងក្នុងល្បឿនលឿន រួចក៏ជ្រុលទៅបុករថយន្តដឹកកម្មកររោងចក្រ។ តុលាការខេត្តស្វាយរៀងបានចោទលោក Le vanghing ពីបទបើកបរដោយធ្វេសប្រហែស បទបង្កគ្រោះថ្នាក់ដល់អ្នកដទៃដោយចេតនា តាមច្បាប់ចរាចណ៍ផ្លូវគោកប្រទេសកម្ពុជា។ ដោយឡែក បុរសពីរផ្សេងទៀត ត្រូវចោទពីបទមានគំនិតលុបបំបាត់ភស្តុតាង ដោយពួកគេបានព្យាយាមទៅដោះស្លាកលេខ និងសម្ភារៈមួយចំនួនទៀតក្នុងរថយន្តក្រុងនោះ ក្រោយពីបង្កគ្រោះថ្នាក់៕
© រក្សាសិទ្ធិដោយ thmeythmey.com