អន្តរជាតិ
សង្គ្រាមអ៊ុយក្រែនអាចផុតរលត់ពេលរុស្ស៊ីងាកទៅរកសមរភូមិស៊ីរី
× យន្តហោះចម្បាំងរុស្ស៊ីមិនតិចជាង ៥០គ្រឿង និងទ័ពមិនក្រោម៥០០នាក់ឡើយ ដែលកំពុងឈរជើងនៅមូលដ្ឋានយោធារបស់ខ្លួនក្នុងទឹកដីស៊ីរីដើម្បីច្បាំងកម្ចាត់ក្រុមរដ្ឋឥស្លាមនិងឆ្លៀតសំពោងក្រុមឧទ្ទាមគាំទ្រដោយអាមេរិកផង ។ តាមគម្រោងរដ្ឋាភិបាលក្រេមឡាំង អន្តរាគមន៍នៅមជ្ឈិមបូព៌ាមិនមែនតែមួយឆាវទេ តែជាយុទ្ធសាស្ត្រវែងឆ្ងាយដើម្បីប្រមូលផ្តុំឥទ្ធិពលរុស្ស៊ីឡើងវិញ។ អាមេរិកទំនងមិនអរប៉ុន្មានទេដែល រុស្ស៊ី ងាកមកមជ្ឈិមបូព៌ាមកដណ្តើមប្រយោជន៍ខ្លួន តែរដ្ឋាភិបាលអ៊ុយក្រែនទំនងមានសង្ឃឹមច្រើនថាក្រុមឧទ្ទាមភាគខាងកើតធ្លាក់ដៃនិងបន្ទន់ឥរិយាបថព្រោះគេជឿថារុស្ស៊ីមិនអាចទ្រាំលេងក្នុងសមរភូមិពីរក្នុងពេលតែមួយបានឡើយ។
សូមស្តាប់ការបកស្រាយរបស់លោក សៅ ផលនិស្ស័យ
រយៈពេលពេញមួយខែហើយ គេមិនឃើញនិងលឺគ្រាប់ផ្លោងឆ្លើយឆ្លងគ្នាខ្លាំងរវាងក្រុមឧទ្ទាមភាគខាងកើតនិងកងម្លាំងរដ្ឋាភិបាលអ៊ុយក្រែនដូចមុនៗទេ។ ការប្រយុទ្ធធ្លាក់ចុះ ត្រឹមរប៉េះរប៉ោះដោយកន្លែង ប្រៀបបានដូចជាគូប្រយុទ្ធធុនទ្រាន់នឹងការសង្គ្រាមបង្ហូឈាមគ្នានេះហើយ។ គ្មានអ្នកធ្លាប់រំពឹងដូច្នេះទេ កន្លងមកទោះមានកិច្ចព្រមព្រៀង Minks ដែលបានចូលជាធរមានថ្ងៃ ១៥ខែកុម្ភៈក៏ដោយ ក៏ក្រុមឧទ្ទាមនិងក្រុមទាហានក្រុងគៀវ នៅតែប្រឹងប្រយុទ្ធគ្នាដែរ។ ប្រធានាធិបតីអ៊ុយក្រែនលោក Petro Poroshenko បានប្រកាសថាការអនុវត្តកិច្ចព្រមព្រៀងពិតប្រាកដបានចាប់ផ្តើមហើយនៅភាគខាងកើតអ៊ុយក្រែ ។ ក្រុមអ្នកអង្កេតការណ៍ថា សព្វាវុធធុនធ្ងន់ត្រូវបានគេជញ្ជូនចេញបន្តិចម្តងៗពីទីតាំងជួរមុខហើយ ដោយសកម្មភាពនេះជាការបង្ហាញឆន្ទៈក្នុងការអនុវត្តកិច្ចព្រមព្រៀងដែលមានស្រេចឲ្យបានពេញលេញផង។
ការថមថយនៃកម្តៅនិងការប្រយុទ្ធគ្នារវាងគូសត្រូវទាំងពីរនេះ បានក្លាយជាសំណួរ ហេតុអ្វីក្រុមឧទ្ទាមហាក់ដូចជាបន្ទន់ឥរិយាបទជាងមុនដូច្នេះ? ពួកគេចង់ធុញទ្រាន់នឹងសង្គ្រាមបង្ហូរឈាមគ្នាឬ មួយក្រុមឧទ្ទាមចង់បានសន្តិភាព? ឬក៏ក្រុងគៀវបានធ្វើសម្បទានតម្រូវចិត្តក្រុមឧទ្ទាមរួចហើយ? ។ តាមពិតទៅ មិនមែនដូច្នេះទេ។ ក្រុងគៀវមិនទាន់សម្រេចផ្តល់ស្វ័យភាពពេញលេញដល់ខេត្តភាគខាងកើត តាមការទាមទារនៅឡើយទេ ហើយក្រុមឧទ្ទាមក៏មិនបានប្រាប់ថាខ្លួនពេញចិត្តនឹងបញ្ចប់សង្គ្រាមដែរ។ ប៉ុន្តែ ក្រុមឧទ្ទាមទន់ជំហរបន្តិច មិនសូវបាញ់ផ្លោងគ្រាប់ចុះឡើងដូចមុន ក៏ព្រោះថារដ្ឋាភិបាលរុស្ស៊ីដែលធ្លាប់គាំទ្រផ្តល់ជំនួយ ហិរញ្ញវត្ថុផង និងសព្វាវុធដល់ក្រុមនេះផងនោះកំពុងងាកឆ្ងាយទៅរកតំបន់មជ្ឈិមបូព៌ាឯងណោះវិញ។
ជារឿងដែលគួរឲ្យភ្ងាក់ផ្អើលដែរ ព្រោះ រុស្ស៊ីកម្របញ្ជូនទ័ពទៅច្បាំងក្រៅប្រទេសណាស់ក្នុងប្រវត្តិសាស្ត្ររុស្ស៊ី។ នេះបានន័យថា លោក ពូទីន បញ្ជាទ័ពទៅស៊ីរីដើម្បីវាយប្រហារក្រុមភេរវជនរដ្ឋឥស្លាម និងឆ្លៀតកម្ទេចទីតាំងក្រុមឧទ្ទាមដែលគាំទ្រដោយអាមេរិកផងជារឿងសំខាន់បំផុតមួយ ចាប់តាំងពីឆ្នាំ ១៩៧៩ នៅពេលដែលប្រធានាធិបតីសូវៀត លោក Leonid Brezhnev ដែលបញ្ជាទ័ពឲ្យឈ្លានពានអាហ្វហ្កានីស្ថានដែរ។
ការថមថយនៃការគាំទ្រក្រុមឧទ្ទាមភាគខាងកើត មិនមែនជារឿងចៃដន្យ ដែលរុស្ស៊ីធ្វើដោយគ្មានគម្រោងទុកមុនឡើយ។ ហើយការដកការគាំទ្រខ្លះនេះមិនមែនមានន័យថាលោក ពូទីន បញ្ឈប់គោលនយោបាយបង្កើតរុស្ស៊ីជំនាន់ថ្មី យកលំនាំតាមសហភាពសូវៀតដែរ។ តែរបបដឹកនាំក្រេមឡាំង ចាំបាច់ត្រូវងាកមកថែរក្សា ប្រយោជន៍ខ្លួនសម្រាប់រយៈពេលវែងនៅមជ្ឈិមបូព៌ានេះសិន។ ហើយការដកដៃបន្តិចនេះ ក៏ជាយុទ្ធសាស្ត្ររបស់លោក ពូទីន ក្នុងការបញ្ចប់ភាពឯកោរបស់រុស្ស៊ីនិងជំរុញលោកខាងលិចឲ្យដកទណ្ឌកម្មប្រឆាំងរុស្ស៊ីដែរ។ ជម្លោះថមថយកម្តៅ បញ្ជាក់ពីឆន្ទៈរុស្ស៊ីក្នុងការជួយបញ្ចប់ជម្លោះ ហើយលោកខាងលិចមួយចំនួនបង្ខំចិត្តដាក់ទណ្ឌកម្មលើរុស្ស៊ី នោះនឹងមានលេសលើកទណ្ឌកម្ម។
វាជារឿងមិនអាចប្រកែកបានដែល ការចូលខ្លួនសមរភូមិពីរ ក្នុងពេលតែមួយជារឿងលំបាកបំផុតសម្រាប់លោក ពូទីន ។ រុស្ស៊ីដណ្តើមបានទឹកដី Crimea ពីអ៊ុយក្រែនហើយ ហើយក្រុងម៉ូស្គូក៏ដឹងជាស្រេចហើយដែរ ទោះរុស្ស៊ីមិនផ្គត់ផ្គង់ក្រុមឧទ្ទាមភាគខាងកើតច្រើនដូចមុន ក៏ក្រុមឧទ្ទាមនៅតែបន្តដាក់សម្ពាធឲ្យរដ្ឋបាលក្រុងគៀវធ្វើសម្បទានបន្ថែមដែរជុំវិញបញ្ហាស្វ័យភាពតំបន់នោះ។
នៅពេលនេះរឿងអាទិភាពដែលរុស្ស៊ីត្រូវផ្តោតលើ គឺយុទ្ធសាស្ត្រពង្រឹងឥទ្ធិពលរបស់រុស្ស៊ីឲ្យខ្លាំងនៅមជ្ឈិមបូព៌ាដោយការពាររបបដឹកនាំលោក អាសាដ។ តាមរបាយការណ៍ក្រសួងការពារជាតិរុស្ស៊ីកន្លងមក រុស្ស៊ីមិនមែនប្រឡូកក្នុងសង្គ្រាមស៊ីរីរយៈពេលខ្លីឡើយ។ មូលដ្ឋានទ័ពត្រូវបានគេរៀបចំយ៉ាងរឹងមាំ ហើយសម្ភារៈប្រើប្រាស់និង បរិក្ខាយោធាត្រូវបានដំឡើង និងពង្រាយសម្រាប់បំពេញប្រតិបត្តិការក្នុងរយៈពេលយូរអង្វែង។ គេឃើញទ័ពតិចបំផុត៥០០នាក់ និងយន្តហោះចម្បាំង រួមជាមួយឧទ្ធម្ភាគចក្រតិចបំផុត៥០គ្រឿងឈរជើង នៅមូលដ្ឋានទ័ពរបស់រុស្ស៊ីក្នុងប្រទេសស៊ីរី៕
© រក្សាសិទ្ធិដោយ thmeythmey.com