ជាតិ
សង្គមអន្តរជាតិ
កម្ពុជាអំពាវនាវកូរ៉េខាងជើងឲ្យគោរពសេចក្តីសម្រេចចិត្តក្រុមប្រឹក្សាសន្តិសុខ UN
× ភ្នំពេញ៖ កម្ពុជាអំពាវនាវកូរ៉េខាងជើងឲ្យគោរពតាមសេចក្តីសម្រេចចិត្តក្រុមប្រឹក្សាសន្តិសុខ UN ក្រោយពីប្រទេសសមាជិកទាំង ១៥ នៃក្រុមប្រឹក្សាសន្តិសុខអង្គការសហប្រជាជាតិ (UN) បានប្រជុំគ្នាថ្កោលទោស ការសាកល្បងគ្រាប់បែកបរមាណូរបស់ទីក្រុងព្យុងយ៉ាង និងគំរាមបន្ថែមទណ្ឌកម្ម ទៅលើរដ្ឋាភិបាលលោក គីម ជុងអ៊ុន កាលពីថ្ងៃទី៦ មករា ឆ្នាំ២០១៦នេះ។
ក្រសួងការបរទេស និងសហប្រតិបត្តិការអន្តរជាតិ បានចេញថ្លែងការណ៍ នៅថ្ងៃទី៨ ខែមករា ឆ្នាំ២០១៦ ព្រួយបារម្ភនឹងដំណើរការជាថ្មីម្ដងទៀត នូវការសាកល្បងនុយក្លេអ៊ែរបស់រដ្ឋាភិបាលនៃសាធារណរដ្ឋប្រជាមានិតប្រធិបតេយ្យកូរ៉េ។ ក្រសួងបរទេសកម្ពុជាចាត់ទុកថា ទង្វើនេះ បានរំលោភយ៉ាងច្បាស់ទៅលើសេចក្តីសម្រេចចិត្តរបស់ក្រុមប្រឹក្សាសន្តិសុខ UN និងបង្កការគំរាមកំហែងយ៉ាងធ្ងន់ធ្ងរដល់សន្តិភាព សន្តិសុខ និងសេ្ថរភាពនៅក្នុងតំបន់។
កម្ពុជាបានអំពាវនាវសាធារណរដ្ឋប្រជាមានិតប្រជាធិបតេយ្យកូរ៉េ ដោយទទូចតាមសេចក្តីថ្លែងការណ៍ទូតឲ្យគោរពសេចក្ដីសម្រេចចិត្តរបស់ក្រុមប្រឹក្សាសន្តិសុខអង្គការសហប្រជាជាតិ និងកាតព្វកិច្ចអន្តរជាតិពាក់ព័ន្ធទាំងអស់ ព្រមទាំងប្ដេជ្ញាចិត្តរបស់ខ្លួន ក្នុងការលុបបំបាត់ នុយក្លេអ៊ែនៅឧបទ្វីបកូរ៉េផងដែរ៕
Tag:
កូរ៉េខាងជើង
អង្គការសហប្រជាជាតិ
© រក្សាសិទ្ធិដោយ thmeythmey.com