ជាតិ
នយោបាយជាតិ
សម្តេច ហ៊ុន សែន និងឯកឧត្តម កឹម សុខា ចរចាគ្នា ពេលលោក សុន ឆ័យ កំពុងថ្លែងក្នុងសភា
×
ជាការជួបគ្នាដ៏កម្ររវាងប្រធានគណបក្សប្រជាជនកម្ពុជា និងប្រធានស្តីទីគណបក្សសង្គ្រោះជាតិនៅថ្ងៃពុធនេះ។ ជំនួបនេះ ធ្វើឲ្យមានការចាប់អារម្មណ៍ពីសំណាក់អ្នកតាមដានស្ថានការណ៍នយោបាយខ្មែរ។ ប្រធានបទនៃជំនួបរវាងសម្តេច ហ៊ុន សែន និងឯកឧត្តម លោក កឹម សុខា គ្មានមន្ត្រីណាមួយដឹងឡើយ។
ពេលដែលលោក សុន ឆ័យ កំពុងតែថ្លែងនៅក្នុងកិច្ចប្រជុំរដ្ឋសភា សម្តេច ហ៊ុន សែន បានចេញពីកៅអីរបស់ខ្លួន ដើរទៅជួបឯកឧត្តម កឹម សុខា នៅកៅអីជួរខាងស្តាំនៃបន្ទប់ប្រជុំសភានៅថ្ងៃនេះ។ ឯកឧត្តម កឹម សុខា ក៏បានក្រោកឈរជជែកជាមួយប្រមុខរដ្ឋាភិបាលប្រមាណជា ៤ ទៅ ៥ នាទី។ តែនៅក្នុងជំនួបនោះ ដោយសារតែពេលលោក សុន ឆ័យ តំណាងរាស្ត្រគណបក្សសង្គ្រោះជាតិ កំពុងនិយាយក្នុងអង្គប្រជុំសភាអំពីការយកលុយពីអ្នកដំណើរនៅផ្លូវជាតិលេខ ៤ ទើបសំឡេងនៃការពិភាក្សារវាងសម្តេច ហ៊ុន សែន និងឯកឧត្តម កឹម សុខា មិនអាចឮដល់តំណាងរាស្ត្រដទៃទៀត។
លោក កង គឹមហាក់ តំណាងរាស្ត្រគណបក្សសង្គ្រោះជាតិ ដែលមានវត្តមាននៅក្នុងកិច្ចប្រជុំរដ្ឋសភានោះ ហើយដែលបានថតសកសម្មភាពលោកប្រមុខដឹកនាំបក្សទាំងពីរចរចាគ្នាដែរនោះ បញ្ជាក់ថា ខ្លួនមិនដឹងថា សម្តេច ហ៊ុន សែន និងឯកឧត្តម កឹម សុខា លើកឡើងបញ្ហាអ្វីជជែកជាមួយគ្នានោះទេ។« គ្រាន់តែខ្ញុំគិតខ្លួនឯងទេថា ពួកគាត់ប្រហែលជានិយាយពីបញ្ហានយោបាយបច្ចុប្បន្ន។ ខ្ញុំមិនអាចបញ្ជាក់ថា រឿងអ្វីមួយឲ្យច្បាស់ទេ ព្រោះពេលនោះឯកឧត្តម សុន ឆ័យ កំពុងនិយាយ»។ បើទោះបីយ៉ាងណា លោក កង គឹមហាក់ កត់សម្គាល់ថា ក្រោយពីជំនួបរវាងលោកទាំងពីរ ប្រមុខរដ្ឋាភិបាលបានសម្រេចឈប់យកលុយពីអ្នកធ្វើដំណើរតាមផ្លូវជាតិលេខ ៤ ចាប់ពីថ្ងៃ ១២ យប់នេះតទៅ។
ជាមួយគ្នានេះ លោក រៀល ខេមរិន្ទ្រ តំណាងរាស្ត្រគណបក្សសង្គ្រោះជាតិបានថ្លែងថា ដោយសារលោកនៅឆ្ងាយពីសម្តេច ហ៊ុន សែន និងឯកឧត្តម កឹម សុខា លោកមិនដឹងពីប្រធានបទនៃការជជែកគ្នារវាងលោកទាំងពីរទេ។«ខ្ញុំឃើញសម្តេច ហ៊ុន សែន គាត់និយាយអមនឹងកាយវិការចុះឡើងជាមួយឯកឧត្តម កឹម សុខា។ តែខ្ញុំគ្រាន់តែថតសកម្មភាព តែមិនដឹងប្រធានបទដែលគាត់និយាយទេ»។ នេះជាការបញ្ជាក់របស់លោក រៀល ខេមរិន្ទ្រ។
សូមទស្សនាវីដេអូខាងក្រោម៖
© រក្សាសិទ្ធិដោយ thmeythmey.com