ជាតិ
ប្រវត្តិនៃបទចម្រៀង «ឱ ព្រះចន្ទ្រាអើយ»
×
លោក ឃុត សុខឿន នឹងជំរាបជូនប្រិយមិត្តអ្នកស្តាប់ នូវទំនាក់ទំនងរបស់បទចម្រៀងជប៉ុនមួយបទដែលមានចំណងជើងថា "Lemon- zukiyo-no Sanpo-michi និង ទៅនឹងបទចម្រៀងខ្មែរដែលមានចំណងជើងថា "ឱ ព្រះចន្ទ្រាអើយ" ។
នៅថ្ងៃនេះខ្ញុំនឹងនាំអារម្មណ៍មិត្តអ្នកស្តាប់ ត្រឡប់ទៅកាន់ទសវត្សរ៍ឆ្នាំ ១៩៦០ ជាថ្មីម្តងទៀតដោយចាក់ជូនមិត្តអ្នកស្តាប់នូវបទចម្រៀងជប៉ុនមួយបទ ដែលមានចំណង ជើងថា Lemon- zukiyo-no Sanpo-michi ។
តាមរយៈបទចម្រៀងជប៉ុនមួយបទនេះ ខ្ញុំជឿថា មិត្តអ្នកស្តាប់ពិតជាធ្លាប់បានឮ ឬធ្លាប់បានស្តាប់បទចម្រៀងខ្មែរមួយបទ ដែលមានលំនាំដូចគ្នានេះមិនខាន។ ប៉ុន្តែមុននឹង ជំរាបមិត្តអ្នកស្តាប់អំពីបទចម្រៀងខ្មែរមួយបទនោះ ខ្ញុំសូមជំរាបជូនមិត្តអ្នកស្តាប់អំពីបទ ចម្រៀងជប៉ុននេះបន្តិចសិន។
បទចម្រៀងជប៉ុនដែលលោកអ្នកកំពុងស្តាប់នេះមានចំណងជើងជាភាសាខ្មែរថា "ដើរតាម ផ្លូវក្នុងចំការក្រូចឆ្នារក្រោមពន្លឺចន្ទ្រពេញបរមី" ។ បទចម្រៀងនេះនិយាយអំពីគូស្នេហ៍ថ្មោងថ្មីមួយគូ ដែលទើប សារភាពក្តីស្នេហ៍ប្រាប់គ្នាទៅវិញទៅមក នៅតាមផ្លូវលំមួយក្នុងចំការក្រូចឆ្មារ។ ពេលរាត្រី នៅពេល ដែលពួកគេដើរនៅលើផ្លូវលំនោះម្តងទៀត អនុស្សាវរីយ៍របស់ពួកគេ ក៏លេចឡើងជាថ្មី។ បេះដូងរបស់ពួកគេ ចាប់ផ្តើមញាប់ញ័រ នៅពេលនោះដែរ។ ផ្លែក្រូចឆ្មារដែលនៅលើដើម សាយក្លិនក្រអូបភាយ ធ្វើអោយស្នេហាកាន់តែផ្អែមល្ហែម និង ស្និទ្ធស្នាលថែមទៀត។
បទចម្រៀង Lemon- zukiyo-no Sanpo-michi ច្រៀងដោយអ្នកចម្រៀងដ៏ល្បីរបស់ជប៉ុន ឈ្មោះ Harumi Miyako។ បទចម្រៀងនេះ និពន្ធទំនុកច្រៀងដោយ So Nishizawa និពន្ធបទភ្លេងដោយ Shosuke Ichikawa។ បទចម្រៀងនេះចេញលក់នៅឆ្នាំ ១៩៦៧ ។
ដូចបទចម្រៀងជប៉ុនមួយចំនួនទៀតដែរ បទចម្រៀង Lemon- zukiyo-no Sanpo-michi បានក្លាយជាបទចម្រៀងដ៏ល្បីនៅក្នុងតំបន់។ នៅឆ្នាំ ១៩៦៩ អ្នកចម្រៀងចិនម្នាក់ឈ្មោះ ចាវ ស៊ូយ៉ុង បានច្រៀងបទចម្រៀងនេះជាភាសាចិនកុកងឺ ដែលមានចំណងជើងជាភាសាខ្មែរថា "ព្រះចន្ទ្រដូចក្រូចឆ្មារ"។
បទចម្រៀងចិន "ព្រះចន្ទ្រដូចក្រូចឆ្មារ" និពន្ធទំនុកច្រៀងដោយ ស៊ិន ចឺ សម្រួលបទភ្លេង ដោយ សឺ ឆាន់ចាវជា និង ចេញលក់នៅប្រទេសចិនក្នុងឆ្នាំ១៩៦៩។ ជាបន្តបន្ទាប់ បទ ចម្រៀងនេះត្រូវបាននិពន្ធទំនុកច្រៀងថ្មី និងច្រៀងដោយអ្នកចម្រៀងផ្សេងៗគ្នា។ នៅក្នុងនោះ បទចម្រៀងដែលមានលំនាំដូចគ្នានេះ ក៏ត្រូវបានផលិតឡើងសាជាថ្មីដើម្បីដាក់បញ្ចូលទៅក្នុងខ្សែភាពយន្តផងដែរ ។
នៅកម្ពុជា នាដើមទសវត្សរ៍ឆ្នាំ ១៩៧០ បទចម្រៀងដូចគ្នាត្រូវបានច្រៀងដោយលោក ស៊ីន ស៊ីសាមុត។ បទចម្រៀងនោះមានចំណងជើងថា "ឱ ព្រះចន្ទ្រាអើយ!" ។
តាមរយៈទំនុកនៃបទ ឱ ព្រះចន្ទ្រាអើយ អ្នកនិពន្ធបានរៀបរាប់ពីសេចក្តីទុក្ខសោក និងការអស់សង្ឃឹមរបស់បុរសកំសត់ម្នាក់ដែល និរាសព្រាត់ប្រាស់ពីនារីជាទីស្រឡាញ់របស់ខ្លួន។ សេចក្តីទុក្ខនេះអាចរសាយចេញខ្លះនៅពេលដែលបានឃើញពន្លឺចន្ទ្រថ្លាបុប្ផារីកស្គុះស្គាយនាពេលរាត្រី និងនៅពេលដែលមានវាយោបក់រំភើយៗរហើយត្រជាក់ប្រាណ។ ប៉ុន្តែទោះយ៉ាងណា មានតែការជួបជុំជាមួយ នារីជាទីស្រឡាញ់តែប៉ុណ្ណោះ ទើបអាចបំបាត់សេចក្តីទុក្ខសោកនេះបាន។
ជាង៤០ឆ្នាំកន្លងផុតទៅ យើងមិនដឹងថាបទចម្រៀងជប៉ុននិងចិន នៅតែជាបទចម្រៀង ដែលពេញនិយមសម្រាប់ប្រជាពលរដ្ឋនៃប្រទេសទាំងពីរនេះ ឬអត់នោះទេ។ ប៉ុន្តែនៅកម្ពុជាវិញចម្រៀងរបស់លោក ស៊ីន ស៊ីសាមុត ក្នុងទំនុកនៃបទ "ឱ ព្រះចន្ទ្រាអើយ!" នៅតែពេញ និយមនៅឡើយ។
© រក្សាសិទ្ធិដោយ thmeythmey.com