ជាតិ
បទវិភាគ
យុវជនបរិសុទ្ធស្អប់ខ្ពើមទង្វើអសីលធម៌!
× តាមពីភ្នំពេញដល់ខេត្តព្រះសីហនុ ដើម្បីទាមទារឲ្យអនុប្រធានគណបក្សសង្គ្រោះជាតិ បកស្រាយអំពីខ្សែអាត់សំឡេងស្នេហា។ នេះជាចំណុចដ៏វិជ្ជមានមួយរបស់សង្គមជាតិដែលមានក្រុមយុវជន និស្សិត នាំគ្នាប្រឆាំងនឹងទង្វើអសីលធម៌របស់អ្នកនយោបាយជាន់ខ្ពស់។
កាលពីរសៀលថ្ងៃសុក្រ ទី៤ ខែមីនា យុវជនជាង៥០នាក់ដែលបានអះអាងថា ជាក្រុមយុវជន និងនិស្សិតសកលវិទ្យាល័យនានានៅភ្នំពេញ បាននាំគ្នាទៅមុខទីស្នាក់ការគណបក្សសង្គ្រោះដើម្បីដាក់ញត្តិតវ៉ា ឲ្យឯកឧត្តម កឹម សុខា ចេញមុខបកស្រាយនូវការពិតស្តីអំពីខ្សែអាត់សំឡេងស្នេហាអសីលធម៌។
សំឡេងអាត់ដែលក្រុមយុវជនលើកឡើងនោះ គឺចេញពីការផ្សាយជាបន្តបន្ទាប់របស់គណនីហ្វេសប៊ុកអនាមិកមួយដែលមានឈ្មោះ «Mon Srey» ដែលថតពីការសន្ទនាស្នេហារបស់បុរសម្នាក់ និងស្ត្រីម្នាក់។ សំឡេងបុរសត្រូវបានគេចោទប្រកាន់ថា ជាសំឡេងរបស់អនុប្រធានគណបក្សសង្គ្រោះជាតិ។
លោក ប៉េង ភីរេន ដែលតំណាងឲ្យក្រុមយុវជនដែលតវ៉ានោះ បានអះអាងថា ពួកគាត់គ្រាន់តែជានិស្សិតប៉ុណ្ណោះ មិនមានជាប់និន្នាការគាំទ្រនយោបាយណាមួយឡើយ។ អ្វីដែលពួកនិស្សិតចង់បាននោះ គឺចង់ឲ្យឯកឧត្តម កឹម សុខា ចេញមុខបកស្រាយនូវការពិត។
«មិនឈ្លោះ មិនឆ្លើយ មិនឆ្លង»។ នេះជាគោលការណ៍ដែលប្រធានស្តីទីគណបក្សប្រឆាំងប្រាប់ទៅថ្នាក់ដឹកនាំ និងសកម្មជនរបស់ខ្លួន ដោយបញ្ជាក់ថា ត្រូវនាំគ្នាផ្តោតលើយុទ្ធសាស្ត្រយកឈ្នះការបោះឆ្នោតប៉ុណ្ណោះ។ ជាមួយគ្នានោះ លោក យ៉ែម បុញ្ញឫទ្ធិ ដែលជាអ្នកនាំពាក្យបក្ស បានលើកឡើងថា គណបក្សរបស់លោកមិនយកពេលវេលាទៅគិតគូរនូវរឿងដែលឥតប្រយោជន៍នោះឡើយ។
ការស្ងៀមស្ងាត់របស់គណបក្សសង្គ្រោះជាតិ មិនបានធ្វើឲ្យក្រុមយុវជនដែលស្រឡាញ់នូវភាពស្អាតស្អំស្ងប់ចិត្ត។ នៅថ្ងៃនេះ ពួកគេមួយចំនួនប្រហែលជាបានចំណាយថវិកាផ្ទាល់លើមធ្យោបាយធ្វើដំណើរទៅខេត្តព្រះសីហនុដើម្បីឲ្យឯកឧត្តម កឹម សុខា ធ្វើការបកស្រាយ ខណៈមានកម្មវិធីជួបជុំថ្នាក់ដឹកនាំមូលដ្ឋានរបស់ខ្លួន។ ប៉ុន្តែនៅតែគ្មានចម្លើយ។
នាពេលអនាគត ក្រសួងអប់រំ យុវជន និងកីឡា ឬក្រសួងវប្បធម៌ និងវិចិត្រសិល្បៈ ប្រហែលជាមិនខ្វះធនធាននោះឡើយ ពីព្រោះបច្ចុប្បន្ន យុវជនកំពុងតែបង្ហាញពីស្អាតស្អំរបស់ខ្លួនក្នុងការប្រយុទ្ធប្រឆាំងនឹងអំពើអសីលធម៌ ឬស្នេហា សហាយស្មន់ ដើម្បីក្លាយជាទំពាំងស្នងឫស្សីដ៏បរិសុទ្ធ។
គេសង្ឃឹមថា ឯកឧត្តម កឹម សុខា មិនមែនជាគោលដៅតែម្នាក់គត់នោះឡើយរបស់ក្រុមយុវជនដែលស្អប់ខ្ពើមអំពើអសីលធម៌នៃអ្នកនយោបាយ បើទោះបីវាជារឿងឯកជនក៏ដោយ។ ឯកឧត្តម ឧកញ៉ា និងអ្នកនយោបាយជាន់ខ្ពស់គ្រប់និន្នាការទាំងអស់ច្បាស់ជារងការប្រឈមនឹងការទាមទារឲ្យបង្ហាញការពិតជាមិនខាន បើសិនបើហ៊ានលួចមានស្រី ឬចិញ្ចឹមស្រីស្នេហ៍លាក់កំបាំងភរិយា។
សំណួរសួរថា តើយុវជន ឬក្រុមនិស្សិតពិតជាធ្វើសកម្មភាពចេញពីចិត្តរបស់ខ្លួនពិតប្រាកដ ឬយ៉ាងណា? ប្រសិនបើពួកគាត់ធ្វើតាមការបញ្ជា ឬតាមក្រុមបក្ខពួកអ្វីមួយ ដែលមិនមែនជាស្មារតីពិតប្រាកដរបស់ខ្លួនទេនោះ សង្គមជាតិត្រូវរង់ចាំរហូតដល់ពេលណាទៅទើបបានធនធានយុវជនពិតប្រាកដ?
Tag:
ឯកឧត្តម កឹម សុខា
គណបក្សសង្គ្រោះជាតិ
ស្នេហា
© រក្សាសិទ្ធិដោយ thmeythmey.com