តំណាងនិស្សិតម្នាក់រង់ចាំអញ្ជើញស្រីមុំ ឲ្យចូលរួមសិក្ខាសាលា នៅក្រសួងមហាផ្ទៃ

ជាតិ

តំណាងនិស្សិតម្នាក់រង់ចាំអញ្ជើញស្រីមុំ ឲ្យចូលរួមសិក្ខាសាលា នៅក្រសួងមហាផ្ទៃ

11, Mar 2016 , 11:00 am

រូបភាព

ដោយ:

និស្សិតម្នាក់ ដែលអះអាងថា ខ្លួនតំណាងឲ្យនិស្សិត ១០០ នាក់នៅសកលវិទ្យាល័យនានានៅរាជធានីភ្នំពេញ កំពុងរង់ចាំកញ្ញាស្រមុំ ដែលកំពុងឆ្លើយបំភ្លឺនៅនាយកដ្ឋានប្រឆាំងភេរវកម្ម នៅក្រសួងមហាផ្ទៃនៅព្រឹកនេះ ដើម្បីប្រគល់លិខិតអញ្ជើញដល់កញ្ញាស្រីមុំ ឲ្យចូលរួមសិក្ខាសាលា។

តាមលិខិតអញ្ជើញនោះ សិក្ខាសាលា នឹងរៀបចំធ្វើនៅវិទ្យាស្ថានអភិវឌ្ឍសេដ្ឋកិច្ច ស្ថិតនៅសង្កាត់ទឹកថ្លា ខណ្ឌសែនសុខ នាម៉ោង ២ រសៀល នៅថ្ងៃទី ១១ ខែមីនានេះ ក្រោមប្រធានបទ «ផលប៉ះពាល់នៃខ្សែអាត់សំឡេងដែលគេសង្ស័យថា សំឡេងលោក កឹម សុខា និងការបង្ហាញភស្តុតាងបញ្ជាក់ថា ខ្សែអាត់សំឡេងដូចស្រីមុំ ១០០ ភាគរយ»។

តំណាងនិស្សិតដែលចុះហត្ថលេខាអញ្ជើញស្រីមុំ លោក ម៉ី ម៉េងស៊ា បានថ្លែងថា ក្រុមរបស់លោកមានភស្តុតាងជាក់លាក់ដែលអាចបញ្ជាក់ថា សំឡេងនោះ ពិតជាសំឡេងកញ្ញាស្រី មុំ ហៅ ឃុំ ច័ន្ទតារាទី និយាយជាមួយឯកឧត្តម កឹម សុខា ពិតប្រាកដមែន តែលោកមិនលម្អិតថា ភស្តុតាងនោះយ៉ាងនោះទេ។ លោកឲ្យអ្នកសារព័ត៌មានរង់ចាំការបកស្រាយរបស់ក្រុមខ្លួននៅក្នុងសិក្ខាសាលានៅរសៀលនេះ។

និស្សិតមួយក្រុមនេះ ដែលតាំងខ្លួនថាជាអ្នកតំណាងឲ្យនិស្សិតទាំងអស់នៅភ្នំពេញ ជាញឹកញាប់តែងប្រមូលផ្តុំគ្នាតវ៉ាស្នើឲ្យឯកឧត្តម កឹម សុខា ចេញមុខបកស្រាយខ្សែអាត់សម្លេងស្នេហាជាមួយស្រីមុំ ដែលគេបង្ហោះនៅលើបណ្តាញសង្គម។ មិនត្រឹមតែប៉ុណ្ណឹងទេ ពួកគេ ថែមទាំងធ្លាប់នាំគ្នាតាមទៅជួបឯកឧត្តម កឹម សុខា ដល់វេទិការបស់គណបក្សសង្គ្រោះជាតិនៅតាមខេត្ត ដើម្បីសុំការបំភ្លឺពីលោក កឹម សុខា ដែរ។ តែបំណងរបស់ពួកគេមិនបានសម្រេចនោះឡើយ៕