ជាតិ
មេធាវីលោក កឹម សុខា ហាមអ្នកនយោបាយយកឈ្មោះកូនក្តីខ្លួនទៅប្រើប្រាស់ ដើម្បីកេងផលប្រយោជន៍
×![]()
ភ្នំពេញ៖ មេធាវីលោក កឹម សុខា ហាមអ្នកនយោបាយទាំងអស់ ឱ្យបញ្ឈប់ការយកឈ្មោះកូនក្តីខ្លួនទៅប្រើប្រាស់ ដើម្បីកេងចំណេញផលប្រយោជន៍ ។ នេះបើតាមសហមេធាវីការពារសិទ្ធិលោក កឹម សុខា ។
លោក ចាន់ ចេន មេធាវីការពារក្តីលោក កឹម សុខា បាននិយាយថា កន្លងមកមានអ្នកនយោបាយខ្លះ យកឈ្មោះលោក កឹម សុខា ទៅផ្សាភ្ជាប់ជាមួយសកម្មភាព ឬចលនាផ្សេងៗ ។ ជាពិសេសយកទៅភ្នាល់គ្នាក្នុងរឿងនយោបាយជាដើម។
មិនតែប៉ុណ្ណោះ ក៏មានអ្នកនយោបាយខ្លះ ដែលបានបង្កើតគណបក្សថ្មី ក៏បានយកឈ្មោះលោក កឹម សុខា ទៅកៀងគរកម្លាំង និងធ្វើសារនយោបាយនានា ដើម្បីប្រជាប្រិយភាពនយោបាយទៀតផង។នេះបើតាមលោក ចាន់ ចេន។
មេធាវីការពារក្តីលោក កឹម សុខា រូបនេះ ចាត់ទុកសកម្មភាពអ្នកនយោបាយទាំងនោះ ជាទង្វើអសីលធម៌ក្នុងការប្រកួតប្រជែងនយោបាយ។ ថ្លែងប្រាប់សារព័ត៌មានថ្មីៗ លោក ចាន់ ចេន បាននិយាយដូច្នេះថា៖«សូមឱ្យអ្នកនយោបាយមានក្រមសីលធម៌ (កុំយកឈ្មោះលោក កឹម សុខា ទៅផ្សាភ្ជាប់)ដោយក្លាហានក្នុងការធ្វើនយោបាយខ្លួនឯង…»។
សេចក្តីថ្លែងការណ៍របស់សហមេធាវីការពារសិទ្ធិលោក កឹម សុខា បានបញ្ជាក់ថា «បុគ្គលឬក្រុមណា ដែលមានបំណង ឬបានបង្កើតគណបក្សនយោបាយ រួមទាំងចលនានយោបាយណាមួយ សូមកុំយកករណី ឬឈ្មោះលោក កឹម សុខា ទៅភ្ជាប់ពាក់ព័ន្ធជាមួយ។ បុគ្គល ឬក្រុមណាដែលធ្វើកិច្ចការខាងលើ សូមមានសេចក្តីក្លាហានទទួលខុសត្រូវខ្លួនឯង»។
ក្រុមមេធាវីលោក កឹម សុខា នឹងពិនិត្យ ហើយពិភាក្សាគ្នាទៀត ចំពោះអ្នកនយោបាយ ដែលតែងតែយកឈ្មោះកូនក្តីខ្លួនទៅប្រើប្រាស់ ក្នុងបំណងទាញយកផលប្រយោជន៍នយោបាយនេះ។ នេះបើតាមលោក ចាន់ ចេន ។
គិតមកដល់ពេលនេះ សំណុំរឿងលោក កឹម សុខា ពីបទ «គប់គិតជាមួយបរទេស» បានអូសបន្លាយពេលជាង៣ឆ្នាំហើយ ចាប់ពីខែកញ្ញា ឆ្នាំ២០១៧មក។ សំណុំរឿងលោក កឹម សុខា ក៏ត្រូវបានតុលាការដំណើរការជំនុំជម្រះក្តីដែរ កាលពីដើមឆ្នាំ២០២០ ។ប៉ុន្តែតុលាការ សម្រេចផ្អាកវិញ ក្រោយពីជំងឺកូវីដ-១៩ រាតត្បាត និងគំរាមកំហែងប្រជាជនកម្ពុជា។
កាលពីដើមខែមករា ២០២១នេះ ក្រុមមេធាវីលោក កឹម សុខា ក៏បានដាក់សំណើលើកទី៣ ទៅតុលាការឱ្យដំណើរការរឿងក្តីឡើងវិញដែរ។ ប៉ុន្តែមិនទាន់មានការឆ្លើយតបបែបណាវិញពីតុលាការឡើយ។ តែយ៉ាងណាលោក ជិន ម៉ាលីន រដ្ឋលេខាធិការ និងជាអ្នកនាំពាក្យក្រសួងយុត្តិធម៌ ចេញមុខបកស្រាយថា មូលហេតុដែលតុលាការមិនទាន់ដំណើរការជំនុំជម្រះក្តីលោក កឹម សុខា ឡើងវិញនេះ ដោយសារលោក សុខា ជាជនជាប់ចោទនៅក្រៅឃុំ ។ ដូច្នេះតុលាការដំណើរការក្តីលើអ្នកជាប់ចោទក្នុងក្នុងឃុំមុន ដើម្បីដោះស្រាយការកកស្ទះសំណុំរឿង និងភាពចង្អៀតណែនក្នុងពន្ធនាគារ៕
Tag:
កឹម សុខា
នយោបាយ
© រក្សាសិទ្ធិដោយ thmeythmey.com
