សិស្សក្រីក្រនៅខេត្តកំពត ជិត៧០០នាក់ បានទទួលការបំប៉ន និងផ្គត់ផ្គង់សិក្សាពីអង្គការ CLS

ជាតិ

សិស្សក្រីក្រនៅខេត្តកំពត ជិត៧០០នាក់ បានទទួលការបំប៉ន និងផ្គត់ផ្គង់សិក្សាពីអង្គការ CLS

09, Feb 2021 , 7:59 am

រូបភាព

លោក អំ តារា និងសិស្សអង្គការសាលាបរទេសជុំគ្រៀល ចូលរួមវគ្គបណ្ដុះបណ្ដាលស្ដីពី «ការសរសេរព័ត៌មានបែបអនឡាញ និងការផលិតវីដេអូតាមទូរស័ព្ទដៃ» កាលពីថ្ងៃទី១៩ ខែ មករា ។

ដោយ: អ៊ុត រស្មី (Uth Raksmey)

កំពត៖ សិស្សក្រីក្រចំនួន ៦៩០នាក់ នៅស្រុកទឹកឈូ និងស្រុកកំពត បានទទួលការសិក្សាដោយឥតគិតថ្លៃពី អង្គការសាលាបរទេសជុំគ្រៀល ហៅកាត់ថា CLS ដែលស្ថិតនៅភូមិជុំគ្រៀល ឃុំជុំគ្រៀល ស្រុកទឹកឈូ ខេត្តកំពត។

អ្នកគ្រប់គ្រងកម្មវិធីអប់រំ និងសហគមន៍នៃអង្គការCLS លោក អំ តារា បាននិយាយថា អង្គការ CLS បានទទួលជំនួយ ពីប្រទេសសង្ហបុរី និងអូស្ត្រាលី ដោយអនុវត្តន៍លើគម្រោងចំនួន២ គឺការជួយដល់សហគមន៍ ដូចជាសង់ផ្ទះ និងបង្គន់ឱ្យពលរដ្ឋក្នុងសហគមន៍ជុំគ្រៀល និងជំរុញកម្មវិធីអប់រំ ជួយសិស្សក្រីក្រឱ្យមានលទ្ធភាពសិក្សា។

លោក អំ តារា អ្នកគ្រប់គ្រងកម្មវិធីអប់រំ និងសហគមន៍ នៃអង្គការសាលាបរទេសជុំគ្រៀល

បើតាមលោក អំ តារា អង្គការ CLS មានបង្រៀនបំប៉ន ភាសាអង់គ្លេស ភាសាខ្មែរ គណិតវិទ្យា កីឡា និងកំព្យូទ័រ ដល់សិស្សក្រីក្រ ដើម្បីឱ្យពួកគេអាចរៀនពូកែ និងមានលទ្ធភាពសិក្សាបន្ត។ «យើងជ្រើសរើសកុមារដែលក្រីក្ររៀននៅសាលារដ្ឋ ដែលគ្មានលទ្ធភាពរៀនគួរបន្ថែម ហើយភាគច្រើនសិស្សដែលក្រីក្រ គឺគាត់រៀនខ្សោយ ដូចនេះយើងចង់ឱ្យសិស្សក្រីក្រក៏មានលទ្ធភាពរៀនដូចសិស្សទូទៅ»។ នេះជាការអះអាង របស់លោក អំ តារា ដោយបានបន្ថែមថា ក្រៅពីផ្ដល់ចំណេះដឹង អង្គការ ក៏បានជួយផ្គត់ផ្គង់សម្ភារសិក្សា និងឯកសណ្ឋាន ដើម្បីជួយដល់ការចំណាយរបស់ឪពុកម្ដាយសិស្សផងដែរ។

ជាសិស្សថ្នាក់ទី១១ នៅវិទ្យាល័យជុំគ្រៀល យុវសិស្ស សៅ រដ្ឋា បានសិក្សាភាសាអង់គ្លេសនៅអង្គការCLS តាំងពីខ្លួនរៀនថ្នាក់ទី៥ មកម្ល៉េះ។ យុវជនរូបនេះ បានប្រាប់ថា ការរៀនបំប៉នភាសាអង់គ្លេសនៅអង្គការCLS ជួយឱ្យខ្លួនអាចប្រើប្រាស់ភាសាអង់គ្លេសទំនាក់ទំនងជាមួយជនបរទេសបាន។ និយាយក្នុងទឹកមុខញញឹម យុវជន រដ្ឋា បានប្រាប់ថា អង្គការCLS មិនត្រឹមតែឱ្យសិក្សាភាសាអង់គ្លេសឥតគិតថ្លៃទេ ថែមទាំងជួយផ្គត់ផ្គង់សម្ភារសិក្សាទៀតផង។ សេង រដ្ឋា បានរៀបរាប់ដូច្នេះថា៖ «គាត់ជួយបានច្រើន ព្រោះអីមួយឆ្នាំៗ គាត់ចែកសម្ភារសិក្សា និងឯកសណ្ឋាន ពិសេសពេលខ្ញុំអត់មានកង់ជិះទៅរៀន គាត់ទិញកង់ឱ្យខ្ញុំទៀត»។

យុវសិស្ស សៅ រដ្ឋា សិស្សអង្គការសាលាបរទេសជុំគ្រៀល ។

មិនខុសគ្នាពី យុវសិស្ស សៅ រដ្ឋា ឡើយ ! យុវតី ឃាង សុវណ្ណនីតា ជាសិស្សម្នាក់ក្នុងចំណោមសិស្ស៦៩០នាក់ ដែលបានសិក្សានៅអង្គការCLS ដែរ។ សម្រាប់ យុវតីវ័យ១៦ឆ្នាំរូបនេះ យល់ថា អង្គការ បានជួយណែនាំតម្រង់ទិសដល់សិស្ស តាមរយៈកម្មវិធី ឬសិក្ខាសាលាចែករំលែកចំណេះដឹងផ្សេងៗ ដែលជាឱកាសឱ្យសិស្សទទួលបានចំណេះដឹងថ្មីៗទៀតផង។ «ពួកគាត់ យកចិត្តទុកដាក់មែនទែន ចំពោះពួកខ្ញុំដែលជាសិស្សអាហារូបករណ៍»។ នេះជាការលើកឡើងរបស់ យុវតី សុវណ្ណនីតា ដែលបានអះអាងថា ការផ្ដល់អាហារូបករណ៍ បានជួយសម្រាលបន្ទុកគ្រួសារនាងបានច្រើន ទាំងថ្លៃចំណាយរៀនសូត្រ និងសម្ភារសិក្សា។ ក្រោមការផ្គត់ផ្គង់ការសិក្សាពីអង្គការ CLS យុវតីវ័យ១៦ឆ្នាំរូបនេះ បានប្ដេជ្ញាថា ខ្លួននឹងខិតខំរៀនសូត្រដើម្បីតបស្នងដល់អង្គការ និងសង្គមជាតិ។

អង្គការ CLS ជួយផ្គត់ផ្គង់សិស្សត្រឹមថ្នាក់ទី១២ ប៉ុណ្ណោះ ប៉ុន្តែក្នុងករណីសិស្សគ្មានលទ្ធភាពសិក្សាបន្ត អង្គការនឹងបន្តផ្ដល់អាហារូបករណ៍សិក្សានៅសាកលវិទ្យាល័យ នៅក្រុងកំពតបន្ថែមទៀត។ នេះបើតាមលោក អំ តារា អ្នកគ្រប់គ្រងកម្មវិធីអប់រំ និងសហគមន៍នៃអង្គការCLS។

អស់រយៈពេលជាង១៦ឆ្នាំហើយ ដែលអង្គការCLS បានផ្គត់ផ្គង់ការសិក្សាដល់កុមារក្រីក្រជាច្រើននាក់នៅខេត្តកំពត។ បច្ចុប្បន្នមានសិស្សមកពីស្រុកទឹកឈូ និងស្រុកកំពត ចំនួន ៦៩០នាក់ កំពុងរៀនបំប៉ន ភាសាអង់គ្លេស, ខ្មែរ, គណិតវិទ្យា និងកំព្យូទ័រ នៅអង្គការCLS ៕