អន្តរជាតិ
អូស្ត្រាលី ស្នើប្រជាជនកុំបារម្ភ ក្រោយអាហ្វ្រិកខាងត្បូងផ្អាកចាក់វ៉ាក់សាំង AstraZeneca
×
ដោយ ឈួន ឈីវអ៊ីង
រដ្ឋមន្ត្រីសុខាភិបាលអូស្ត្រាលី នៅថ្ងៃទី៨ ខែកុម្ភៈ ស្នើឱ្យប្រជាជននៅស្ងប់ស្ងៀម និងកុំមានមន្ទិលអ្វីលើវ៉ាក់សាំងកូវីដ-១៩ របស់ក្រុមហ៊ុន AstraZeneca ។ ការធានាទាក់ទងប្រសិទ្ធភាពវ៉ាក់សាំងរបស់ AstraZeneca កើតមានក្រោយពីអាហ្វ្រិកខាងត្បូង ប្រកាសព្យួរការប្រើប្រាស់វ៉ាក់សាំងនេះបណ្ដោះអាសន្ន។
នៅក្នុងសន្និសីទសារពត៌មាននាថ្ងៃទី៧ ខែកុម្ភៈ រដ្ឋមន្ត្រីសុខាភិបាលអាហ្វ្រិកខាងត្បូង លោក Zweli Mkhize បានលើកឡើងពីការផ្អាកការប្រើប្រាស់វ៉ាក់សាំងរបស់ AstraZeneca ជាបណ្ដោះអាសន្ន ក្រោយទិន្នន័យសិក្សាបង្ហាញថាប្រសិទ្ធភាពវ៉ាក់សាំងនេះ ធ្លាក់ចុះនៅពេលតតាំងនឹងវីរុសបំប្លែងខ្លួនថ្មីដែលលេចរូបរាងនៅក្នុងប្រទេស។ អាហ្វ្រិកខាងត្បូង ចង់ងាកទៅប្រើវ៉ាក់សាំងរបស់ Pfizer និង Johnson & Johnson វិញ។
ជុំវិញព័ត៌មាននេះ រដ្ឋមន្ត្រីសុខាភិបាលអូស្ត្រាលី Greg Hunt ក៏ចេញមុខបកស្រាយទៅកាន់ប្រជាជន។ លោក Hunt ប្រាប់អ្នកសារព័ត៌មាននៅទីក្រុងកង់បេរ៉ានៅថ្ងៃទី៨ ខែកុម្ភៈ ថា បច្ចុប្បន្ននេះនៅមិនទាន់មានព័ស្តុតាងណាចង្អុលបង្ហាញពីការធ្លាក់ចុះប្រសិទ្ធភាពនៃវ៉ាក់សាំង AstraZeneca ក្នុងការការពារការឆ្លងវីរុសឡើយ។
ទីភ្នាក់ងារព័ត៌មាន Reuters ផ្សាយថា នៅថ្ងៃទី៦ ខែកុម្ភៈ ក្រុមហ៊ុន AstraZeneca ប្រកាសថា ខ្លួនជឿជាក់ថា វ៉ាក់សាំងរបស់ខ្លួន មានប្រសិទ្ធភាពការពារការឆ្លង និងមានសមត្ថភាពប្រឆាំងនឹងវីរុសប្រភេទថ្មី 501Y.V2 ដែលផ្ទុះឡើងនៅអាហ្វ្រិកខាងត្បូង។ សព្វថ្ងៃ វីរុសបំប្លែងខ្លួនថ្មី បានរាលដាលដល់ប្រទេសជាច្រើនហើយ។
ដ្បិតមានព័ត៌មានមិនសូវល្អទាក់ទងវ៉ាក់សាំងរបស់ក្រុមហ៊ុន AstraZeneca ក្ដី អូស្ត្រាលី រំពឹងថា នឹងអនុញ្ញាតឱ្យប្រើប្រាស់វ៉ាក់សាំងនេះជាបន្ទាន់នៅពេលខ្លីខាងមុខដែរ។ អូស្ត្រាលី បានយល់ព្រមលើការប្រើប្រាស់វ៉ាក់សាំង Pfizer កាលពីខែមករា ប៉ុន្តែវ៉ាក់សាំងនេះអាចផ្គត់ផ្គង់ បានត្រឹមតិចជាងពាក់កណ្តាលនៃចំនួនប្រជាជនក្តី។
អូស្ត្រាលី នឹងចាប់ផ្តើមចាក់វ៉ាក់សាំង Pfizer ឱ្យប្រជាជនរបស់ខ្លួនក្នុងខែកុម្ភៈនេះ ហើយប្រជាជននៅសល់នឹងទទួលបានវ៉ាក់សាំង AstraZeneca ។ អូស្ត្រាលីបានបញ្ជាទិញវ៉ាក់សាំងរបស់ AstraZeneca ចំនួន៥៣លានដូសដែលភាគច្រើនត្រូវបានផលិតក្នុងស្រុកដោយក្រុមហ៊ុន CSL៕
Tag:
អូស្ត្រាលី
អាហ្វ្រិកខាងត្បូង
© រក្សាសិទ្ធិដោយ thmeythmey.com