ក្រោយចាក់វ៉ាក់សាំងចិន ២០ថ្ងៃ សម្ដេច ទៀ បាញ់ អះអាងថា «អត់មានធ្វើទុក្ខអ្វីទាំងអស់»

COVID-19

ជាតិ

ក្រោយចាក់វ៉ាក់សាំងចិន ២០ថ្ងៃ សម្ដេច ទៀ បាញ់ អះអាងថា «អត់មានធ្វើទុក្ខអ្វីទាំងអស់»

10, Feb 2021 , 3:15 pm

រូបភាព

ដោយ: រំដួល ចិត្រា (Romdoul Chetra)

ភ្នំពេញ៖ សម្ដេច ទៀ បាញ់ រដ្ឋមន្ត្រីការពារជាតិ បានអះអាងថា សម្ដេចមិនមានបញ្ហាប្រតិកម្មអ្វីជាមួយវ៉ាក់សាំងចិនឡើយ ក្រោយពីចាក់ការពារជំងឺឆ្លងកូវីដ-១៩ រយៈពេលជិត១ខែមកនេះ។ សម្ដេច ថ្លែងបែបនេះ នៅក្នុងពិធីដឹកនាំមន្ត្រីកងទ័ពចាក់វ៉ាក់សាំងចិន នៅមន្ទីរពេទ្យកេតុមាលា នារសៀលថ្ងៃទី១០ កុម្ភៈ។

«អត់មានធ្វើទុក្ខអ្វីទាំងអស់»។ នេះជាការអះអាងរបស់សម្ដេច ទៀ បាញ់ ដើម្បីឆ្លើយតបនឹងការសង្ស័យលើផលប៉ះពាល់សុខភាព ក្រោយចាក់វ៉ាក់សាំងSinopharmរបស់ចិន រយៈពេល២០ថ្ងៃមកនេះ។ សម្ដេច ទៀ បាញ់ បានចាក់វ៉ាក់សាំងចិននេះ នៅមន្ទីរពេទ្យកេតុមាលា។

បើតាមសម្ដេច ទៀ បាញ់ ការចាក់វ៉ាក់សាំងនេះ គឺគ្រូពេទ្យតម្រូវឱ្យតមគ្រឿងសមុទ្រ គ្រឿងស្រវឹង និងកុំធ្វើការធ្ងន់ហួសកម្លាំង រយៈពេល៤ថ្ងៃប៉ុណ្ណោះ។ «៤ថ្ងៃនេះ បើសិនតមបានគឺវាល្អ» ។ នេះជាការបញ្ជាក់របស់រដ្ឋមន្ត្រីក្រសួងការពារជាតិ។

សម្ដេច ទៀ បាញ់ ដែលមានអាយុ៧៥ឆ្នាំ បានចាក់វ៉ាក់សាំងចិន ទាំងខ្លួនលើសអាយុកំណត់។ ប៉ុន្តែនៅពេលអ្នកកាសែតសួរពីរឿងអាយុនេះ សម្ដេច ទៀ បាញ់ អះអាងថា អាយុមិនមែនជាបញ្ហាអ្វីចោទឡើយ ។ សម្ដេច បញ្ជាក់ថា សម្ដេចមានសុខភាពល្អធម្មតា។«ខ្ញុំចូលចិត្តលេងកូនហ្គោល ហើយខ្ញុំលេងល្អជាងមុនទៀត»។ នេះជាការបញ្ជាក់របស់រដ្ឋមន្ត្រីការពារជាតិ ដែលហ៊ានអះអាងថា វ៉ាក់សាំងចិន មានគុណភាព និងប្រសិទ្ធល្អថែមទៀតផង។

លោក វង្ស ពិសេន អគ្គមេបញ្ជាការ នៃកងយោធពលខេមរភូមិន្ទ, អគ្គមេបញ្ជាការរង នៃកងយោធពលខេមរភូមិន្ទ និងជាមេបញ្ជាការកងរាជអាវុធហត្ថលើផ្ទៃប្រទេស រួមទាំងមន្ត្រីជាន់ខ្ពស់កងទ័ពផ្សេងទៀត ចាក់វ៉ាក់សាំងនៅថ្ងៃទី១០ កុម្ភៈ ក្រោមការដឹកនាំរបស់សម្ដេច ទៀ បាញ់។

សម្ដេច ទៀ បាញ់ ក៏បានស្នើទៅសម្ដេច ហ៊ុន សែន សុំចាក់វ៉ាក់សាំងចិនលើកងទ័ព ចាប់ពីអាយុ៦០ឆ្នាំឡើងទៅដែរ។ មូលហេតុដែលសម្ដេច ទៀ បាញ់ ចង់ឱ្យចាក់លើកងទ័ពអាយុ៦០ឆ្នាំឡើងទៅនេះ ដោយសារសម្ដេច គិតថាគ្មានប៉ះពាល់ដល់សុខភាពទេ។

«ខ្ញុំស្នើទៅសម្ដេច ហ៊ុន សែន សុំចាក់លើមន្ត្រីចាស់(អាយុពី៦០ឆ្នាំ)នៅជួរកងទ័ពដែរ ហើយសម្ដេច ក៏ឆ្លើយតបឱ្យចាក់ធម្មតាទៅ»។ នេះជាការបញ្ជាក់របស់រដ្ឋមន្ត្រីការពារជាតិ ដែលបានបន្ថែមថា ជួរកងទ័ពគឺមិនកំណត់អាយុឡើយ ។ សម្ដេច សង្កត់ធ្ងន់ថា កងទ័ពចាប់ពីអាយុ១៨ រហូតដល់លើស៥៩ឆ្នាំ ក៏អាចចាក់បានដែរ។

អត្ថបទទាក់ទង

សម្ដេច ហ៊ុន សែន ៖ កុំបារម្ភវ៉ាក់សាំងមកពីណា តែគួរបារម្ភថា អត់អីចាក់! ព្រោះវ៉ាក់សាំងគ្មានលក់តាមផ្សារត្រីឡើយ

កូនបង្កើត និងកូនប្រសារសម្ដេច ហ៊ុន សែន ,រដ្ឋមន្ត្រីវ័យក្មេង និងមន្ត្រីជាន់ខ្ពស់ ចាក់វ៉ាក់សាំងកូវីដ-១៩ នៅមន្ទីរពេទ្យកាល់ម៉ែត

នៅព្រឹកថ្ងៃទី១០ កុម្ភៈនេះ សម្ដេច ហ៊ុន សែន ក៏ប្រាប់ពលរដ្ឋកុំឱ្យសង្ស័យលើគុណភាពវ៉ាក់សាំងSinopharm របស់ចិន សម្រាប់ចាក់ការពារជំងឺឆ្លងកូវីដ-១៩។ «សូមបងប្អូនកុំបារម្ភលើវ៉ាក់សាំងមកពីប្រទេសណា? ម៉ាកអ្វី? តែគប្បីបារម្ភពីការអត់វ៉ាក់សាំងចាក់ ព្រោះគ្មានវ៉ាក់សាំងលក់តាមផ្សារដូចលក់ត្រី លក់ត្រកួននោះទេ»។ នេះជាសាររបស់សម្ដេច ហ៊ុន សែន ឆ្លើយតបទៅនឹងមតិរិះគន់លើបញ្ហាគុណភាពវ៉ាក់សាំងSinopharm របស់ចិន។

ចិនបានផ្ដល់វ៉ាក់សាំងកូវីដ-១៩ ចំនួន៦០ម៉ឺនដូសមកកម្ពុជា តាមជើងយន្តហោះយោធា Y-20 នៅថ្ងៃទី៧ កុម្ភៈនេះ ។ បើតាមគម្រោង កម្ពុជា នឹងទទួលបានវ៉ាក់សាំងពីចិន១លានដូស។

កម្ពុជា ត្រៀមទិញវ៉ាក់សាំងកូវីដ-១៩ ប្រមាណ២០លានដូស ពីបណ្ដាលប្រទេសផលិតនានា ។ ប៉ុន្តែក្នុងនោះ កម្ពុជាទំនងជាអាចទទួលបានជំនួយវ៉ាក់សាំង១១លានដូស៕