អន្តរជាតិ
រូបថត Xinhua
×![]()
ដោយ ឈួន ឈីវអ៊ីង
សភាអឺរ៉ុប នៅថ្ងៃទី១១ ខែកុម្ភៈ បានបោះឆ្នោតគាំទ្រឱ្យរដ្ឋាភិបាលនៃប្រទេសជាសមាជិក ដាក់ទណ្ឌកម្មលើមេដឹកនាំយោធាមីយ៉ាន់ម៉ា ដែលធ្វើរដ្ឋប្រហារដណ្ដើមអំណាចពីរដ្ឋាភិបាលស៊ីវិលនៅដើមខែកុម្ភៈ។ សភាអឺរ៉ុបក៏បានជំរុញឱ្យមានដំណោះស្រាយដើម្បីឈានទៅរកការគ្រប់គ្រងប្រទេសដោយរដ្ឋាភិបាលស៊ីវិលឡើងវិញផងដែរ។ 
នាកិច្ចប្រជុំថ្ងៃទី១១ ខែកុម្ភៈ សមាជិកសភាអឺរ៉ុបចំនួន៦៧៧ បានគាំទ្រលើដំណោះស្រាយមួយដែលស្នើឱ្យរដ្ឋាភិបាលនៃរដ្ឋសមាជិក២៧ ចេញទណ្ឌកម្មលរបបយោធាមីយ៉ាន់ម៉ា។ ដំណោះស្រាយនេះ មិនមានចំណងចាប់បង្ខំឡើយ តែវាជាសញ្ញាមួយបង្ហាញថា អឺរ៉ុបមិនពេញចិត្តពេញទំហឹងរដ្ឋប្រហារដណ្ដើមអំណាចនៅរដ្ឋអាស៊ីអាគ្នេយ៍មួយនេះ។
ទាក់ទងរឿងទណ្ឌកម្មនេះ ប្រធានគោលនយោបាយការបរទេសនៃសហភាពអឺរ៉ុប លោក Josep Borrell លើកឡើងនៅថ្ងៃទី១០ ខែកុម្ភៈថា ការដាក់ទណ្ឌកម្មបន្ថែមទៅលើបុគ្គលមេដឹកនាំ និងជំនួញនានាដែលនៅក្រោមការគ្រប់គ្រងរបស់យោធា គឺអាចធ្វើទៅបាន។ នេះបើតាមការផ្សាយរបស់ទីភ្នាក់ងារព័ត៌មាន Reuters ។ វិធានការរបស់អឺរ៉ុប ទំនងជាការកាត់ផ្ដាច់ជំនួយដល់រដ្ឋាភិបាល ឬការកាត់បន្ថយការអនុគ្រោះផ្នែកពាណិជ្ជកម្មជាដើម។
សហភាពអឺរ៉ុបជាដៃគូពាណិជ្ជកម្មធំមួយរបស់មីយ៉ាន់ម៉ា ទណ្ឌកម្មណាមួយ នឹងធ្វើឱ្យមីយ៉ាន់ម៉ា រងទុក្ខខ្លាំង។ យ៉ាងណាមិញ លោក Borrell ក៏បានព្រមានពីផលវិបាកនៃការផ្អាកការធ្វើជំនួញរបស់អឺរ៉ុបជាមួយមីយ៉ាន់ម៉ាផងដែរ ព្រោះអាចប៉ះពាល់ដល់វិស័យវាយនភណ្ឌ ដែលមានកម្មករប្រមាណ៥០ម៉ឺននាក់ ហើយភាគច្រើនជាស្ត្រី។
ខណៈទណ្ឌកម្មពីអឺរ៉ុបអាចចំណាយពេលយូរ អាមេរិកឯណោះបានចេញទណ្ឌកម្មហើយ។ ក្រសួងហិរញ្ញវត្ថុអាមេរិក បានដាក់ទណ្ឌកម្មលើមេដឹកនាំរបបយោធា១០នាក់ និងក្រុមហ៊ុនពាក់ព័ន្ធយោធាចំនួនបី។ លោកឧត្តមសេនីយ៍ មីន អ៊ុងឡាំង ដែលត្រូវអាមេរិកដាក់ទណ្ឌកម្មលើសំណុំរឿងរ៉ូហ៊ីងយ៉ា ក៏ត្រូវរងទទួលទណ្ឌកម្មមួយជាន់ទៀតដែរ៕
Tag:
អឺរ៉ុប
មីយ៉ាន់ម៉ា
© រក្សាសិទ្ធិដោយ thmeythmey.com
