អន្តរជាតិ
កូរ៉េខាងត្បូង ស៊ើបអង្កេតករណីអ្នកស្លាប់ពីរនាក់ក្រោយចាក់វ៉ាក់សាំង AstraZeneca
×![]()
ដោយ: ធៀន ភារិន្ទ
អាជ្ញាធរកូរ៉េខាងត្បូង នៅថ្ងៃទី៣ ខែមីនា កំពុងស៊ើបអង្កេតលើករណីស្លាប់ចំនួន២ បន្ទាប់ពីចាក់វ៉ាក់សាំង AstraZeneca។ អ្នកស្លាប់ទាំងពីររូបនោះ សុទ្ធតែមានផ្ទុកជំងឺនៅក្នុងខ្លួន មុននឹងចាក់វ៉ាក់សាំង។ 
ជាលើកដំបូង កូរ៉េខាងត្បូង មានមនុស្សពីរនាក់បានបាត់បង់ជីវិត បន្ទាប់ពីចាក់វ៉ាក់សាំង AstraZeneca បើគិតចាប់តាំងពីចាប់តាំងពីយុទ្ធនាការចាក់វ៉ាក់សាំងប្រឆាំងកូវីដ-១៩ នៅទូទាំងប្រទេស។ ទីភ្នាក់ងារទប់ស្កាត់ និងគ្រប់គ្រងជំងឺឆ្លងកូរ៉េខាងត្បូង (KDCA) បានអះអាងថាខ្លួន កំពុងស៊ើបអង្កេតលើករណីទាំងពីរនេះ ប៉ុន្តែមិនទាន់មានភស្តុតាងណាមួយបញ្ជាក់ថាករណីស្លាប់នេះ មានទាក់ទិននឹងវ៉ាក់សាំងក្រុមហ៊ុនAstraZeneca នៅឡើយទេ។
តាមការបញ្ជាក់របស់នាយក KDCA លោកស្រី Jeong Eun-kyeong ជនរងគ្រោះទីមួយ មានអាយុ ៦៣ឆ្នាំ និងមានជំងឺពាក់ព័ន្ធសរសៃឈាមក្នុងខួរក្បាល។ បុរសរូបនេះ បានចេញរោគសញ្ញាគ្រុនក្តៅខ្លាំង បន្ទាប់ពីចាក់វ៉ាក់សាំងបានបួនថ្ងៃ។ អ្នកជំងឺវ័យ ៦៣ឆ្នាំ ត្រូវបានបញ្ជូនទៅមន្ទីរពេទ្យ នៅថ្ងៃទី២ ខែមីនា ប៉ុន្តែក្រុមគ្រូពេទ្យមិនអាចជួយសង្គ្រោះបានឡើយ បន្ទាប់ពីបង្ហាញរោគសញ្ញាមានជាតិពុលនៅក្នុងឈាម និងជំងឺរលាកសួត។
ចំណែកអ្នកជំងឺទី២ មានអាយុ៥០ឆ្លាំប្លាយ ដែលមានជំងឺពាក់ព័ន្ធនឹងបេះដូង និងចរន្តឈាម និងជំងឺទឹកនោមផ្អែម បានទទួលមរណភាពនៅថ្ងៃទី៣ ខែមីនា។ បន្ទាប់ពីចាក់វ៉ាក់សាំងបានមួយថ្ងៃ បុរសរូបនេះ បានគាំងបេះដូងជាច្រើនលើក និងពិបាកដកដង្ហើម។ នេះបើតាមការចុះផ្សាយរបស់ទីភ្នាក់ងារព័ត៌មាន Yonhap។
កន្លងទៅ កូរ៉េខាងត្បូង ធ្លាប់បញ្ជាក់ថា អ្នកដែលរងគ្រោះធ្ងន់ធ្ងររហូតដល់ពិការ ឬស្លាប់ ដោយសារការចាក់វ៉ាក់សាំងប្រឆាំងកូវីដ-១៩ នឹងទទួលបានសំណងប្រមាណ ៣៨៣,៤៦៦ដុល្លារ។ បើតាមលោកស្រី Jeong ក្នុងចំណោមអ្នកដែលបានចាក់វ៉ាក់សាំងប្រមាណជាង៨ម៉ឺននាក់ គិតត្រឹមថ្ងៃទី២ ខែមីនា មានមនុស្សចំនួន ២០៧នាក់ បានចេញប្រតិកម្ម ដោយសារការចាក់វ៉ាក់សាំង ក្នុងនោះមាន៣ករណីរងប្រតិកម្មអាល់លាក់ហ្ស៊ីធ្ងន់ធ្ងរ។
ពេលនេះ កូរ៉េខាងត្បូង កំពុងចាក់វ៉ាក់សាំងចំនួន ២ប្រភេទរបស់ក្រុមហ៊ុន AstraZeneca និងក្រុមហ៊ុន Pfizer ។ គិតត្រឹមថ្ងៃទី៣ ខែមីនា កូរ៉េខាងត្បូង មានករណីឆ្លងកូវីដ-១៩ សរុបចំនួន ៩០៨១៦ករណី និងអ្នកស្លាប់មានចំនួន ១៦១២នាក់៕
Tag:
កូរ៉េខាងត្បូង
© រក្សាសិទ្ធិដោយ thmeythmey.com
«ប្រទានកម្ម»មានន័យដូចម្តេច?
2 ម៉ោង
