កីឡាអន្តរជាតិ
អន្តរជាតិ
×![]()
ដោយ: ទេព ពិទូរ្យ
រជ្ជទាយាទ Tunku Ismail Sultan Ibrahim នៃរដ្ឋ Johor ប្រទេសម៉ាឡេស៊ី និងជាម្ចាស់ក្លិបបាល់ទាត់ Johor Darul Ta'zim FC មានគម្រោងទិញក្លិប Valencia ពីមហាសេដ្ឋីសិង្ហបុរី Peter Lim។ នេះបើតាមការចុះផ្សាយរបស់របស់កាសែត Channelnewsasia។
«ខ្ញុំមិនមែនជាអ្នកជំនួញទេ ខ្ញុំគឺជាព្រះអង្គម្ចាស់»។ នេះជាសាររបស់អង្គម្ចាស់ Tunku Ismail ដែលបានសរសេរលើបណ្តាញសង្គម Instagram នាថ្ងៃទី២ ខែមីនា ស្របពេលព្រះអង្គបង្ហាញចំណាប់អារម្មណ៍ចង់ទិញក្លិប Valencia នៃលីគកីឡាបាល់ទាត់អេស្ប៉ាញ La Liga។
ចំណាប់អារម្មណ៍របស់រជ្ជទាយាទវ័យ៣៦ឆ្នាំ ក្នុងការទិញយកក្លិបដ៏ល្បីមួយនេះទំនងជាក្លាយជាការពិត ហើយនេះក៏អាចក្លាយជាអ្នកផ្លាស់ប្តូរក្លិបមួយនេះឱ្យរីកមុខមាត់ផងដែរ។
បើទោះបីជា Tunku Ismail អះអាងថាខ្លួនមិនមែនជាអ្នកជំនួញក៏ដោយក៏រជ្ជទាយាទរូបនេះ ជាម្ចាស់ក្លិបយក្សនៃលីគកំពូលម៉ាឡេស៊ី Johor FC ដែលបានកាន់កាប់តាំងពីឆ្នាំ ២០១២ មករួចទៅហើយ។
«ខ្ញុំមិនមែនអ្នកថ្មីក្នុងវិស័យកីឡាករបាល់ទាត់ទេ។ ខ្ញុំបានបង្កើតក្លិបមួយដែលប្រជែងពីតំបន់ត្រូវកាត់ចោល រហូតក្លាយជាម្ចាស់ជើងឯក។ ខ្ញុំបានធ្វើឱ្យ Johor ឈ្នះពានរង្វាន់ចំនួន១៦ ក្នុងរយៈពេល ៨ ឆ្នាំ។ យើងជាប្រទេសធំជាងគេនៅអាស៊ីអាគ្នេយ៍ និងធំជាងគេមួយចំណោមប្រទេសនៅអាស៊ី»។ នេះជាការអះអាងរបស់អង្គម្ចាស់ Tunku Ismail។
ព្រះអង្គម្ចាស់ Tunku Ismail ដែលត្រូវបានគេស្គាល់ថា ជាអ្នកមានទ្រព្យស្ដុកស្ដម្ភ អាចនឹងជួយ Valencia ដែលកំពុងត្រដាបត្រដួសបាន ប្រសិនបើក្លិបនេះក្លាយជារបស់ខ្លួន។ Valencia ក្រោមការដឹកនាំរបស់ម្ចាស់ក្លិប Peter Lim ស្ថិតនៅចំណាត់ថ្នាក់ទី១៤ ក្នុងតារាង La Liga ដោយរកបាន២៧ពិន្ទុ ពីការប្រកួត២៥លើក ពោលមាន៥ពិន្ទុឈរពីលើក្រុមត្រូវកាត់ចោល៕
Tag:
Tunku Ismail Sultan Ibrahim
Johor
© រក្សាសិទ្ធិដោយ thmeythmey.com
«គូលី»មានន័យច្បាស់លាស់ដូចម្តេច?
1 សប្តាហ៍
