អន្តរជាតិ
ចានព័រសឺឡែនចិនតាំងពីសតវត្សទី១៥ ត្រូវបានប្រទះឃើញនៅកន្លែងលក់មួយនៅអាមេរិក
×![]()
ដោយ: ធីតា
ចានតូចមួយដែលត្រូវបានទិញតែក្នុងតម្លៃ៣៥ដុល្លារប៉ុណ្ណោះពីកន្លែងលក់មួយនៅសហរដ្ឋអាមេរិក គឺវត្ថុមានតម្លៃសម្រាប់ប្រវត្តិសាស្ត្រចិន ដោយមានអាយុកាលតាំងពីសតវត្សទី១៥មកម្ល៉េះ។ យោងតាមការផ្សាយរបស់ AFP ចានព័រសឺឡែននោះ អាចលក់បានក្នុងតម្លៃដល់ទៅ៥០ម៉ឺនដុល្លារឯណោះ។
អ្នកទិញដែលរស់នៅភាគឦសាននៃរដ្ឋ Connecticut បានទាក់ទងទៅអ្នកជំនាញសេរ៉ាម៉ិកនៃក្រុមហ៊ុនដេញថ្លៃ Sotheby’s តាមរយៈការផ្ញើរូបថត។ អ្នកជំនាញ បានឲ្យដឹងថា ចានព័រសឺឡែននោះ ត្រូវបានផលិតឡើងនៅសម័យអធិរាជ Yongle ដែលជាអធិរាជទី៣នៃរាជកាល Ming ពីឆ្នាំ១៤០២ ដល់ឆ្នាំ១៤២៤។
បុរសដែលបច្ចុប្បន្នជាម្ចាស់ចាន បានសុំលាក់អត្តសញ្ញាណរបស់ខ្លួន។ «ចានបុរាណបែបនេះ មានតែ៦ទៀតប៉ុណ្ណោះនៅលើពិភពលោក ពោលវាជាវត្ថុដ៏កម្រ»។ លោកស្រី Angela McAteer អ្នកជំនាញវត្ថុសិល្បៈចិនប្រចាំក្រុមហ៊ុន Sotheby’s នៅក្រុងញូវយ៉ក បានអះអាងយ៉ាងដូច្នេះ។
Sotheyby’s ប្រកាសដាក់លក់ដេញថ្លៃចានដ៏កម្រទី៧នេះ ចាប់ពីថ្ងៃទី១៧ ខែមីនា ដោយរំពឹងថា នឹងលក់បានក្នុងតម្លៃចន្លោះពី៣០ម៉ឺនទៅ៥០ម៉ឺនដុល្លារអាមេរិក។
បច្ចុប្បន្ន ចានប្រភេទដូចគ្នា៥ទៀត មាន២នៅតៃវ៉ាន់ ២នៅក្រុងឡុងដ៍ និង១នៅតេហេរ៉ង់ ខណៈចានទី៦ ត្រូវបានរកឃើញនៅលើទីផ្សារកាលពីឆ្នាំ២០០៧កន្លងមកតាមរយៈការដាក់លក់ដេញថ្លៃពីអ្នកសន្សំវត្ថុបុរាណឯកជនមួយ៕
Tag:
ចិន
© រក្សាសិទ្ធិដោយ thmeythmey.com
«គូលី»មានន័យច្បាស់លាស់ដូចម្តេច?
1 សប្តាហ៍
