យោងតាមការផ្សាយរបស់ BBC រដ្ឋាភិបាលចិនទើបតែអនុម័តច្បាប់ថ្មី ដែលបើកផ្លូវឲ្យដៃគូអាចទាមទារសំណងលើការងារផ្ទះសម្បែង ការមើលថែទាំកូន ក៏ដូចជាឪពុកម្តាយចាស់ជរា។ ប៉ុន្តែទោះបីជាយ៉ាងណាក៏ដោយ ករណីបុរសឈ្មោះ Chen និងអ្នកស្រី Wang បានធ្វើឲ្យមានការពិភាក្សាផុសផុលក្នុងប្រព័ន្ធអនឡាញ ដោយសារតែតម្លៃជំងឺចិត្តនៃការងារផ្ទះ មានចំនួនតិចតួចនៅឡើយ។

 

កាលពីឆ្នាំមុន លោក Chen បានដាក់ពាក្យប្តឹងសុំលែងលះអ្នកស្រី Wang ក្រោយរៀបការតាំងពីឆ្នាំ២០១៥មក។ ដំបូងឡើយ អ្នកស្រី Wang មិនព្រមឡើយ ប៉ុន្តែក្រោយមក គាត់បានទាមទារជំងឺចិត្តលើការងារផ្ទះដែលបានធ្វើកន្លងមក រួមទាំងការប្រើពេលវេលាដ៏ច្រើនក្នុងការថែទាំកូនប្រុស។

 

តុលាការបានសម្រេចលើការបែងចែកទ្រព្យសម្បត្តិផ្សេងៗ ហើយក្រោយការទាមទាររបស់អ្នកស្រី Wang តុលាការក៏បានអនុវត្តច្បាប់អាពាហ៍ពិពាហ៍ថ្មីដែលបានចូលជាធរមានកាលពីខែមករា ដោយតម្រូវឲ្យលោក Chen បង់ថ្លៃអាហារកិច្ចកូនប្រុសប្រមាណ៣០០ដុល្លារក្នុង១ខែ និងសងថ្លៃជំងឺចិត្ត ៧៧០០ដុល្លារអាមេរិក ចំពោះការចំណាយពេលធ្វើការងារផ្ទះរបស់អ្នកស្រី Wang នាពេលរស់នៅជាមួយគ្នា៥ឆ្នាំ។

 

បើតាមការសិក្សាមួយរបស់អង្គការសម្រាប់កិច្ចសហប្រតិបត្តិការសេដ្ឋកិច្ច និងអភិវឌ្ឍ (OECD) ស្ត្រីនៅប្រទេសចិន ចំណាយពេលស្ទើរតែ៤ម៉ោងក្នុង១ថ្ងៃលើការងារផ្ទះដែលមិនទទួលកម្រៃ ខណៈបុរសប្រើពេលតែ១,៥ម៉ោងប៉ុណ្តោះ។ ករណីនេះ មិនមែនកើតឡើងតែនៅចិននោះឡើយ ពោលគឺនៅទូទាំងពិភពលោកទាំងមូលដែលស្ត្រីភាគច្រើនធ្វើការច្រើនតែមិនទទួលបានកម្រៃ។

 

ការសម្រេចរបស់តុលាការក្រុងប៉េកាំង ទទួលបានគាំទ្រច្រើនទាក់ទងនឹងការផ្តល់តម្លៃដល់ការងារផ្ទះរបស់ស្ត្រី ប៉ុន្តែមនុស្សមួយចំនួននៅតែយល់ថា សំណងមានកម្រិតតិចតួចនៅឡើយ៕