ក្នុងចំណោមមនុស្សសរុប ដែលបានចាក់វ៉ាក់សាំងបង្ការកូវីដ-១៩នេះ មានជិត១១ម៉ឺននាក់ ជាកងកម្លាំងទ័ព ចាក់វ៉ាក់សាំងរបស់ក្រុមហ៊ុន Sinopharm ដែលជាជំនួយរបស់ប្រទេសចិន។ ដោយឡែក ក្រុមមនុស្សអាទិភាពជាង១៨,៨ម៉ឺននាក់ទៀត ដែលបានចាក់វ៉ាក់សាំងបង្ការជំងឺកូវីដ-១៩រួចហើយនោះ គឺមាន៤១,៧៦៨នាក់ បានចាក់វ៉ាក់សាំង COVISHIELD របស់ក្រុមហ៊ុន AstraZeneca ដែលផលិតនៅឥណ្ឌា។ 

 

កម្ពុជា ចាប់ផ្តើមវ៉ាក់សាំងរបស់ក្រុមហ៊ុន Sonopharm ដើម្បីបង្ការជំងឺកូវីដ-១៩ ចំពោះមនុស្សវ័យពី១៨ឆ្នាំដល់៥៩ឆ្នាំ តាំងពីថ្ងៃទី១០កុម្ភៈ ឆ្នាំ២០២១ មកដល់ ថ្ងៃទី៤មីនា កម្ពុជា ក៏បានចាប់ផ្តើមចាក់វ៉ាក់សាំងរបស់ AstraZeneca  លើមន្ត្រីនិងពលរដ្ឋអាទិភាព ដែលមានអាយុចាប់ពី៦០ឆ្នាំឡើង រហូតដល់បច្ចុប្បន្ន។ សូមជម្រាបថា សម្រាប់អ្នកដែលមានបញ្ហាសុខភាពនិងប្រតិកម្មនានា គឺមិនអាចចាក់វ៉ាក់សាំងការពារកូវីដ-១៩ ទាំងនេះបានឡើយ។ 

 

ត្រឹមរយៈពេល២៥ថ្ងៃ នៃការផ្ទុះឡើងនូវព្រឹត្តិការណ៍២០កុម្ភៈ កម្ពុជាមានមនុស្សរហូតដល់៩៩០នាក់ ដែលបានឆ្លងជំងឺកូវីដ-១៩ ដោយក្នុងនោះមានបុរសម្នាក់បានស្លាប់ដោយសារតែជំងឺនេះ។ ចំនួនអ្នកឆ្លងនេះ គឺស្មើប្រមាណ៦៥ភាគរយ នៃអ្នកឆ្លងកូវីដ-១៩នៅកម្ពុជា សរុប ១,៥០៥នាក់។ ក្នុងចំណោម អ្នកឆ្លងកូវីដ-១៩ សរុបនេះ មាន៨៤០នាក់ បានជាសះស្បើយពីជំងឺនេះផងដែរ។

 

បច្ចុប្បន្ន ព្រឹត្តិការណ៍សហគមន៍២០កុម្ភៈ ដែលផ្ទុះចេញពីទីតាំងមួយកន្លែង នៅរាជធានីភ្នំពេញ  បានឆ្លងរាលដាល ដល់ខេត្តព្រះសីហនុ កណ្តាល ព្រៃវែង កោះកុង កំពង់ចាម កំពង់ធំ ស្វាយរៀង បាត់ដំបង សៀមរាប និងខេត្តតាកែវ៕