បច្ចុប្បន្ន ស្ថានភាពនៃការចម្លង និងការរីករាលដាលនៃជំងឺកូវីដ-១៩ ដែលកើតចេញពីព្រឹត្តិការណ៍សហគមន៍២០កុម្ភៈ  គឺមិនទាន់មានភាពធូរស្រាល នៅឡើយ។ ដោយសារហានិភ័យនៃការឆ្លងនៅតែខ្ពស់ លោក អេង សុវិចិត្រ  បានស្នើឱ្យម្ចាស់អាជីវកម្មគ្រប់ប្រភេទផ្អាកដំណើរការជាបណ្តោះអាសន្ន ចាប់ថ្ងៃទី១៧មីនា ឆ្នាំ២០២១ រហូតដល់មានការជូនដំណឹងថ្មី។ 

 

ម្ចាស់អាជីវកម្មគ្រប់ប្រភេទ ដែលស្ថិតនៅតំបន់ទីប្រជុំជនជ្រៃធំ ក្នុងស្រុកកោះធំ ខេត្តកណ្ដាល រួមមានភូមិជ្រៃធំ, ព្រែកស្បូវ និងភូមិព្រែកស៊ីវ។ ជាមួយគ្នានេះ រដ្ឋបាលស្រុកកោះធំ ក៏ស្នើឱ្យពលរដ្ឋគ្រប់រូបយកចិត្តដាក់ទុកអនុវត្តនូវវិធានការការពារ និងទប់ស្កាត់ការឆ្លងជំងឺកូវីដ-១៩ របស់ក្រសួងសុខាភិបាលឱ្យបានត្រឹមត្រូវ។ 

 

ខេត្តកណ្តាល ក្រៅពីស្រុកកោះធំដែលមានឆ្លងជំងឺកូវីដ-១៩ហើយនោះ ក៏មានស្រុកលើកដែក ស្រុកល្វាឯម  និងស្រុកកណ្តាលស្ទឹង ផងដែរ។ បច្ចុប្បន្ន មន្ទីរពេទ្យបង្អែកជ័យជំនះ ខេត្តកណ្តាល មានអ្នកជំងឺកូវីដ-១៩ ចំនួន១៩២នាក់ ក្នុងនោះប្រុស១២១នាក់ និងស្រី៧១នាក់។

 

ត្រឹមរយៈពេល២៥ថ្ងៃ នៃការផ្ទុះឡើងនូវព្រឹត្តិការណ៍២០កុម្ភៈ កម្ពុជាមានមនុស្សរហូតដល់៩៩០នាក់ ដែលបានឆ្លងជំងឺកូវីដ-១៩ ដោយក្នុងនោះមានបុរសម្នាក់បានស្លាប់ដោយសារតែជំងឺនេះ។ ចំនួនអ្នកឆ្លងនេះ គឺស្មើប្រមាណ៦៥ភាគរយ នៃអ្នកឆ្លងកូវីដ-១៩នៅកម្ពុជា សរុប ១,៥០៥នាក់។ ក្នុងចំណោម អ្នកឆ្លងកូវីដ-១៩ សរុបនេះ មាន៨៤០នាក់ បានជាសះស្បើយពីជំងឺនេះផងដែរ៕