Son ត្រូវបានបញ្ចូលឈ្មោះក្នុងក្រុមជម្រើសជាតិកូរ៉េខាងត្បូងសម្រាប់ការប្រកួតមិត្តភាពជាមួយជប៉ុន នៅថ្ងៃទី២៥ ខែមិនា ទោះបីរូបគេរងរបួសសរសៃពូរក្នុងជំនួបដែល Spurs ចាញ់ Arsenal ២-១ នៅ Premier League សប្តាហ៍មុនក្តី។
 

ដោយសាររបួសនេះ ខ្សែប្រយុទ្ធរបស់អាស៊ីវ័យ២៨ឆ្នាំ មិនអាចជួយមាន់ខ្នាយមាសតទល់នឹង Dinamo Zagreb សម្រាប់ជំនួបជើងទី២ វគ្គ១៦ក្រុមចុងក្រោយ ពានរង្វាន់ Europa League នៅរាត្រីថ្ងៃទី១៨នេះបានទេ។ កាលពីជើងទី១ ក្រុមមានមូលដ្ឋានក្នុងក្រុងឡុងដ៍នាំមុខ ២-០ រួចមកហើយ។
 

ជុំវិញករណីនេះ លោក Mourinho បាននិយាយថាប្រសិនបើ Son ខកខានការប្រកួតលីគជាមួយ Aston Villa មួយលើកទៀត នោះរូបគេមិនរំពឹងថានឹងលេងឱ្យកូរ៉េខាងត្បូងនៅទឹកដីជប៉ុនក្នុងជំនួបមិត្តភាពបានឡើយ។ នេះបើតាមការផ្សាយរបស់ទីភ្នាក់ងារព័ត៌មាន AFP។
 

«ប្រសិនបើកីឡាករម្នាក់រងរបួស គឺលែងសំខាន់ហើយសម្រាប់ការប្រកួតមិត្តភាព ឬផ្លូវការនោះ។ បើយើងឈានដល់សប្តាហ៍បន្ទាប់ ហើយ Son នៅតែស្ថិតក្នុងស្ថានភាពរបួស តើសហព័ន្ធកីឡាបាល់ទាត់កូរ៉េខាងត្បូងនឹងធ្វើអ្វី? នេះជាការបញ្ជាក់របស់អ្នកចាត់សញ្ជាតិព័រទុយហ្គាល់នាសន្និសីតកាសែត មុនលោកបន្ថែមថា ប្រសិនបើកីឡាករមិនអាចលេងឱ្យក្លិបគាត់បានទៅហើយ នោះក៏មិនអាចលេងឱ្យប្រទេសគាត់បានដែរ។ 
 

សម្រាប់ក្រុម Spurs ពួកគេហាក់ពិបាកបន្តិចក្នុងការដណ្តើមចំណាត់ថ្នាក់ Top 4 រដូវកាលនេះ ប៉ុន្តែការឈ្នះពានរង្វាន់ Europa League គឺជាផ្លូវល្អបំផុតសម្រាប់ពួកគេក្នុងការទទួលបានកៅអីលេង Champions League នៅរដូវកាលក្រោយ៕