COVID-19
ជាតិ
មនុស្ស ១៥៧ទៀតវិជ្ជមានកូវីដ-១៩ ខណៈ៧២សះស្បើយ
× មនុស្ស ១៥៧នាក់ទៀតនៅកម្ពុជា មានវិជ្ជមានកូវីដ-១៩ ខណៈ ៧២នាក់ បានជាសះស្បើយ ហើយត្រូវបានអនុញ្ញាតឲ្យចេញពីមន្ទីរពេទ្យ។ បើយោងតាមសេចក្តីប្រកាសព័ត៌មានរបស់ក្រសួងសុខាភិបាល នាថ្ងៃ ទី១១ ខែមេសា នេះ រាជធានីភ្នំពេញ ជាកន្លែងមានករណីច្រើនជាងគេបំផុត។
ក្នុងចំណោមអ្នកដែលរកឃើញវិជ្ជមានទាំង១៥៧នាក់ មាន ១នាក់ ជាករណីនាំចូល លើបុរសនីហ្សេរីយ៉ា អាយុ៤៣ឆ្នាំ ស្នាក់នៅរាជធានីភ្នំពេញ ដែលបានធ្វើដំណើរពីប្រទេសខ្លួន មកដល់កម្ពុជា នៅថ្ងៃទី ៩មេសា។ បុរសរូបនេះ នៅរង់ចាំការបញ្ជូនទៅសម្រាកព្យាបាល។ នេះបើតាមក្រសួងសុខាភិបាល។
ចំណែក ១៥៦ករណីទៀត ជាអ្នកពាក់ព័ន្ធនឹងព្រឹត្តិការណ៍សហគមន៍ ២០កុម្ភៈ ក្នុងនោះ ១៤១ករណីនៅរាជធានីភ្នំពេញ។ ៨ករណីនៅខេត្តកោះកុង , ៤ករណីនៅក្រុងបាវិត ខេត្តស្វាយរៀង និង២ករណី ជាពលរដ្ឋរស់នៅឃុំស្នោរ ស្រុកព្រៃកប្បាស ខេត្តតាកែវ។
ជាមួយគ្នានេះដែរ ក្រសួងសុខាភិបាល ក៏បានប្រកាសដែរថា មានអ្នកជំងឺ ៧២នាក់បានសះស្បើយ ក្នុងនោះមាន ៣នាក់ ត្រូវបានអនុញ្ញាតឱ្យចេញពីមន្ទីរពេទ្យខេត្តត្បូងឃ្មុំ ។ ៤នាក់ ត្រូវបានអនុញ្ញាតឱ្យចេញពីមន្ទីរពេទ្យព្រៃវែង។ ២នាក់ ត្រូវបានអនុញ្ញាតឱ្យចេញពីសណ្ឋាគារក្រេតឌុក ។ ៥នាក់ ត្រូវបានអនុញ្ញាតឱ្យចេញពីមន្ទីរពេទ្យហ្លួងម៉ែ។ ១៥នាក់ ត្រូវបានអនុញ្ញាតឱ្យចេញពីមជ្ឈមណ្ឌលជាតិកំចាត់រោគរបេង និងហង់សិន។ ៣៦នាក់ ត្រូវបានអនុញ្ញាតឱ្យចេញពីមន្ទីរពេទ្យស្វាយជ្រុំ ខេត្តស្វាយរៀង និង៧នាក់ ជាអ្នកជំងឺនៅខេត្តព្រះសីហនុ។
ភ្នំពេញគឺជាតំបន់ដែលមានករណីឆ្លងច្រើនជាងគេបំផុតជាពិសេសប្រភពចេញពីផ្សារអូរឫស្សី និងរោងចក្រ ឌីនហា ដែលនាំឲ្យរដ្ឋបាលរាជធានី កាលពីថ្ងៃទី៩ មេសា បានសម្រេចបិទខ្ទប់សង្កាត់២ នៅខណ្ឌមានជ័យ គឺសង្កាត់ស្ទឹងមានជ័យ១ និងស្ទឹងមានជ័យ២ ភូមិទ្រុងមាន់ នៃសង្កាត់អូរបែកក្អម ខណ្ឌសែនសុខ និង ៦ភូមិ (ភូមិត្រពាំងថ្លឹង២ ភូមិទួលពង្រនៃសង្កាត់ចោមចៅ១, ភូមិចំការឪឡឹក១ ភូមិប៉ប្រកខាងត្បូង ភូមិប៉ប្រកខាងជើង និងភូមិត្រពាំងល្វា១នៃសង្កាត់កាកាបទី១ និងភូមិចំការឪឡឹកទី១ នៃសង្កាត់កាកាបទី២) នៅខណ្ឌពោធិ៍សែនជ័យ។ ដោយឡែក កាលពីយប់ថ្ងៃទី១០ មេសា រដ្ឋបាលរាជធានីភ្នំពេញ បានសម្រេចបិទខ្ទប់ភូមិចំនួន ៣ទៀតនៅក្នុងសង្កាត់ស្ទឹងមានជ័យទី៣ គឺភូមិទ្រា៤ , ភូមិដំណាក់ធំ២ និងភូមិដំណាក់ធំ៣ ដើម្បីទប់ស្កាត់ការរាលដាលនៃជំងឺកូវីដ-១៩។
គិតមកដល់ពេលនេះ កម្ពុជាមានករណីឆ្លងកូវីដ-១៩ សរុប៤២៣៨ករណី ក្នុងនោះ ៣៧០៥នាក់ ពាក់ព័ន្ធនឹងព្រឹត្តិការណ៍សហគមន៍២០កុម្ភៈ។ អ្នកជំងឺសរុប ២១៥២នាក់ បានជាសះស្បើយ រីឯអ្នកស្លាប់ឡើងដល់២៩នាក់។ ក្នុងចំណោមអ្នកជំងឺទាំង ២០៥២នាក់ មាន ១០៦៤ នាក់កំពុងរង់ចាំបញ្ជូនទៅកន្លែងសម្រាកព្យាបាល។
ក្រៅពីភ្នំពេញ ខេត្តដែលមានករណី២០កុម្ភៈ រួមមានខេត្តកណ្តាល ព្រះសីហនុ ព្រៃវែង ស្វាយរៀង សៀមរាប ត្បូងឃ្មុំ កំពង់ធំ កំពង់ចាម កែប តាកែវ បាត់ដំបង កំពត កំពង់ឆ្នាំង និងពោធិ៍សាត់។ ក្នុងចំណោមនោះ ខេត្តមួយចំនួនដូចជាបាត់ដំបង និងកំពង់ធំ ក៏បានព្យាបាលសះស្បើយអស់ផងដែរ៕
© រក្សាសិទ្ធិដោយ thmeythmey.com