រដ្ឋបាលខេត្តកំពត បានប្រកាសថា អ្នកកំពត៣នាក់ទៀត បានតេស្តវិជ្ជមានកូវីដ-១៩ នៅថ្ងៃទី២០មេសា។ បើតាមសេចក្តីប្រកាសរបស់រដ្ឋបាលខេត្តកំពត ចេញផ្សាយនៅថ្ងៃទី ២១មេសានេះ ក្នុងចំណោមអ្នកវិជ្ជមានទាង៣នាក់នោះ មានម្នាក់ជាស្ត្រីវ័យ២៤ ដែលកំពុងពពោះ៨ខែ។ ស្ត្រីរូបនេះ មានលំនៅក្នុងភូមិដើមស្នាយ ឃុំព្រែកក្រឺស ស្រុកកំពង់ត្រាច ខេត្តកំពត។ 
 

អ្នកជំងឺរូបនេះ បានថ្លែងប្រាប់ Thmeythmey25 ពីមន្ទីរពេទ្យខេត្តកំពត ដែលខ្លួនកំពុង សម្រាកព្យាបាលព្យាបាល ក្រោមការមើលថែរបស់ក្រុមគ្រូពេទ្យថា កូនក្នុងផ្ទៃរបស់ខ្លួនជាកូនប្រុស ហើយដែលអាចនឹងសម្រាលនៅចុងខែឧសភាខាងមុខ។ ស្ត្រីរូបនេះ បានឱ្យដឹងទៀតថា នាង ក៏មានកូនស្ត្រីម្នាក់ទៀតដែឬ អាយុជិត៤ឆ្នាំ ដែលស្នាក់នៅជាមួយនឹងលោកយាយរបស់គេ។ ចំណែកឯប្តីរបស់គាត់ កំពុងធ្វើចត្តាឡីស័ក និងរង់ចាំការយកសំណាកវិភាគរកជំងឺកូវីដ-១៩ នៅពេលខាងមុខទៀត។

 

ចំណែកម្នាក់ទៀតជាស្ត្រី វ័យ៣៩ឆ្នាំ ជាអ្នកដើរទិញបន្លែ នៅភូមិតេជោក្បាលដំរី យកមកលក់នៅផ្សារលើ ខេត្តព្រះសីហនុ ជារៀងរាល់ថ្ងៃ។ ស្ត្រីរូបនេះ រស់នៅភូមិតេជោក្បាលដំរី ឃុំតេជោអភិវឌ្ឍន៍ ស្រុកឈូក ខេត្តកំពត។ បច្ចុប្បន្នគាត់ កំពុងសម្រាកព្យាបាលនៅមន្ទីរពេទ្យបង្អែក ប៊ុនរ៉ានី ហ៊ុនសែន កោះស្លា(៣១៧)។ នេះបើតាមរដ្ឋបាលខេត្តកំពត ដោយបញ្ជាក់ទៀតថា អ្នកវិជ្ជមានម្នាក់ទៀត ជាបុរសវ័យ ៤២ឆ្នាំ មានទីលំនៅសព្វថ្ងៃនៅភូមិកោះតាចាន់ ឃុំកំពង់ត្រាច ស្រុកកំពង់ត្រាច ខេត្តកំពត និងជាអ្នកបើករថយន្តដឹកអ្នកដំណើរភ្នំពេញ-កំពត ។ អ្នកជំងឺរូបនេះ ត្រូវបានដាក់ឲ្យសម្រាកព្យាបាលនៅមន្ទីរពេទ្យខេត្តកំពត។
 

ដ្បិតរដ្ឋបាលខេត្តបានទទួលតួលេខអ្នកមានវិជ្ជមានកូវីដ-១៩ ចំនួន ៣នាក់ កាលពីថ្ងៃទី២០មេសាក៏ដោយ ប៉ុន្តែក្រសួងសុខាភិបាល បានប្រកាសថា ខេត្តកំពតមានអ្នកកើតជំងឺកូវីដ-១៩ តែ២នាក់ ប៉ុណ្ណោះ នៅក្នុងរបាយការណ៍ប្រចាំថ្ងៃទី២១ មេសារបស់ខ្លួន។
 

តាមរបាយការណ៍ចុងក្រោយរបស់ក្រសួងសុខាភិបាល កម្ពុជាមានករណីកូវីដ-១៩ សរុប ៧ ៧៤៧ករណី ក្នុងនោះអ្នកពាក់ព័ន្ធនឹងព្រឹត្តិការណ៍សហគមន៍ ២០កុម្ភៈ មាន ៧ ២០២ករណី។ អ្នកសះស្បើយមានចំនួន ២ ៧៩៤ ខណៈអ្នកស្លាប់កើនដល់ ៥៤នាក់។ កម្ពុជានៅមានអ្នកជំងឺ ៤ ៨៩៣នាក់ ក្នុងនោះ ២ ៤១៦នាក់ កំពុងរង់ចាំការបញ្ជូនទៅសម្រាកព្យាបាល ខណៈអ្នកព្យាបាលនៅផ្ទះ នៅសល់ចំនួន ១៥នាក់៕