រដ្ឋបាលខេត្តកំពង់ស្ពឺបានរកឃើញ អ្នកវិជ្ជមានកូវីដ-១៩ ចំនួន ២៤ករណីបន្ថែមទៀត នៅថ្ងៃទី១៦ ឧសភា ដែលភាគច្រើនគឺជាកម្មកររោងចក្រ ដែលមានអាសយដ្ឋាននៅស្រុកសំរោងទង។ តាមសេចក្តីជូនដំណឹងរបស់រដ្ឋបាលខេត្តកំពង់ស្ពឺ ក្នុងចំណោមអ្នកវិជ្ជមានដែលទើបរកឃើញនោះ មានកុមារចំនួន ៣នាក់។ ទន្ទឹមនឹងនេះ ក៏មានអ្នកជំងឺ ១៣នាក់បន្ថែម បានជាសះស្បើយ ដែលធ្វើឱ្យអ្នកជាសរុបក្នុងខេត្តនេះ មាន២៨នាក់។ 

 

នៅថ្ងៃទី១៦ ខែឧសភា ខេត្តកំពង់ធំ ក៏បានរកឃើញអ្នកវិជ្ជមានកូវីដ-១៩ ចំនួន ៦នាក់ទៀតដែរ តាមរយៈការធ្វើតេស្តរហ័ស។ សេចក្តីប្រកាសព័ត៌មានរបស់រដ្ឋបាលខេត្តកំពង់ធំ បានឱ្យដឹងថា អ្នកវិជ្ជមានថ្មីទាំង៦នាក់នោះ មាន៣នាក់ជាអ្នកដំណើរពីខេត្តព្រះសីហនុ និង៣នាក់ទៀតជាពលករមកពីប្រទេសថៃ។ ក្រៅពីបង្ហាញតួលេខអ្នកឆ្លងប្រចាំថ្ងៃ រដ្ឋបាលខេត្ត ក៏បញ្ជាក់ពីករណីឆ្លងសរុបនៅក្នុងខេត្តរបស់ខ្លួនដែរ។  គិតត្រឹមថ្ងៃទី ១៦ ឧសភា ខេត្តកំពង់ធំមានអ្នកឆ្លងសរុប ១១៣នាក់ ក្នុងនោះ ២៤នាក់បានជាសះស្បើយ។  

 

ខេត្តកំពត ក៏បានរកឃើញអ្នកវិជ្ជមានកូវីដ-១៩ បន្ថែម៣នាក់ទៀតដែរលើស្ត្រីពលករខ្មែរ ដែលត្រឡប់ពីប្រទេសថៃ។ អ្នកទាំង៣ មានទីលំនៅនៅក្នុងស្រុកឈូក ខេត្តកំពត។ នេះបើតាមសេចក្តីជូនដំណឹងរបស់រដ្ឋបាលខេត្តកំពត នៅថ្ងៃទី១៦ ឧសភា។

 

តាមរបាយការណ៍របស់ក្រសួងសុខាភិបាល គិតត្រឹមថ្ងៃទី១៥ ឧសភា កម្ពុជា មានអ្នកកើតកូវីដ-១៩ ចំនួន២២ ១៨៤នាក់ ដោយសះស្បើយមាន ១២ ១២០នាក់ និងស្លាប់១៥០នាក់៕