នៅសល់រយៈពេលជិត៣ខែទៀតប៉ុណ្ណោះព្រឹត្តិការណ៍កីឡាលំដាប់ពិភពលោកនឹងចាប់ផ្តើម ពោលគឺចាប់ពីថ្ងៃទី២៣កក្កដា ដល់ថ្ងៃទី៨សីហា ស្របពេលកូវីដ-១៩ បន្តកើនឡើងកាន់តែខ្លាំងនៅលើទឹកដីម្ចាស់ផ្ទះជប៉ុន។
 

សមាគមគ្រូពេទ្យតូក្យូ (TMPA) ដែលតំណាងឱ្យគ្រូពេទ្យបឋមប្រហែល៦០០០នាក់ អះអាងថា មន្ទីរពេទ្យនានានៅក្នុងទីក្រុងដែលត្រូវរៀបចំព្រឹត្តិការណ៍កីឡាអូឡាំពិកនេះ ស្ទើរតែគ្មានគ្រែដាក់អ្នកជំងឺកូវីដ-១៩ ស្របពេលមានការកើនឡើងនៃចំនួនករណីឆ្លងយ៉ាងគំហុក។
 

TMPA នៅថ្ងៃទី១៤ ខែឧសភាបានផ្ញើលិខិតមួយទៅកាន់លោកនាយករដ្ឋមន្រ្តីជប៉ុន ស៊ូហ្កា យូស៊ីហ៊ីដេ។ ក្នុងលិខិតចំហនោះ ពួកគេបានស្នើយ៉ាងទទូចឱ្យអាជ្ញាធរបញ្ចុះបញ្ចូលគណៈកម្មាធិការអូឡាំពិកអន្តរជាតិ (IOC) លុបចោលព្រឹត្តិការណ៍កីឡានេះតែម្តង ដោយលើកហេតុផលថា ការបន្តដំណើរការនឹងធ្វើឱ្យពិបាកក្នុងការគ្រប់គ្រង។ នេះបើតាមការចុះផ្សាយរបស់ទីភ្នាក់ងារព័ត៌មាន Reuters នៅថ្ងៃ១៨ ខែឧសភា។
 

ដោយសារមានករណីឆ្លងកាន់តែច្រើន រដ្ឋាភិបាលជប៉ុនពន្យារពេលដកបម្រាបប្រកាសអាសន្នលើកទី៣នៅក្រុងតូក្យូ និងនៅតាមបណ្តាខេត្តក្រុងមួយចំនួនទៀតរហូតដល់ថ្ងៃទី៣១ ឧសភា។ TMPA បន្ថែមក្នុងលិខិតរបស់ខ្លួនទៀតថា៖ «ក្រុមគ្រូពេទ្យដែលកំពុងព្យាបាលអ្នកជំងឺកូវីដ-១៩ គ្មានទំនេរដៃឡើយ ហើយស្ទើរតែគ្មានកន្លែងទំនេរសម្រាប់ដាក់អ្នកជំងឺថ្មីទៀតផង»។
 

ស្ថាប័នវេជ្ជសាស្រ្តមួយនេះ ថែមទាំងព្រមានទៀតថា ក្រុមគ្រូពេទ្យ នឹងប្រឈមមុខការលំបាកបន្ថែមទៀតក្នុងការព្យាបាលអ្នកជំងឺដែលអស់កម្លាំងក្នុងអំឡុងរដូវក្តៅ ហើយប្រសិនបើអូឡាំពិករួមចំណែកដល់ការកើនឡើងនៃករណីឆ្លងទៀតនោះ នោះចំនួនអ្នកស្លាប់នឹងកើនឡើងផងដែរ។ ជប៉ុននឹងទទួលខុសត្រូវចំពោះករណីនេះ។

គិតត្រឹមថ្ងៃទី១៨ ខែឧសភាព ជប៉ុនបានកើនចំនួនករណីឆ្លងកូវីដ-១៩ រហូតដល់ជិត៧០ម៉ឺនករណី ក្នុងនោះស្លាប់ ជាង១ម៉ឺនករណី និងសះស្បើយជិត៦០ម៉ឺនករណី៕