តាមលោក វ៉ី សំណាង ករណីឆ្លងរាលដាលនៅក្នុងខេត្តកំពង់ស្ពឺ គឺផ្តើមចេញពីសន្តិសុខ និងអ្នកដឹកបន្លែនៅផ្សារអូរឫស្សី ដែលជាអ្នកខេត្តកំពង់ស្ពឺ។ ក្រោយមកទៀត ក៏មានករណីឆ្លងចេញពីកម្មកររោងចក្រ ហើយដែលបានធ្វើឱ្យចំនួនអ្នកឆ្លងក្នុងខេត្តកំពង់ស្ពឺហក់ឡើងជាបន្តបន្ទាប់។ អភិបាលខេត្តកំពង់ស្ពឺ បន្តថា៖«កំពង់ស្ពឺ រកឃើញករណីឆ្លងដំបូងលើអ្នកដឹកបន្លែ និងសន្តិសុខ នៅផ្សារអូរឫស្សី។ តែក្រោយមានករណីឆ្លងចេញពីរោងចក្រ នៅរាជធានីភ្នំពេញ ខេត្តកំពង់ស្ពឺ រកឃើញអ្នកឆ្លងបន្តបន្ទាប់»។
 

ដើម្បីចូលរួមទប់ស្កាត់ការឆ្លងរាលនៃជំងឺកូវីដ-១៩ រដ្ឋបាលខេត្តកំពង់ស្ពឺ បានបន្តអនុវត្តវិធានការរដ្ឋបាលបណ្ដោះអាសន្ន រហូតដល់ថ្ងៃទី២៤ ខែឧសភា។ រដ្ឋបាលខេត្ត ក៏បានបន្ត និងបង្កើនការផ្សព្វផ្សាយ ពីរបៀបថែទាំសុខភាព និងវិធីបង្ការជំងឺកូវីដ-១៩ ដល់ប្រជាពលរដ្ឋផងដែរ។
 

គិតមកទល់ពេលនេះ កម្ពុជាមានអ្នកឆ្លងជំងឺកូវីដ-១៩ សរុបចំនួន ២៣៦៩៧នាក់ អ្នកជាសះស្បើយសរុបចំនួន ១៥៧០០នាក់ ខណៈអ្នកស្លាប់កើនដល់ ១៦៤នាក់។ នេះបើតាមរបាយការណ៍របស់ក្រសួងសុខាភិបាល នៅថ្ងៃទី២០ ខែឧសភា៕